Read lumasaaba Khubiimbulilwa 2 Bible Online

Khubiimbulilwa 2 - lumasaaba bible

Khubiimbulilwa 2

¹N'uronele malayika we Kanisa iye mu Efeso uri: “Buno nibwo buurume bubwaama is'uyo uwaambile tsinieniesi musaafu mu mukhono kweewe kumulayi, naluundi nga niye umenya akari e kimisiindi musaafu kye zaabu, kikiilikho tsitaala.

²“Ise naamanya byeesi ukhola. Naamanya nga iwe n'ukhalaabana naluundi nga n'uli ni khukhwikhaliilikha khukali. Naamanya nga iwe n'ukhakholakana ni babaandu baboonaki ta. Naluundi naamanya nga ni wafumbula abo abe babekholisa busa bari bali baarume, ne nga muŋali sibali baarume ta.

³Naamanyile nga waayikhaliilikha lukali khulwe khukhwiwaanayo wataambisibwa mu lisiina lyase. Akhaba ni bili biryo, shitweela busa iwe siwayiwusa ta.

⁴“Ne ilomo ndweela yonyene isi ise ikhwiŋuluŋuunyakho ili ndi, khuukana khwoowo khweesi waba ni nakhwo amataayi, sikhuli nikhwo khweesi uli ni nakhwo aluno ari ta. Makiboole khuukana khwoowo khwaba khuukali.

⁵Uli ni khuushimanya uri khuukana khwoowo ari khuli khufwiiti naabi. Ni wibiiyise khulwe bibyoonako byoowo. Ni wiileyo mu khukana khweesi waba ni nakhwo makiboole. Ne noola waalobele khukhwibiiyisa, ne welooseele khuukhola bibyoonako, kane niitse is'uli isyuule kusiindi kwe itaala yoowo.

⁶Ne she khabi indayi, uliyo ni shishiindu shilayi sheesi ukhola. S'ukana bikholwa bye babaandu babaloondelela khuleekela khwa Nikolawo ta. Mu shino uli busa nga ise n'indi.

⁷“Khayo uyo yeesi unyala khuurekeeresa, arekeerese byeesi Umwoyo alikho aboolela tsikanisa. Uyo yeesi ulinyalisa khuunyindaalila afuure mu busoolo, indi muwa bunyala bwe khuulya khu shisaala shishireera buulamu, shishiili mu mukuunda kwa Wele.”

⁸N'uronele malayika uwe kanisa iye Simurina uri: “Buurume buno bwaama isi uyo uuli umukiboole naluundi niye umumalilisi. Uyo niye uwafwa, ne ari lwanyuma waalamukha khukhwaama mu bafu.

⁹Ise naamanya biwaangafu byoowo, naluundi naamanya nga n'uli umutaambi. Ise naamanya khukhomyaasa khweesi babaandu bakhukhomyaasamo iwe, abo belaanga bari bali Bayudaaya ne nga se shili shituufu ta. Khulwekhuuba bali lituuli lilibusaanila muntsu iye khukhwisaayilamo Sitaani.

¹⁰“Ukharya lwekhuuba utsya khubira mu bihangafu ta. Khulwekhuuba Sitaani ali khuukana khuuwaamba batweela khus'inywe abare mu bubowe, nio akile mumale bifukhu liikhumi nga mutaambisibwa, nga abakhakilisa. Ni mube babeela, mulobe byeesi Sitaani alikho akhola, nio akile nase imbawe lihabi lye buulamu.

¹¹“Khayo uyo yeesi unyala khuurekeeresa, arekeerese byeesi Umwoyo alikho aboolela tsikanisa. Uyo ulinyindaalila afuure mu busoolo, s'alifwa khuufwa khwe kumuluundi kukuukhola khabili ta.”

¹²N'uronele malayika uwe kanisa iye Perugamumu uri: “Buno nibwo buurume bubwaama isi uyo uuli ni lurima lumeme tsimbeka tsoombi.

¹³Aloma ari, ‘Ise naamanya ndi isi iwe umenya niyo isi shitsoloŋo sha Sitaani shili. Naamanya nga iwe waayimandalalilakho. Shiwayintsawukhakho ta. Akhaba mu mbuka isi beeriramo umwiyikinwa wase Antipasi abe uuli akari mus'iinywe, naluundi isi Sitaani amenya, siwantsawukhakho ta.’ ”

¹⁴“Ne iliwo bibiindu bifwiiti biri byeesi iwe ukhola bibikhali bilayi ta. Iwoowo iyo, uli ni babaandu babaloondelela khuuleekela khwa Balamu. Balamu uyo niye uwaleekela Balaka khuutsuba babaandu ba Isiraeli khuukhola bibyoonako. Aakhola shino musaambo isi aabaleekela khuulya byeesi babaandu bawaanayo, nga besaaya ba wele baabwe. Naluundi Balamu waabaleekela khuukhola bibiindu bye buyeyani.

