Read lumasaaba Khubiimbulilwa 3 Bible Online

Khubiimbulilwa 3 - lumasaaba bible

Khubiimbulilwa 3

¹N'uronele malayika uwe kanisa iye Sarudi, uri: “Buurume buno bwaama isi uyo uliinda ba mwoyo musaafu ba Wele ni tsinieniesi musaafu. Aloma ari, naamanya bibiindu bibikhuwaambakho byoosi. Naamanya nga ni bakhufumisa bari uli umulamu, ne nga waamala khuufwa khaale.

²N'usisimukhe, manya oosi wahaambilisa shishiindu shitaayi shishiikhulimo. Khulwekhuuba ni shiilayi shishishiikhulimo nasho shikana khufwa. Khukhwoolisa ari Wele s'asiima byeesi iwe ukhola ta, khuuloondekhana n'isaambo isi umenyamo, nga shiwokyesanisa bukhosefu ta.

³“Shebulila nga ni waba ni kameelu ke khuufukiilila mu Wele nga nio uliwulile buurume bwa Wele. Ni wikumisile khu burume bweene ubwo, wibiiyise bibyoonako byoowo. Ne noola siwebiiyisile bibyoonako ta, kane niitse is'uli nga umwiifwi, nga s'ikhureewula isaawa isi kane niitsilemo ta.

⁴“Ne she khabi indayi ushilikho ni babaandu bakyeekhe bari mu Sarudi babaakhakhola bibyoonako ta. Babeene abo kane bakyeende ni nase nga bakwaarire bikwaaro biwaanga, khulwekhuuba bali bakhosefu.

⁵Umuundu yeesi ukhaamalekho busoolo nga waafuurire, naye alikwaara bikwaaro biwaanga nga bano ni bakwaara. Ise s'indisangula kamasina kaabwe khukhwaama mu burone bwe buulamu ta. Ne khuurusakho ise indiruumbula kamasina kaabwe isi Paapa wase, atweela ni bamalayika beewe.

⁶“Khayo umuundu yeesi unyala khuurekeeresa, arekeerese byeesi Umwoyo aboolela tsikanisa.”

⁷N'uronele malayika uwe kanisa iye Filadelifiya, uri: “Buurume buno bwaama isi uyo uuli Umukhosefu naluundi uuli uwa ŋali. Umweene uyo niye uuli ni shifuungo sha Dawudi. Niye n'aba nga wekulewo kumulyaango, imbaawo umuundu yeesi unyala waakwikalawo ta. N'aba nga wekalewo kumulyaango, imbaawo unyala wekulawo ta.

⁸“Ise naamanya byeesi iwe ukhola. Ne bona ari ibweeni woowo naareereyo lulwiitsi lulwikule, lweesi umuundu yeesitsana akhanyala khukhwikalawo ta. Naamanya indi, akhaba nga uli ni kamaani makyeekhe, ne siwayikaana lisiina lyase ta.

⁹Kane indeere abo babaali lituuli lilibuusanila muntsu iye khukhwisaayilamo Sitaani, beetse is'uli bakhwinamile iwe, naluundi bafukhamile mu bikyele byoowo. Nio shino shikile bamanye bari ise ikhukana iwe. Babeene abo nibo babelaanga bari bali Bayudaaya, ne nga sibali Bayudaaya ta. Khulwekhuuba baboola bye bubeeyi.

¹⁰Khukhwaama iwe ni waliinda Ilomo yase nga ubirira mu khwikhaliilikha, ni nase indikhutseeta iwe nga wakwiile mu bihangafu bibikhukhonjelesa. Bihangafu bibikhongelesa bino bili khuutsya khukwa khu shiibala shoosi, khukhakilisa abo boosi babamenya mu shiibala.

¹¹Indi aambi khukhwiitsa. Nashiryo kumisila ilala isho sheesi uli ni nasho. Ukhafukiilila umuundu yeesi waabukula lihabi lyoowo ta.

¹²“Uyo yeesi ulinyindalila khukhwoolisa n'alifuura mu busoolo, indimukalusa ekyele nga intseko iye mu Lisaayilo likhulu lya Wele. N'umweene uyo alimenya mu Lisaayilo likhulu umwo, biilo ni biilo. Indimuronakho lisiina lya Wele wase, atweela ni lisiina lye shiriimba sha Wele wase, nga lisiina ilyo nisho shiriimba Yerusalemu, umushaakha uwiikha khukhwaama mwikulu isi Wele. Naluundi indimuronakho lisiina lyase lishaakha.

¹³“Khayo uyo yeesi unyala khuurekeeresa, arekeerese ibyo byeesi Umwoyo aboolela tsikanisa.”

¹⁴N'uronele malayika uwe kanisa iye Lawodikiya uri: “Buurume buno bwaama isi uyo ulaangibwa ari Amiina. Umweene uyo uuli umwiyikinwa, naluundi ali uwayo bujulisi khu bya ŋali. Khuubuumba bibiindu khweesi Wele aakhola, khurakikhila mu mweene uyo.

¹⁵“Ise naamanya byoosi byeesi iwe ukhola. Naamanya indi uliwo busa uryo, nga uli uwe suuya busa. S'ulimo bukhafu namwe bunyifu ta. Ubakho umukhafu namwe umunyifu, khali shifuurire.

¹⁶Ne khukhwaama iwe n'ukhali umukhafu namwe umunyifu ta, nga n'ukhalimo isuuya ta, kane ikhufuutse khukhwaama mukhanwa mwase.

¹⁷Khulwekhuuba iwe wiyambaasakho uri, ‘Indi umuyindifu, nayitsusa bye buyiindifu bikali, naluundi indi nabuli shitweela shoosi sheesi ingana.’ Walekha khumanya nga uli mu mutaambo ta. Naluundi uli utiimatiima busa, s'uli ni shishiindu shoosi ta, uli ukhabona ta, naluundi uli busa bukhuna.

¹⁸“Nashiryo ise ikhurewula iwe ndi, n'ukule izaabu khukhwaama isi ise. Izaabu yino isi baamala khuŋoonela mu mulilo, nio akile wikyele umuyindifu. Naluundi n'ukule bikwaaro biwaanga khukhwaama isi ise ukwaare, nio akile wirusekho khuswala khweesi ulimo khulekhe khubonekha ta. Naluundi n'ukule kamasuuswa khukhwaama isi ise. Kamasuuswa kano ukare mu moni tsoowo nio akile tsibone bulayi.

¹⁹“Ise inomakho naluundi nikiitsakho abo beesi ingana. Nashiryo n'uremo kamaani wibiiyise.

²⁰Bona, neemikhile khu mulyaango, indikho ikhoonyaka. Umuundu yeesi n'awulila likono lyase, wekulawo kumulyaango kweewe, kane ise ningile mu ntsu yeewe, indye ni naye, ni naye alye ni nase.

²¹Uyo yeesi uuba umunyindalifu mu busoolo, waasoolana lwanyuma waafuura, indimufukiilila khukhwikhala ni nase khu shitsoloŋo shase she buuwuli. Naye abe busa nga ise ni nenyindaalila khukhwoolisa ni nafuura mu busoolo, lwanyuma naatsya nekhala ni Paapa wase khu shitsoloŋo sheewe she buwuli.

²²“Khayo uyo yeesi unyala khuurekeeresa, arekeerese ibyo byeesi Umwoyo aboolela tsikanisa.”