Read lumasaaba Khubiimbulilwa 21 Bible Online

Khubiimbulilwa 21 - lumasaaba bible

Khubiimbulilwa 21

¹Lwanyuma ise nabona likulu lishaakha ni shiibala shishaakha. Lwekhuuba abe likulu likhale ni shiibala shikhale byaweelewo. N'inyaantsa nayo yakoraanawo.

²Naluundi nabona shiriimba shikhosefu, nga nisho Yerusalemu umushaakha, nga shiikha khukhwaama mwikulu isi Wele, nga ni bamiliisa umweeha khulw'omuseetsa weewe.

³Naawulila likono lye angaaki nga lyaama khu shitsoloŋo, nga liloma liri: “Bona ari Wele amenya mu baandu. Kane amenye mu baandu beewe, ni nabo kane babe babaandu beewe. Ni Wele umweene kane abaatsake atweela ni babaandu beewe, niye Wele waabwe.

⁴Wele alibeeyakho kamasika koosi khukhwaama mu moni tsaabwe. Shiilibawo luundi khuufwa, namwe kumutaambo, namwe khuulila, namwe butsiina ta. Lwekhuuba bibiindu byoosi bibyanyoowa khubawo, ari byaweelewo.”

⁵Uyo uwekhala khu shitsoloŋo waaloma ari: “Bona ingalusa bibiindu byoosi khukhwikyela bishaakha.” Waaloma luundi ari, “Rona bilomo bino, lwekhuuba bino byoosi bili bibiyikinibwa naluundi bili bya ŋali.”

⁶Lwanyuma waanoma ari, “Shaamalile khuukholikha. Ise indi Alufa, naluundi indi Omega. Ise niye Bunanikhilo, naluundi ise indi Bubwakamilo. Uyo yeesi uuli bulesa kane imufukiilile khuunywa busa khukhwaama mu sebele ireera buulamu.

⁷Uyo usoolana waamalakho busoolo nga waafuurire, alinyoola busikha bubuulimo bino, ni nase indiba Wele weewe, naye aliba umwaana uwase.”

⁸Ne abo babaali ni buuri, ni babaakhali ni khufukiilila ta, ni naabo babaamala khukhwoonekha, ni babeeri, ni bayeyani, ni balosi, ni babesaaya bifwaani, ni babeeyi boosi; babaandu babaali nga bano kumukabo kwaabwe kuliba khuubatuuma mu nyaantsa itindiima ni kumulilo kwe bunoro. Khuno nikhwo khuufwa khukhuukhola khabili.

⁹Lwanyuma mutweela khu bamalayika musaafu babaaba ni bibuumba musaafu nga byetsuulemo bitaambiso musaafu bibimalilisayo, wetsa isi ise indi. Wanoma ari, “Ni wiitse ano. Yiitsa ikhwokese umweeha, Umukhasi we Khasheese.”

¹⁰Nakwaarisibwa ni kamaani k'Omwoyo, kila malayika ambila khu lukiingi luboofu, nga luleeyi naabi. Malayika uyo wantsokesa shiriimba Yerusalemu shikhosefu, nga shiikha khukhwaama isi Wele mwikulu.

¹¹Shiriimba isho shamulikhamulikha ni shiriifwa sha Wele. Ni khuumulikha ukhwo khwalekhaana ni khwe libaale lye buukusi bwe angaaki, nga sherurukhilile nga libaale lililaangibwa yasepi.

¹²Shiriimba isho shaba ni kuutikiyi kuboofu, nga kuleeyi. Shabakho kimilyango liikhumi na kibili, nga buli kumulyaango kuliindibwa ni malayika mutweela. Abe baaronakho kamasina ke bikuuka liikhumi na bibili, bye babaandu be mu Isiraeli, khu milyango kino.

¹³Khu luwaande lwe ibwama inyaanga yabayo kimilyaango kitaru. Khu luwaande lwe imurwe, yabayo kimilyaango kitaru. Khu luwaande lwe ibikyele, kimilyaango kitaru. Ni khu luwaande lwe ibukwa inyaanga, nayo yabayo kimilyaango kitaru.

