Read lumasaaba Ruse 4 Bible Online

Ruse 4 - lumasaaba bible

Ruse 4

¹Aryo Bowazi waatsya wekhala aambi ni shilibwa she shiriimba shaabwe, isi baabuusanatsakila. Nga ali awo, umulebe wa Elimeleki isi aalomakho tsana weetsa. Bowazi waamulaanga nga amulomela ari, “Mulebe, yiitsa ano khubone, wikhale aasi.” Naye aryo weetsa wekhala aasi.

²Ndi luundi Bowazi waalolayo basaani baasakhulu be shiriimba isho likhumi, waabaloma ari, “Nimwiitse mwikhale ano.” Nabo baryo beetsa bekhala aasi.

³Kila alomela umulebe uyo ari, “Nawomi nga n'akoboole khukhwaama mu shibala sha Mowabu, ali khuukana khuukulisa liiswa lilyaba ly'omulebe weefwe Elimeleki.

⁴Shikila ise mbeele nambaasa ndi ishikhuboolelekho. Lwekhuuba iwe nga uli umulebe we muungo, uli ni buunyala khuulikula mu lubuula mu moni tse babekhali babekhaale ano, ni moni tse baasakhulu baakhulu be mu shiriimba shino. Nga waanyalisile khuulikula, ulikule. Ne nga waakhunyalisana ta, umboolele ari ishimanye, lwekhuuba mbaawo umuundu ukuundi akhali iwe, namwe ta ise.” Umulebe uyo weelamo ari, “Kane indikule.”

⁵Kila Bowazi amuboolela luundi ari, “Imbuka isi ukulila liiswa ilyo khukhwaama khu Nawomi, uba uyila ni Ruse, namulekwa w'omufu, uwaama i Mowabu. Nio shinyalikhe khuukoboselawo umufu lisaaye ni lwe khuuliinda bibiindu byeewe.”

⁶Shikila umulebe uyo elamo ari, “Ari nga shili shiryo, ise siinanyalisa khuukula liiswa ilyo ta, lwekhuuba shinyala shantsonakisila ise bye buusikha bwase bubweene. Ari iwe n'ulikule, lwekhuuba ise naakhaasikhile.”

⁷Mu biseela ibyo mu Isiraeli, mu bye ngulaana bye buusikha ni khuukumisa ingulaana iyo, umuundu uukulisile abe enyusamo shilaalo sheewe, waashiwa ukuundi khuuba nga she khuuŋaŋasa shiri bibiindu byaaweele.

⁸Nashiryo nga umulebe uyo n'alomela Bowazi ari, “Iwe wamweene n'ulikule,” enyusamo shilaalo sheewe waashiwa Bowazi.

⁹Kila Bowazi alomela baasakhulu be shiriimba ni babaandu babaandi boosi babaabawo ari, “Shaleelo shino, inywe muli baaboni muri ise naakulile bibiindu byoosi bibyaba bya Elimeleki khukhwaama khu Nawomi, ni neebyo bibyaba bya Kiliyoni, ni bibyaba bya Maloni.

¹⁰Ni khuutubakho Ruse uwe Mowabu, uwaba mukha Maloni, khuuba umukhasi wase. Shino kane shiyeete khuuliinda busikha bwe muungo, ni lisiina lyooyo uwafwa khulekhe khuliibilila mu shiriimba shino ta. Inywe mweesi shaleelo shino muli baaboni.”

¹¹Babaandu boosi babaabawo khu shilibwa ni baasakhulu baaloma bari, “Ifwe khuli baaboni. Naluundi khuloomba khuri khali Umukasya aweele umukhasi yuno uuli khukhwiitsa mu ntsu yoowo lisaaye lye babaana, nga Rakeli ni Leya ni baasaalila Yakobo babaana baakali. Khuloomba khuri khali ubeele umusaani umuyiindifu mu shikuuka sha Efurasi, uba umusaani umanyikhaane naabi mu Beselehemu.

¹²Khali Umukasya akhuweele babaana khuubirira mu mukhasi yuno, ni muungo mwoowo muba nga mwa Perezi, umwaana wa Tamari ni Yuda.”

¹³Aryo Bowazi waayila Ruse wekyela umukhasi weewe. Umukasya waamuwa ikhabi iye khukhwakaanila, waaba shisoombo wasaala umwaana umusiinde.

¹⁴Bakhasi be mu shiriimba baalomela Nawomi bari, “Umukasya asiimibwe naabi! Shaleelo shino, bona waakhuweele umwitsukhulu ukane akhulolelele. Khuloomba khuri khali atsowele aba umanyikhaane naabi mu Isiraeli mwoosi.

¹⁵Umwaana yuno aliiba nga niye ukhukobosamo iwe kamaani, luundi nga niye ukhuliisa iwe mu makoro koowo. Lwekhuuba niye ali umwaana w'omukhaana woowo umumasaala ukhukana naabi, naluundi niye akhukana naabi khuuminyisakho ni babaana basooleli musaafu.”

¹⁶Aryo Nawomi waakana naabi umwaana uyo, waamuyila waaba niye umulesi weewe khuumulolelela.

¹⁷Bakhasi babesanwa ba Nawomi baatwiikha umwaana lisiina bari Obedi, nga baloma bari, “Nawomi waasaalile umwaana umusiinde.” Obedi yuno niye uwaba paapa wa Yese, ni Yese nga niye paapa wa Dawudi.

¹⁸Luno nilwo luruungo lwe babetsukhulu ba Perezi: Perezi aaba paapa wa Hezironi,

¹⁹Hezironi paapa wa Ramu, Ramu paapa wa Aminadabu

²⁰Aminadabu paapa wa Nahashoni, Nahashoni paapa wa Salumoni,

²¹Salumoni paapa wa Bowazi, Bowazi paapa wa Obedi,

²²Obedi paapa wa Yese, Yese paapa wa Dawudi.