Read lumasaaba Khubiimbulilwa 5 Bible Online

Khubiimbulilwa 5 - lumasaaba bible

Khubiimbulilwa 5

¹Lwanyuma ise nabona lupapula lweesi bawulukusile, nga lulikho buurone mukari ni khu ngaaki, nga luli mu mukhono kumulayi kw'oyo abe uwikhaale khu shitsoloŋo. Abe lupapula luno balufundikhakho kamafundikho musaafu.

²Naabona malayika uwekamaani nga akuukuula ni likono lye angaaki, nga aloma ari, “Naanu uli ni lisuno, unyala khutingula kamafundikho, ekule buurone bweesi bawulukusile buno?”

³Ne alekha khunyoolekhanawo umuundu yeesi oba mwikulu, namwe khu shiibala, namwe mwiloba aasi, abe unyala khuukangulula buurone bweesi baawulukusa ta. Namwe akhaba khulolamo busa ta.

⁴Shino shakila ise naalila lukali, khulwekhuuba siyanyoolikhanayo umuundu yeesi uwe lisuno abe uwakhila khuukangulula buurone ubwo, namwe khuululolamo busa ta.

⁵Kila mutweela khu basakhulu abo wanoma ari, “Ukhalila ta. Khulwekhuuba uyo uuli nga italanyi, uwe mu shikuuka sha Yuda, uwe munda iya Dawudi, wamala khusoolana ni khuwula mu busoolo. Nashiryo umweene uyo anyala khukangulula buurone ubwo, ni khutingula kamafundikho musaafu kakalulikho.”

⁶Lwanyuma ise nabona Khasheese kheemikhile akari we shitsoloŋo, nga tsisolo tsana tsine ni basakhulu batsana baamwibotokheleele. Khasheese khabonekha nga khakhaamala khukhwiiribwakho khaale. Abe khali ni tsintsika musaafu, ni tsimoni musaafu, nga bino nibyo bibyaba ba mwoyo musaafu ba Wele beesi arumana mu shiibala shoosi.

⁷Khasheese khatsana khaatsya khaabukula lupapula lweesi abe bawulukusile khukhwaama mu mukhono kumulayi, kw'oyo abe uwikhaale khu shitsoloŋo.

⁸Khasheese ni khaaba nga khabukula buurone ubwo, tsisolo itsyo tsine ni basakhulu abo kamakhumi kabili na bane, beyalisa aasi mu moni tse Khasheese tsana. Buli mutweela khu basakhulu abo, aba abe ali ni lituungu, ni bibuumba bye izaabu nga byetsuulemo bubaani bwe khukhwoosha. Bubaani buno bwaba nikhwo khuloomba khwe babaandu ba Wele babaali bakhosefu.

⁹Kila beemba kumweenya kumushaakha bari, “Iwe uli ni lisuno, unyala khubukula buurone bweesi bawulukusile watingula kimikosi kikilulikho. Khulwekhuuba iwe bamala khukhwiira, naluundi khulwe khukhwiribwa khwowo iwe wehaanayo khuutsukha kamafuki koowo, uryo waaba waraambisire buukusi bwe angaaki khuukulila Wele babaandu khukhwaama mu buli shikuuka, ni mu buli lulimi, ni mu buli linaambo, ni mu buli babaandu boosi.

¹⁰Iwe wakalusa babaandu bano boosi khuuba basaayi babaali mu buyiinga bwoowo nga bali babakaanisi ba Wele weefwe. Ni nashiryo babaandu bano baliba bawuli be khu shiibala.”

¹¹Lwanyuma indi ndola luundi, naawulila kamakono ke bikana ni bikana bye bamalayika nga balikho beemba. Abe beemikhile nga babotookheleele shitsoloŋo, atweela ni tsisolo tsana tsine, ni basakhulu batsana.

¹²Abe boosi balikho beembela mu likono lye angaaki nga baloma bari, “Khasheese kheesi beera khaakhiile khuuwebwa buunyala, ni buyiindifu, ni kamakyesi, n'imbuyila, ni shiriifwa, ni lukoosi ni khuubuyilibwa.”

¹³Nio nawulila bibuumbe byoosi bibyabuumbibwa, ibyo bibiili mwikulu, ni bibiili khu shiibala, ni bibiili aasi mwiloba, ni bibiili mu nyaantsa, nga byoosi bilikho byeemba biri, “Lubuyi, ni lukoosi, ni shiriifwa, ni buyiinga, bibe is'uyo uwikhaale khu shitsoloŋo n'isi Khasheese, biilo ni biilo.”

¹⁴Kila tsisolo tsana tsine tsiloma tsiri, “Amiina.” Ni abweene awo, basakhulu batsana beyalisa aasi, besaaya.