¹⁴Kutikiiyi kwe shiriimba ukwo kwaba ni kamabaale ke kimisingi liikhumi na kabili. Ni khu misingi ikyo khwabakho kamasina liikhumi na kabili ke baarume liikhumi na babili be Khasheese.

¹⁵Malayika uwaanganikhayo isi ise aba waasutile kumukosi kukuupima, nga kuli kwe zaabu. Kumukosi kuno abe kuli kwe khuupima shiriimba, ni kimilyaango kyasho, ni kamatikiiyi kaasho.

¹⁶Bubalaayi bwe shiriimba, ni buleeyi bwasho abe bilekhaana busa. Malayika waapima shiriimba nga araambisa kumukosi ukwo. Waanyoola nga buleeyi bwasho shoolesa tsi kilomita bikana bibili ni bitoondo bine (2,400). Ni bubalaayi nabwo buryo, ni khuuniina mu ngaaki nakhwo khuryo. Nga byoosi bilekhaana busa.

¹⁷Lwanyuma waapima liitikiiyi lyasho. Nga mu khuraambisa shipimo sheesi malayika aaba ni nasho, abe lyoolisa tsifuuti bitoondo bibili ni liikhumi na tsisesaba (216) khuuniina mu ngaaki.

¹⁸Litikiiyi abe balyoombekha nga baraambisa kamabaale kakalaangibwa yasepi. Ne shiriimba shisheene bashombekhela izaabu yonyene busa, nga mbaamo khakhaandu ta. Izaabu yino abe yayirurukhilila nga indolelo.

¹⁹Kimisingi kye litikiiyi lye shiriimba kyakholebwa mu mabaale ke bukusi bwe angaaki, nga kali ke tsisaambo tsingali. Libaale lye kumusiinji lilyanyoowa lyaba lye shikuuka sha yasepi. Liliikhola khabili lyaba lya sapiri, liliikhola khataru lyaba lya kaledoni, liliikhola khane lyaba lye emerodi.

²⁰Libaale liliikhola kharaano lyaba lye shikuuka sha salidoniki, liliikhola khasesaba lyaba lya kaneliani. Lye kumusaafu lyaba lya kilisolito, lye shinaane lyaba lya belulo, lye shisheenda lyaba lya topazi, lye liikhumi lyaba kilisopulasi. Libaale liliikhola liikhumi na litweela lyaba lya yasuti, ni lye liikhumi na kabili lyaba lya amezisito.

²¹Kimilyango liikhumi na kibili kyaba kye tsilulu. Buli kumulyaango mutweela kwaba ilulu ndweela. Kumukhoosi kukubira mu shiriimba kwaba kwe zaabu yonyene busa, nga kumulikha nga indolelo.

²²Ne mu shiriimba umwo, sinabonamo Lisaayilo Likhulu ta. Khulwekhuuba Umukasya Wele, Umunyali wa byoosi, ni Khasheese, babeene nibo Lisaayilo Likhulu lye mu shiriimba.

²³Naluundi nga seshikoombesa inyaanga namwe kumweesi khukhwaburukha mu shiriimba isho ta. Khulwekhuuba shiriifwa sha Wele nisho shishiili buwaanga bwe shiriimba. Ni Khasheese khakheene nikho itaala iye mu shiriimba isho.

²⁴Buwaanga bwe shiriimba isho nibwo bukane buraangililatsake babaandu be kamanaambo koosi khu shiibala. Ni bayiinga be mu shiibala boosi kane bareere biriifwa byaabwe mu shiriimba isho.

²⁵Imbaawo ni khu shifukhu na shitweela yeesi balikalilawo kimilyaango kye shiriimba isho ta. Khulwekhuuba ibweene iyo s'ilibaatsakayo shishilima ta.

²⁶Balireera shiriifwa ni buyinda bwe kamanaambo mu shiriimba isho.

²⁷Ne imbaawo shishiindu shoosi shishilikho kumusilo, namwe umuundu yeesi ukhola by'embikho, namwe umuundu yeesi umubeeyi, ukane enjile mu shiriimba isho ta. Khurusakho abo babaali ni kamasina kaabwe nga kaaronebwa mu burone bwe Khasheese, bwe buulamu.