Read lumasaaba Khubiimbulilwa 22 Bible Online

Khubiimbulilwa 22 - lumasaaba bible

Khubiimbulilwa 22

¹Lwanyuma malayika wantsokesana luluutsi lwe kameetsi kakaareera buulamu. Abe lwaama mu shitsoloŋo sha Wele ni she Khasheese, nga lunyenanyena nga indolelo.

²Abe luluutsi luno lwiikha nga lubirira akari we kumukhoosi kukuuli mu shiriimba. Khu buli luwaande lwe luluutsi luno, iyi ni n'eyi, khwabakho shisaala shishireera buulamu. Shisaala shino abe shaana bibyaano kimiluundi liikhumi na kibili mu mwiiko. Nga buli mweesi, shaana kumuluundi mutweela. Ni kamasaafu ke shisaala isho kaaba kali kamasuuswa isi kamanaambo koosi.

³Mu shiriimba umwo simulinyoolikhana shishiindu shoosi sheesi Wele aamala khuutsuba ta. Shitsoloŋo sha Wele ni shitsoloŋo she Khasheese, nibyo biliba mu shiriimba umwo. Ni babakaanisi beewe balimwisaaya.

⁴Balimubona mu moni mweewe, naluundi balirona lisiina lyeewe mu bweni mwaabwe.

⁵Shishiilima shilikoraanawo. Sibalikoomba buwaanga bwe taala, namwe bwe nyaanga ta. Khulwekhuuba Umukasya Wele umweene aliba niye buwaanga bwaabwe. Ni babeene abo baliba bawuli khumala biilo ni biilo.

⁶Lwanyuma malayika waanoma ari, “Bilomo bino bili bya ŋali naluundi uli ni khuubiyikina. N'Umukasya, Wele uwe kimyoyo kye baŋoosi, waarumanile malayika weewe khukhwokesa babakaanisi beewe ibyo bibyaba byaakha khubawo mu mbuka ikhali iye aleeyi ta.”

⁷Yesu aloma ari, “Bona ise indikho niitsa khaangu. Ne umuundu yeesi utsiila khu bilomo bye buŋoosi bwe mu burone buno, uyo aba ali ni ikhabi.”

⁸Ise Yokana niye uwawulila naluundi nabona bibiindu bino. Ni nabiwulila naluundi nabibona, nakwa aasi e bikele bya malayika uwantsokesana bibiindu bino, khumwisaaya.

⁹Ne niye waanomela ari, “Ukhantsisaaya ise ta! Khulwekhuuba nase ndi umwakaanisi nga iwe n'uli, naluundi nga bayaaya boowo baŋoosi ni bali, ni naabo boosi babaatsiila khu bilomo bibyaronebwa mu burone buno. Ni wisaaye Wele.”

¹⁰Lwanyuma waanoma ari, “Ukhabiikha bilomo bye buŋoosi bibiili mu burone buno nga shimoonyo ta, lwekhuuba imbuka ili aambi khukhwoola.

¹¹Lekha ukhola buubi eloosele khuukhola buubi bweewe. Ni n'oyo ukhola bye bunyaalu lekha eloosele ni bye bunyaalu byeewe. Ni n'oyo ukhola bye bukwalaafu eloosele khuukhola bye bukwalaafu. Umukhosefu khayo eloosele ni khuuba Umukhosefu.”

¹²“Ne bona indikho niitsa khaangu, nga ndi ni shiwaanwa. Kane buli mutweela imuwe shiwaanwa khuulondekhana ni bikholwa byeewe.

¹³Ise ndi Alufa, naluundi ndi Omega, Umukiboole, naluundi niye Umaliilisayo, Buunanikhilo, naluundi niye Bubwaakamilo.”

¹⁴Bali ni khabi khukhwaama isi Wele abo babaasiinga tsingubo tsaabwe nio banyale khufukiilisibwa khuulya bibyaano bye khu shisaala shishireera buulamu, luundi nio banyale khufukiilisibwa khukhwinjila mu shiriimba nga babirira mu milyaango kyasho.

¹⁵Ne ibulafu we shiriimba ilibayo tsiimbwa, balosi, bayeyani, babeeri, babesaaya bifwaani, na buli uyo yeesi umenya mu khukhola bye bubeeyi.

¹⁶“Ise niye Yesu. Naarumanile malayika wase khuubawa bujulisi buno, inywe kamatuuli koosi ke baafukiilisi. Ise indi umusaalikhana naluundi indi uwe nda iya Dawudi. Ise niye inieniesi ikhosa tselelele, irura kumutikhinyi.”

¹⁷Umwoyo n'Umweeha baloma bari: “Yiitsa.” N'abuli mutweela uwulila bilomo bino ali ni khuuloma ari: “Yiitsa.” Lekha buli mutweela uuli bulesa eetse. N'abuli mutweela uwikoomba kameetsi kakaareera buulamu, ni eetse anywe ka busa.

¹⁸Ne ise indi khuureewula buli mutweela yeesi uwulila bilomo bye buŋoosi bye mu burone buno. Uyo yeesi ukana alooselekho shishiindu shoosi khu biindu bino, Wele alimulooselakho bitaambiso bibikanikhibwakho mu shitabo shino.

¹⁹Ne noola umuundu yeesi arusakho ilomo yoosi khu bilomo bibiili mu burone buno, naye Wele alimurusakho khukhwaama khu mukabo kweewe khu shisaala shishireera buulamu, ni khu mukabo kwe mu shiriimba shikhosefu, nga ni bikanikhibwakho mu shitabo shino.

²⁰Uyo uwayo bwa ŋali khu biindu bino aloma ari: “Ilala, indikho niitsa khaangu.” Amiina. Yiitsa Umukasya Yesu.

²¹Bubweela bw'Omukasya Yesu bube ni nanywe mweesi. Amiina.