Read lumasaaba Khubiimbulilwa 6 Bible Online

Khubiimbulilwa 6 - lumasaaba bible

Khubiimbulilwa 6

¹Lwanyuma nabona Khasheese nga khatingula lifundikho liikiboole, khu mafundikho katsana musaafu. Ni abweene awo nawulila isolo indweela khu solo tsine tsana nga iloma ni likono lilyafwaanana nga ifula n'ikuula, nga iloma iri, “Yiitsa.”

²Ni nalola, khaangu akho naabona iŋwaaŋwa iwaanga. Abe ukikhaalekho waawaambile buyiingo. Baamuwa liyabi, waarurawo waatsya nga umalile khufuura mu busoolo, naluundi aweentsa ari abe niye ufuura.

³Khasheese ni khaatingula lifuundikho liliikhola khabili, naawulila nga isolo ikhola khabili iloma iri, “Yiitsa.”

⁴Iŋwaaŋwa ikiindi yaawulukha. Iyino yaba imbesemu. Uyo abe ukikhaalekho abe waweebwa bunyala bwe khumalawo lukoosi khu shiibala, ari nio akile babaandu beerane. Baamuwa lurima lwe kamaani.

⁵Khasheese ni khaatingula lifundukho liliikhola khataru, naawulila nga isolo ikhola khataru iloma iri, “Yiitsa.” Ni nalola, khaangu akho iŋwaaŋwa imali yaawulukha. Abe ukikhaalekho waawaambile mu mukhono kweewe shishiindu shishipiima busiro.

⁶Nio nawulila shishiindu shishafwaana nga likono lilyaama mu solo itso tsoosi tsine nga liloma liri, “Shipimo shitweela she iŋaano kane shibe idinari indweela. Ni bipiimo bitaru bye kamayemba, nabyo idinari indweela. Ne ukhakholakho buubi bwoositsana khu bisaala bibyaamamo kamafura ni bibyaamamo iviini ta.”

⁷Khasheese ni khaatingula lifundukho liliikhola khane, naawulila likono lye isolo ikhola khane, nga liloma liri, “Yiitsa.”

⁸Ni nesheenga nabona iŋwaaŋwa iyabuukha nga likoshe. Lisiina ly'oyo uwaba wakikhaalekho, bari “Luufu.” Abe ukuundi bari “I makoombe,” wamulondilekho imukoongo. Abano baaweebwa bunyala khu shisiintsa shitweela sha khane she shiibala shoosi, khukhwiira nga baraambisa lurima, ni khuurawo intsala, ni khuureerawo luufu, ni khukhwiira babaandu nga baraambisa tsisolo tse mwiirome.

⁹Khasheese ni khaatingula lifundukho liliikhola kharaano, ise naabona mu lwaalo mwe shisheeso, kimyoyo kye babaandu boosi babeeribwa khulwe khuuba bajulisi, nga mu bulamu bwaabwe baloondelela khufukiilila khwawe nga bakhola byeesi Wele n'akana.

¹⁰Abano baayokesa ni likono lye angaaki nga baloma bari: “Wele Umunyali wa byoosi, iwe uli umukhosefu naluundi uli uwa ŋali! Abo babaali khu shiibala babaakhwiira ifwe, ulibakhalila liina kumusaango nga wilihasa khuufwa khweefwe?”

¹¹Buli mutweela khu beene abo, awo baamuwa shikwaaro shiwaanga. Baababoolela bari bekhalilikhekho khakyeekhe, khukhwoolisa nga be buulebe bashaabwe babaali babakaanisi mu Kristo, nabo baamalile khukhwiribwa nga nibo ni beeribwa.

¹²Lwanyuma Khasheese ni khaatingula lifuundikho liliikhola khasesaba, aabawo khuunikina khwe kamaani khu shiibala. Inyaanga yekyela imali tii, nga imbilu. Ni kumweesi kwashuukha kwekyela kumubesemu nga kamafuki.

¹³Tsinieniesi khukhwaama mu ngaaki tsaakwa aasi khu shiibala ni kimiwuulo nga bibyaamo biibisi bye kusaala ku figi ni bikwa, nga imbewo yaakutengaasile.

¹⁴Likulu lyakoraanawo nga umuundu n'afuumba buurone buwulukuse waaburusawo. Buli lukiingi na buli lukoongo byaarusibwawo khukhwaama mu bifwo byabyo.

¹⁵Aabawo babaandu babeebisa mu mafuluma ni mu mabaale kakaali mu ngiingi. Babeebisa baaba bayiinga be mu shiibala, ni babaandu be angaaki, ni babaandi babaaba baakulwa ni babaakhali bakulwa ta.

¹⁶Boosi bekoontselela tsinjiinji bari, “Ni mwiitse mukhukwekho, mukhubiimbilile, nio khulekhe khubonekha mu moni tsy'oyo uwikhale khu shitsoloŋo ta. Naluundi nio mukhuwonese khukhwaama mu lirima lye Khasheese.

¹⁷Lwekhuuba shifukhu sheesi Wele ni Khasheese batsya khukhwokesanilamo lirima shoolile. Ne naanu unyala wawona shifukhu isho?”