Read lumasaaba Khubiimbulilwa 9 Bible Online

Khubiimbulilwa 9 - lumasaaba bible

Khubiimbulilwa 9

¹Lwanyuma malayika ukhola kharaano waafuura ikhoombi yeewe. Ise nabona nga inieniesi yakwiile khu shiibala aasi khukhwaama mwikulu. Kila bawa malayika uyo shifuungo shishikula kumwanda kukuutsya aasi imakoombe.

²Malayika uyo wekulawo kumwanda kukuutsya aasi imakoombe. Lisuusi lyarura khukhwaama mu mwanda ukwo likali nga lilyaama mu mukuba kumuboofu. Lisuusi lilyaama mu mwanda ukwo, lyakila inyaanga ni imbewo byekyela bimali.

³Ari tsisike tsaama mu lisuusi ilyo tseetsa khu shiibala. Batsiwa bunyala bubwoola nga ubwo bweesi kimiremu kimiboofu kili ni nabwo khu shiibala.

⁴Tsisike tsino baatsilomela khuulekha khukhola buubi bunyaasi, namwe shishiindu shoosi khu shiibala namwe shishiindu shoosi shibisi, namwe shisaala shoosi ta. Ne akhali khukhwoonakisa babaandu babaakhaaba ni khabonelo kha Wele mu bweeni bwaabwe bonyene.

⁵Tsisike tsino baatsifukiilisa khuukholisa babaandu shiisa khuumala kimyeesi kiraano. Ne sibaatsifukiilisa khukhwiira babaandu ta. Isaambo isi tsabakholisamo shiisa abe ili busa nga umuundu n'akhola shiisa nga wanami waamulumile.

⁶Ni mu bifukhu ibyo babaandu balihentsa khuufwa, ne sibalikhunyoola ta. Balikana naabi bari bafwe, ne khuufwa khuliilukha khukhwaama isi bali.

⁷Ne mu khubonekha khwatso, tsisike itsyo tsafwaanana nga tsiŋwaaŋwa tseesi bamalile khurengekharengekha khuutsya mu busoolo. Khumirwe khwatsyo khwabakho bibyabonekha nga kamahabi ke izaabu. Mu moni mwatso mwafwaanana nga mu moni mwe babaandu.

⁸Litsuune lyatso lyafwaanana nga litsuune lye bakhasi, ni kameeno kaatso abe kafwaanana nga kameeno ke tsitalanyi.

⁹Ni khu bifuba khwatso khwaba khwabiimbibwilekho ni bibiindu bibifwaanana nga ingabo iye shiibya. Abe tsindaha tsatso tsilikho tsikhupa liyoombo liliili nga lye tsiŋwaaŋwa tsingali ni tsilikho tsikhweesa kamakaari kamakaali, nga tsitima tsitsya mu busoolo.

¹⁰Tsili ni kimishinga nga kya wanami ni tsimboola tsatso tsili nga tsya wanami. Mu mishinga kyatso mwabamo tsimboola tsitsaba ni kamaani ke khukhola buubi babaandu khumala kimyeesi kiraano.

¹¹Malayika uwe imakoombe ali niye umuyiinga watsyo utsiwula. Nga lisiina lyeewe mu lulimi Luheburaniya bari, “Abadoni,” ne mu Luyonaani bari, “Apoleno.”

¹²Ingunyi ingiboole yaabirire. Ne bona ishiiliyo tsingunyi tsitsiindi tsibili tsitsiitsya khwiitsa.

¹³Lwanyuma malayika ukhola khasesaba wafuura ikhoombi yeewe. Kila ise imbulila likono nga lyaama mu maande tsoosi tsine, tse shisheeso she izaabu shishaba ibweeni wa Wele.

¹⁴Likono ilyo lyalomela malayika ukhola khasesaba uwaba n'ikhoombi uyo liri, “Lekhuula bamalayika bane batsana abo, beesi babowela khu luutsi luboofu Efulati.”

¹⁵Kila bamalayika batsana abo bane, abe beesi barekekha khulwe isaawa iyo, ni khulwe shifukhu isho, ni khulwe kumweesi ukwo, ni khulwe kumwiiko ukwo, balekhuulibwa, khukhwiira shisiintsa shitweela she khataru she babaandu khu shiibala.

¹⁶Nio naawulila bukali bwe basilikhale nga ni bwaba. Basilikhale babaaba nga bakyeendela khu ŋwaaŋwa abe mu bukali boola tsifuuma bitoondo bibili (200,000,000).

¹⁷Ni nafwaana nga uli mu marooro, tsiŋwaaŋwa tsino tsambonekhela musaambo yino: abe babeekhaale khu ŋwaaŋwa tsana bakwaarire bikwaaro bye bibyuuma, nga bibonekha iraangi nga iye kumulilo. Naluundi nga bibonekha iraangi imbesemu, iye bunoro. Kimirwe kye tsiŋwaaŋwa itsyo abe kifwaana nga kimirwe kye tsitalanyi. Abe kumulilo ni lisuusi ni bunoro bilikho birura khukhwaama mu khanwa mwatso.

¹⁸Khulwe tsindwaale tsino tsitaru, iye kumulilo, ni iye lisuusi, ni iye bunoro, nga tsoosi tsaama mukhanwa mwe tsiŋwaaŋwa, shisiintsa shitweela she khataru she babaandu khu shiibala baafwa.

¹⁹Kamaani ke tsiŋwaaŋwa itso kaaba mukhanwa mwatso, ni mu mishinga kyatso mwabamo buutwa nga bwe tsindemu, nga tsiraambisa kimishiinga ikyo khuukhola buubi khu babaandu.

²⁰Babaandu babaaramilewo khu shiibala beesi tsindwaale tsino tsikheera ta, baalekha khukhwibiiyisa ta. Baalekha khukhwibiiyisa bikholwa byaabwe biibi ta, ni khukhwisaaya kimisaambwa kimibi, ni khukhwisaaya bifwaani bye izaabu, ni bye ifeeza, ni bye birere, ni bye kamabaale, ni bye bisaala. Baryo beloosela khukhwisaaya bibiindu bibikhalimo bulamu ta, bibikhanyala khubona, namwe byawulila, namwe khukyenda ta.

²¹Naluundi baloba khukhwibiiyisa khulwe bubwiiri bwaabwe, ni khulwe bulosi bwaabwe, ni khulwe buyeyani bwaabwe, ni khulwe bubwiifwi bwaabwe ta.