Read lumasaaba Khubiimbulilwa 8 Bible Online

Khubiimbulilwa 8 - lumasaaba bible

Khubiimbulilwa 8

¹Khasheese nikhaaba nga khatingula lifundukho liliikhola musaafu, aabawo khuusila mwikulu khuumala aambi shisiintsa she saawa.

²Abweene awo ise nabona bamalayika musaafu babaabuya nga beemikhile mu moni tsa Wele. Kila babawa tsikhoombi musaafu.

³Lwanyuma malayika ukuundi weetsa weemikha isi shisheeso shili. Abe ali ni shibuumba she khukhwokhelamo bubaani, nga shili she izaabu. Kila bamuwa bubaani buno bukali, bari atubaasile atweela ni khuloomba khwe bakhosefu mu shibuumba isho, nga weemikhile ibweeni we shitsoloŋo.

⁴Lisuusi lye bubaani ubwo lyetuukha nga lyaama mukhono mwa malayika uyo, lyaniina atweela ni khuloomba khwe bakhosefu, byaatsya isi Wele.

⁵Lwanyuma malayika uwatsana waabukula shibuumba tsana she khukhwokhelamo bubaani, wetsusamo kumulilo kweesi abukula khukhwaama khu sheeso, kila ashikholowa aasi khu shiibala. Abweene awo abawo khukuula khukali, ni kamakono, ni khumulikhaka khwe tsimbeni, ni khutengaala khwe shiibala.

⁶Khu mbuka iyo, bamalayika musaafu batsana babaaba ni tsikhoombi, beŋoonaŋoona khutsifuura.

⁷Malayika uwanyoowa wafuura ikhoombi iyeewe. Khaangukho, kamararara ni kumulilo byeetsa, nga byatubaanile ni kamafuki. Bino byakwa khu shiibala. Bino byoosha shisiintsa shitweela she khaataru she shiibala shoosi, byoosha ni shisiintsa shitweela she khaataru she bisaala, ni bunyaasi bubisi bwoosi nabwo bwasha.

⁸Lwanyuma malayika ukhola khabili wafuura ikhoombi yeewe. Abweene awo shishiindu shishifwaana nga lukiingi luboofu luluwaambile kumulilo, shatuumibwa mu nyaantsa.

⁹Kila shisiintsa shitweela she khaataru she inyaantsa shikyela kamafuki. Shisiintsa shitweela she khataru she bibiili ni bulamu bibimenya mu nyaantsa byafwa. Ni shisiintsa shitweela she khataru she kamakhoŋolo konakisibwa.

¹⁰Malayika ukhola khataru wafuura ikhoombi yeewe. Kila kunieniesi kuboofu kukweene, nga kumulikha nga kutoki, kukwa aasi khukhwaama mwikulu. Kuno kwakwa khu shisiintsa shitweela she khataru she tsintsitsi ni tsisebele.

¹¹Lisiina lye kunieniesi ukwo bari Kimilesi kikyaluluwa. Ni shisiintsa shitweela she khataru she kameetsi shakalukha shaluluwa. Babaandu bakali baafwa, lwekhuuba abe kameetsi kekyelile kamalulu.

¹²Lwanyuma malayika ukhola khane wafuura ikhoombi yeewe. Kila shisiintsa shitweela she khataru she inyaanga shaminiangukha, ni she kumweesi, ni she tsinieniesi. Shino shakila shishilima shawaamba shisiintsa shitweela khu she khataru shabyo, abe isi buwaanga bwaba. Shisiintsa shitweela she khataru she shifukhu shalekha khuba ni buwaanga ta, akhaba shisiintsa shitweela she khataru she mu shilo nasho.

¹³Ne ni nalola, nabona luundi nawulila nga ikhosi abe ili khupamburukhila mu ngaaki, nga ilangilila ni likono lye angaaki iri, “Kumutaambo, kumutaambo, kumutaambo isi abo boosi babamenya khu shiibala, nga kamakono ke tsikhoombi tseesi bamalayika bataru bali aambi khufuura, nga kawulilikhaane!”