Read lumasaaba Khubiimbulilwa 20 Bible Online

Khubiimbulilwa 20 - lumasaaba bible

Khubiimbulilwa 20

¹Lwanyuma nabona malayika nga eekha khukhwaama mwikulu, nga mu mukhono kweewe wawaambile shifuungo she imakoombe. Naluundi abe wawaambile ni kumunyololo kumuboofu naabi.

²Kila akulukhila kuuremu, kuuremu kukhale kwatsana ukwo, nga nikwo umusiku, luundi niye Sitaani, waakubowa khuumala kimiiko shikana shitweela (1,000).

³Waakukholowa mwilowo imakoombe, waakwikalila mubweene umwo, nga arakho ni khabonelo, nio kulekhe khukhwilayo khuborosa kamanaambo luundi ta, khukhwoolisa kimiiko shikana shitweela nga kyaweelekho. Lwanyuma lwe kimiiko ikyo, kuuremu ukwo bakukangululekho khuumala imbuka ifwiiti iri.

⁴Lwanyuma nabona bitsoloŋo ni naabo abe babaabiikhaalekho, nga baabaweele bunyala bwe khuukhala kimisaango. Luundi naabona kimyoyo kyaabo beesi beera nga babaakhalakho kimirwe, lwekhuubeela baawayo bujulisi bwaabwe khu Yesu, ni khuuleekela Ilomo ya Wele. Bano boosi sibesaaya isolo namwe shifwaani she isolo iyo ta. Naluundi nibo sibaara khabonelo khe solo mu bweeni bwaabwe, namwe khu mikhono kyaabwe ta. Nibo balamukha khukhwaama mu bafu, baaba baawuli atweela ni Kristo, khuumala kimiiko shikana shitweela.

⁵Ne babaandi babaaramileyo khu baafwa sibaalamukha ta, khukhwoolesa kimiiko shikana shitweela (1,000) ni kyawayo. Khuno nikhwo khuulamukha khukhwaba khuukiboole.

⁶Bali ni tsikhabi naluundi bali bakhosefu abo babaanyoola kumukabo mu khulamukha khukhwanyoowa. Ni khuufwa khukhukhola khabili sikhubalikho ni bunyala bwoosi ta. Nibo baliba basaayi ba Wele, naluundi ba Kristo. Naluundi baliiba bawuli atweela ni Kristo khumala kimiiko shikana shitweela.

⁷Lwanyuma nga kimiiko shikana shitweela shaweelekho, Sitaani balimukangulula khukhwaama mu mapuusu keewe.

⁸Alirura atsye ibulafu khuuwombesa kamanaambo kakaali ibwakamilo we shiibala nga niko Goga ni Magoga; khuubuusanisa atweela babaandu baako khulwe busoolo. Ni bukali bwaabwe bwoola nga kumuyekhe kwe khu nyaantsa.

⁹Baryo basalanila mu shiibala shoosi nga bakhuumba, bebotokhelela lituuli lye bakhosefu, ni shiriimba sha Wele shikanwa naabi. Ne babeene abo kumulilo kwekha khukhwaama mwikulu kwaboosha.

¹⁰N'umusiku Sitaani, uyo uwabawomela, waatuumibwa mu nyaantsa iye bunoro itindiima kumulilo. Mu bweene umwo, isolo tsana n'umuŋoosi uwe bubeeyi nabo mweesi baatumibwa. Balikholela ibweene iyo shiisa, shiilo ni kumuusi, khuumala biilo ni biilo.

¹¹Lwanyuma nabona shitsoloŋo shiwaanga nga shili shiboofu, ni n'oyo uwashiikhalakho. Likulu ni shiibala byelukha khukhwaama is'ali byaatsya, byaalekha khubonekhakho luundi ta.

¹²Naabona baafu, nga mulimo bakhulu ni bafwiiti, nga beemikhile mu moni tsye shitsoloŋo. Abweene awo beekulawo buurone. Lwanyuma shitabo shishiindi nasho shaabikuliwa. Shino shaba shitabo she buulamu. Kila bakhalila baafu kimisaango, nga beemikha khu bikholwa byeesi baakhola, nga ni byaronebwa mu shitabo.

¹³Inyaantsa yarusa baafu babaakibamo. Luufu n'imakoombe nabyo byarusa baafu beesi byaba ni nabo. Baryo boosi baakhalilwa kumusaango khukhwiimikha khu bikholwa byeesi baakholatsaka.

¹⁴Lwanyuma luufu ni kamakoombe byaatuumibwa mu nyaantsa iye kumulilo. Inyaantsa iye kumulilo yino niyo khuufwa khukhuukhola khabili.

¹⁵Na buli mutweela yeesi, uwanyoolikhana nga lisiina lyeewe silyaronebwa mu burone bwe buulamu ta, uyo baamutumaatsaka mu nyaantsa iye kumulilo.