Read lumasaaba Khubiimbulilwa 19 Bible Online

Khubiimbulilwa 19 - lumasaaba bible

Khubiimbulilwa 19

¹Lwanyuma lwa bino, nawulila shishawulilikha khukhwaama mwikulu nga likono lya wanamuundu, nga liloma liri, “Aleluya Umukasya! Buwonesi, ni shiriifwa, ni kamaani bili bya Wele weefwe.

²Lwekhuuba khuukhalawo khweewe khwe kimisaango khuli khwa ŋali, naluundi khuli khukwalaafu. Wele waamalile khuukhalila malaaya umukhulu kumusaango. Malaaya uyo, uwoonakisa shiibala khulwe buyeyani bweewe. Wele waamuweele shitaambiso khulwe khuufwa khwe babakaanisi ba Wele.”

³Naluundi bayokesela angaaki nga baloma bari, “Aleluya Umukasya! Malaaya isi boosha ekhala etuukha lisuusi biilo ni biilo.”

⁴Kila basakhulu kamakhumi kabili na bane atweela ni tsisolo tsine beyalisa aasi, khukhwisaaya Wele uwikhaale khu shitsoloŋo, nga baloma bari, “Amiina! Aleluya!”

⁵Nio likono khukhwaama khu shitsoloŋo lyakuukuula liri, “Inywe babakaanisi ba Wele, babamwiisamo shiriifwa, inywe babaandu baabusheele ni be biriifwa, ni muruuye Wele weefwe!”

⁶Lwanyuma naawulila likono liliwulilikhana nga lye babaandu bakali, nga liwoloola nga kameetsi kamakali, nga liloma liri, “Aleluya, Umukasya Wele weefwe, Umunyali wa byoosi, niye umuwuli!

⁷Lekha khwikhoye, khusangaale, khumuwe shiriifwa, khulwekhuuba bukhwaale bwe Khasheese bwolele. N'umweha weewe werekekhele.

⁸Bamufukiilisile khukwaara shikwaaro shimiliwu naabi, shishimwekhamwekha, naluundi shimiliwu. Shikwaaro shiwaanga niyo bikholwa bye bakhosefu ba Wele byeesi baakhola.”

⁹Lwanyuma malayika wanomela ari, “N'urone bino: Abo babalaangibwile khu mayiiya ke bukhwaale bwe Khasheese bali n'ikhabi.” Luundi malayika wanoma ari, “Bilomo bili bya ŋali khulwekhuuba byaama isi Wele.”

¹⁰Khulwa bino byoosi, nakwa aasi mu bikele byeewe khukhwisaaya. Ne wanoma ari, “Ukhakhola uryo ta. Ise indi umwakaanisi uwashoowo, atweela ni bayaaya boowo, babaali ni bujulisi bubuwaamba khu Yesu. Ni wisaaye Wele, khulwekhuuba bujulisi bweesi Yesu areera nibwo Umwoyo uwe buŋoosi.”

¹¹Lwanyuma nabona likulu nga lyekukhile. Abonekhawo iŋwaaŋwa iwaanga. Ni n'oyo uwakikhalakho nga alaangibwa ari, Umwiyikinwa luundi Uwa ŋali. Akhala kimisaango nga emikha khu bukwalaafu naluundi niye ureera busoolo.

¹²Tsimoni tseewe tsifwaana nga kumulilo kukuuliliba. Ni khu murwe khweewe nga khulikho kamahabi kamakali. Abe baamuronakho lisiina lyeesi umuundu yeesi akhamanya ta, khurusakho umweene yenyene.

¹³Abe wakwaarire shikwaaro sheesi bamalile khuusenya mu mafuki. Ni lisiina lyeewe abe bari Ilomo ya Wele.

¹⁴Kamaye ke mwikulu kaamuloondakho nga kekhaale khu ŋwaaŋwa tsiwaanga, luundi nga bakwaarire tsingubo tsimiliwu naabi, nga tsiwaanga tselelele.

¹⁵Mukhanwa mweewe mwamamo lurima lulwamema, nga nilwo lweesi ali ni khuraambisa khuurema kamanaambo. Aliba umuwuli uwe kamanaambo nga araambisa burafu bukali, ni naye umweene alisambakilila likhoŋolo lyeesi barokelamo iviini iye lirima lya Wele, Umunyali wa byoosi.

¹⁶Khu shikwaaro sheewe ni khu liraango lyeewe, iliyo lisiina lilyaronebwakho liri, “Umuyiinga uwe bayiinga; luundi Umukasya uwe bakasya.”

¹⁷Lwanyuma nabona malayika ukuundi nga weemikhile khu nyaanga. Wakuukuulila angaaki nga alaanga binywiinywi byoosi bibipururukha mu ngaaki ari, “Ni mwiitse ano, khulwe kamayiiya ka Wele kamaboofu.

¹⁸Ni mulye tsinyama tsye kimilaambo kye bayiinga, ni tsye kimilaambo kye basilikhale bakhulu, ni tsye kimilaambo kye babaandu be kamaani, ni tsye tsiŋwaaŋwa, ni ts'abo babekhaale khu ŋwaaŋwa itsyo. Ni mulye ni tsinyama tsye kimilaambo kye babaandu boosi, basaalikhana ni bakulwa, bafwiiti ni bakhulu.”

¹⁹Lwanyuma nabona isolo ni bayiinga be shiibala ni kamaye kaabwe nga babuusana atweela, khusoolana ni n'oyo uwaba wikhaale khu ŋwaaŋwa, ni kamaye keewe.

²⁰Isolo tsana iyo bakiwaamba, atweela n'umuŋoosi uwe bubeeyi, uwakholatsaka bye kamakaanga ni bubonelo mu moni tsayo. Khulwe bubonelo buno uyo aba waborosa babaandu wakila baafuna khabonelo khe isolo, naluundi besaaya shifwaani shayo. Isolo iyo atweela n'umuŋoosi uwe bubeeyi tsana uyo, baatuumibwa nga bali balamu, mu nyaantsa iye kumulilo kwe bunoro kukutindiima.

²¹Babaramawo boosi beeribwa ni lurima lulwarura mukhanwa kh'oyo uwekhala khu ŋwaaŋwa. Binywiinywi byoosi byaalya kimilaambo kye kimibili kyaabwe.