Read lumasaaba Khubiimbulilwa 7 Bible Online

Khubiimbulilwa 7 - lumasaaba bible

Khubiimbulilwa 7

¹Lwanyuma lwa bino, naabona bamalayika bane, nga beemikhile mu koona tsine tsye shiibala. Abe bawaambile tsimbeka tsine tsye shiibala tseesi imbewo yitsila, bari nio imbewo yoosi ilekhe khuwutsa khu shiibala namwe khu nyaantsa, namwe khu misaala ta.

²Ise neelakho naabona malayika ukuundi nga enyukha khukhwaama ibwaamanyaanga, nga ali umwirekefu khuura khaabonelo khu baandu ba Wele baalamu. Nga araambisa likono lye angaaki, malayika yuno walaanga bamalayika bataayi bane beesi Wele aawa bunyala khuukhola buubi shiibala ni likulu, nga abaloma ari,

³“Ni mulindekho! Mukhakhola buubi shiibala, namwe inyaantsa, namwe kimisaala ta, khukhwoolisa nga khwaamalile khuura khaabonelo mu bweeni bw'abo babaali babakaanisi ba Wele weefwe.”

⁴Nio nawulila bukali bw'abo beesi baarakho khaabonelo mu bweeni baabwe. Abe boola kimyeeka liikhumi na kine, ni bikana bine (144,000). Nga boosi baama mu buli shikuuka she ba Isiraeli.

⁵Khukhwaama mu shikuuka sha Yuda, babaandu beesi baarakho khaabonelo baaba kumukaanda mutweela ni bikana bibili (12,000). Khukhwaama mu shikuuka sha Rewubeni, beesi baarakho khaabonelo, baaba kumukaanda mutweela ni bikana bibili (12,000). Ni khukhwaama mu shikuuka sha Gadi baaba kumukaanda mutweela ni bikana bibili (12,000).

⁶Babaama mu shikuuka sha Asheri, baaba kumukaanda mutweela ni bikana bibili (12,000). Ni bikuuka bino: sha Nafutaali baaba kumukaanda mutweela ni bikana bibili (12,000), sha Manase baaba kumukaanda mutweela ni bikana bibili (12,000),

⁷sha Simeoni baaba kumukaanda mutweela ni bikana bibili (12,000), sha Levi baaba kumukaanda mutweela ni bikana bibili (12,000), sha Isaakali baaba kumukaanda mutweela ni bikana bibili (12,000),

⁸sha Zebuloni baaba kumukaanda mutweela ni bikana bibili (12,000), sha Yusufu baaba kumukaanda mutweela ni bikana bibili (12,000), sha Benyamini baaba kumukaanda mutweela ni bikana bibili (12,000).

⁹Lwanyuma lwa bino nabona lituuli lye babaandu babaakhabalikha ta. Babaandu bano abe baama mu buli linaambo, mu buli ifwani, mu buli shikuuka naluundi mu buli lulimi. Abe bemikhile mu moni tse shitsoloŋo naluundi mu moni mwe Khasheese. Abe bakwaarire bikwaaro biwaanga, nga bawaambile kamashendu mu mikhono kyaabwe.

¹⁰Abe balikho bayokesela angaaki bari, “Wele weefwe uwikhaale khu shitsoloŋo niye umuwonesi weefwe, naluundi Khasheese nikho khakhakhuwonesa ifwe.”

¹¹Ni abweene awo, bamalayika boosi abe babeemile khu ngaaki nga babotookheleele shitsoloŋo, ni basakhulu, ni tsisolo tsana tsine, beyalisa aasi, befumalikha mu moni tsye shitsoloŋo, besaaya Wele.

¹²Baamwisaaya nga baloma bari, “Amiina! Tsikhabi, ni shiriifwa, ni kamakyesi, ni khuusiima, ni lukoosi, ni bunyala, ni buwuli bibe isi Wele, biilo ni biilo, Amiina!”

¹³Kila mutweela khu basakhulu wandeeba shireebo ari, “Banaanu babakwaarire bikwaaro biwaanga bano? Wamanyile esi baama?”

¹⁴Nase namwiilamo indi, “Musakhulu, manya iwe waamanyile n'umboolele.” Waanoma ari, “Babaandu bano nibo babaamala khuubira mu bikosi bikali naabi. Bikwaaro byaabwe bili biwaanga lwekhuuba baamala khuubisiingila mu mafuki ke Khasheese.

¹⁵“Nashiryo isho shishikila kumuusi ni mu shilo beema mu moni tsye shitsoloŋo sha Wele, nga bamwisaaya. Ni n'oyo uwikhala khu shitsoloŋo abatseeta nga araambisa kamaani keewe.

¹⁶Babeene abo, intsala namwe bulesa, si bilibalya luundi ta.

¹⁷“Lwekhuuba Khasheese khakhaali akari we shitsoloŋo, khaliba niye umukayi waabwe. Khasheese khalibaayisa khukhwoolisa ni khalibayila khu sebele tsye kameetsi kakareera buulamu. Ni Wele alibeeya kamasika khukhwaama mu moni tsabwe.”