¹⁵Ni musaambo niyo indweela, iliwo babaandu batweela mus'iinywe babaaloondelela khuuleekela khwe babafukiilisana ni Nikolawo.

¹⁶Nashiryo ni wibiiyise. Ne n'ukane ulekhe khukhwibiiyisa ta, kane niitse is'uli ikhusoolanise nga inaambisa lurima lulwaama mukhanwa mwase.

¹⁷“Khayo uyo yeesi unyala khuurekeeresa, arekeerese byeesi Umwoyo alomela tsikanisa. Uyo yeesi ukane enyindaalile khukhwoolisa n'afuura mu busoolo, indi mumekela khu biilyo bibyaama mu ngaaki. Naluundi buli mutweela indimuwa libaale liwaanga lyeesi indiba naamalile khuuronakho lisiina liyaakha. Lisina liyaakha lino, imbaawo umuundu ukuundi uulilimanya ta, khuurusakho uyo isi indiba naaliweele.”

¹⁸N'uronele malayika uwe kanisa iye Siyatila uri: “Buno nibwo buurume bubwaama isi Umwaana wa Wele, uyo uuli ni tsimoni tsitsiili nga kumulilo kukuuli khukhwaburukha. Naluundi niye uuli ni bikyele bibiili nga biibya byeesi baaseenile.

¹⁹“Ise naamanya byeesi iwe ukhola. Naamanya nga khuukana khwoowo ni khuli naluundi uli ni khuufukiilila. Naamanya ndi akhaba nga ukhalaabana, ne uli ni khukhwikhalilikha khukali. Naluundi naamanya nga bikholwa byoowo byanyuma ni bifuurakho bikholwa byoowo bikiboole.

²⁰Ne shitweela busa, ikhwikiitsa khulwe ilomo ndweela: isaambo yeesi ufukiilisa khukholakanamo n'umukhasi uyo, Yesebeli, uwilaanga ari ali umuŋoosi. Iwe walekha khumanya uri araambisa khuleekela khweewe khuborosa babakaanisi baase ta. Abaleekela khukhola bikholwa bye buyeyani ni khuulya biilyo byeesi babaandu besaayilekho isi ba wele baabwe.

²¹Namuwa imbuka imala ndi ebiiyise bibyoonako byeewe, ne waloba khushuusakho buyeyani bweewe ubwo.

²²Khulwa shino, kane imusiindikhile bulwaale bumure aasi, khukhwoolisa nga webiiyisile. Akhaba babaandu beesi akhola ni nabo buyeyani, nabo nga sibebiiyisile ta, kane imbatuume mu butsiina bwe kamaani.

²³Kane ise niire baloondeleli beewe boosi, nio akile abo babafukiilila mus'iise boosi bashimanye bari ise naamanya bibyambaaso bye myoyo ni khukhwikoomba khwa buli mutweela. Buli muundu sheesi alifuna shililondekhana ni bikholwa byeewe nga ni bili.

²⁴“Ne isi inywe mweesi babaali mu Siyatila babaramile, babaakhaloondelela khuuleekela khuubi ukhwo ta, namwe babaakheyika bibiindu byeesi babaandu babaandi balaanga bari bibiindu bya Sitaani ta, singane imbatwiikhe busiro bubuundi ta.

²⁵Khuurusakho ni mukumise isho sheesi muli ni nasho, khukhwoolisa samweene n'indiitsa.

²⁶Ne buli muundu yeesi ulisoolana afuure mu busoolo, naluundi weloosela khuukhola byeesi ise ingana khukhwoolisa khu ntsakamo, ise indimuwa bunyala bwe khuuba umuwuli uwe kamanaambo.

²⁷Nga Wele Paapa wase n'amaambisa ise bunyala buno, ni nase indibawa inywe bunyala bwe khuuba bawuli mu manaambo. Mu buwuli bweenywe muwule nga simwokesanisa shiisa shoosi ta, nio akile babaandu babulungukhe nga n'ubuluungula tsinyuungu tse liiloba.

²⁸Khukhwokesana indi bafuurire mu busoolo, indibawa inieniesi irura nga antsye busha.

²⁹“Umuundu yeesi unyala khuurekeeresa, n'arekeerese byeesi Umwoyo aboolela tsikanisa.”