Read lumasaaba Khubiimbulilwa 4 Bible Online

Khubiimbulilwa 4 - lumasaaba bible

Khubiimbulilwa 4

¹Lwanyuma lwa bino, nesheenga nabona kumulyaango mwikulu nga kumwikule. Kila likono tsana abe liliili nga ikhoombi, abe lyeesi nanyoowa khuwulila nga linganikhayo, nga liloma liri: “Yiitsa ino, ikhwookese bibiindu bibyaakhiile khuubawo lwanyuma lwa bino nga byaaweelewo.”

²Khaangukho, Umwoyo waantsikhila wamaamba. Naabona shitsoloŋo nga shili mwikulu. Naabona n'umuundu nga waashiikhaalekho.

³Umuundu abe uwikhaale khu shitsoloŋo isho, abe abonekha nga amelamela, nga ali nga kamabaale ke kumukaso naabi. Abe lufutu lulukhali lwa busheele ta, nga luno lumelamela naluundi luli lwe raangi iye lubookha, lwabotokheleele shitsoloŋo isho.

⁴Abe iliwo bitsoloŋo bibiindi kamakhumi kabili na bine nga byebotokheleele shitsoloŋo isho. Ne khu bitsoloŋo kamakhumi kabili na bine ibyo, nga khwekhaalekho basakhulu kamakhumi kabili na bane. Basakhulu bano abe bakwaarire bikwaaro biwaanga, ni khu mirwe kyaabwe nga buli mutweela wakwaarire lihabi lye izaabu.

⁵Abe iliwo khuumulikhaka khukhuuli khukhwaama khu shitsoloŋo isho. Naluundi abe iliwo tsimbeni nga tsimulikha, ni khuukuula khuukali nga khwe ifula. Ibweeni we shitsoloŋo nga iliyo tsitaala musaafu, nga tsilikho tsaaburukha. Tsitaala tsino tsyaba ba mwoyo musaafu ba Wele.

⁶Ibweeni we shitsoloŋo yabayo shishiindu abe shishifwaanana nga inyaantsa ibonekha nga indolelo. Abe inyaantsa yino ili nga kamararara. Abawo tsisolo tsine nga tsyebotoshelele shitsoloŋo, khu maande tsoosi tsine. Tsisolo tsino abe tsaayitsula tsimoni, nga tsimoni tsino tsili iburaangisi n'imukoongo we tsisolo.

⁷Isolo ingiboole abe ifwaanana nga italanyi. Isolo ikhola khabili abe ifwaanana nga ikhaafu iwuunwa. Isolo ikhola khataru abe ili ni mu moni nga mw'omuundu. Isolo ikhola khane abe ifwaanana nga ikhosi.

⁸Buli isolo, khu solo tsino tsoosi tsine, yaba ni tsindaha tsisesaba, ni tsimoni nga tsetsuule khu mubili kwoosi, khu ngaaki ni mukari. Abe kumuusi ni mu shilo, tsikhala tsiimba tsiri, “Umukasya Wele Umunyali wa byoosi, ali Umukhosefu, luundi Umukhosefu, luundi Umukhosefu. Uyo niye uwabawo makiboole, uliwo ni aluno ari, naluundi ulibawo biilo ni biilo.”

⁹Abe buli isi tsisolo tsino tsine tsokesanila shiriifwa, ni lukoosi, n'imbuyila is'uyo abe uwekhala khu shitsoloŋo, uyo uliwo biilo ni biilo,

¹⁰abe basakhulu tsana kamakhumi kabili na bane bakwa beyalisa aasi mu moni tsy'oyo uwikhaale khu shitsoloŋo, baamwisaaya. Umweene uyo niye uliwo biilo ni biilo. Abe nga bamwisaaya baalisa kamahabi kaabwe aasi, mu moni we shitsoloŋo nga beemba bari,

¹¹“Umukasya weefwe, naluundi Wele weefwe, iwe waakhila khuuweebwa lubuyi, ni shiriifwa, ni bunyala. Khulwekhuuba iwe niye uwabuumba bibiindu byoosi. Wabuumba bibiindu khulwe khuukana khwoowo naluundi byoosi bili ni bulamu khulwe khuukana khwoowo.”