Read lumasaaba 1 Samweli 1 Bible Online

1 Samweli 1 - lumasaaba bible

1 Samweli 1

¹Aabawo umusaani mutweela lisiina lyeewe bari Elukaana uwamenyatsaka mu shiriimba Ramatayimu Zofimu, mu shibala she mu ngoongo sha Efurayimu. Elukaana aaba umwaana wa Elihu, Elihu naye umwaana Tohu, Tohu umwaana Zufu uwe mu shikuuka sha Efurayimu.

²Elukaana aaba ni bakhasi beewe babili, nga mutweela lisiina lyeewe bari Hana, n'ukuundi bari Penina. Penina aasaala babaana, ne Hana s'abakho n'umwaana namutweela ta.

³Abe buli mwiiko Elukaana aama mu shiriimba she waabwe waatsya i Shilo, khukhwisaaya ni khuuwaanayo tsisaayilo isi Umukasya, Umunyali wa byoosi. I Shilo iyo, Eli niye uwaba umusaayi umukhulu ni basoleeli beewe babili nga nibo Hofuni ni Finehasi nibo babaaba basaayi isi Umukasya.

⁴Abe khu buli shifukhu khweesi Elukaana aba nga awaanayo isaayilo, nga awa umukhasi weewe Penina bisiintsa bye nyama iye khuuwaanayo, n'isi buli mutweela khu baana beewe, besiinde ni bakhaana.

⁵Ne isi Hana abe amuwa shisiintsa shitweela shonyene sha buraawa, yakhaba nga abe amukana naabi, lwekhuuba abe Wele waamukhola khuuba umukuumba.

⁶Ni lwelomo yino iye khuuba umukuumba, wangooye Penina abe akhola bibiindu biibi biikali khuumukhalasa.

⁷Shino shabatsaka shiryo buli mwiiko, abe buli lweesi batsiila mu ntsu y'Omukasya khukhwisaaya. Abe Penina akhola shoosi khuubona ari amukhalasa. Shino shaakila Hana waalilatsaka kamasika, waalekha khunyalisatsaka ni khuulya ta.

⁸Kila Elukaana umuseetsa weewe amureeba ari, “Hana, lwashiina ulilatsaka? Lwashiina uloba khuulya biilyo? Iwe lwashiina uli ni kumutaambo kumukali mu mwoyo kwoowo? Iseese s'indi uwe kumukaso naabi is'uli khufuurisa khuuba ni basooleli likhumi?”

⁹Shifukhu shitweela, nga baamalile khuulya ni khuunywa mu ntsu y'Omukasya i Shilo, Hana wenyukhawo waatsya khuloomba. Khu mbuka iyo, umusaayi Eli aaba wekhaale khu shitsoloŋo amulyaango kukwiinjila mu shifwo she khukhwisaayilamo.

¹⁰Hana abe wetsuule kumutaambo mu mwoyo kweewe, waaloomba nga alila kamasika luukali.

¹¹Aryo weyama mu mwoyo kweewe nga aloma ari, “O Umukasya, Umunyali wa byoosi, iwe ni kane undoleleele ise umukhaana woowo ni shiisa, ubone kumutaambo kwase, ushebulile ise ulekhe khukhuuntsibilila ta, ne waamba ise umwaana umusiinde. Ise ndimuwaanayo is'uli buulamu bweewe bwoosi, ni litsuune lyeewe sibalilibekakho ta.”

¹²Hana weloosela khuuloomba aryo mu mwoyo kweewe mu mbola busa khuumala imbuka ndeeyi. Ne Umusaayi Eli waaba nga amwofwaasa kiminwa kyeewe.

¹³Hana aaba nga ali khuuloombela mu mwoyo kweewe busa, ni kiminwa kyeewe kyaaba nga kinyukhanyukha, ne nga mbaawo likono liliwulilikha ta. Kila Eli waambaasa ari waameelile.

¹⁴Kila Eli amureeba ari, “Iwe ulyoolesa eena khukhwimeesameesa uryo? Yaakamisa khuunywa iviini ukirurekho!”

¹⁵Ne Hana waamwiilamo ari, “Taawe Musakhulu, ise naakhumeelakho ta. Ise ndi umukhasi uuli ni kumutaambo kumukali naabi mu mwoyo kwase, naakhunywakho iviini namwe shishimeesa shoosi ta. Ne imbeele nga ndi khuuloomba imbuka yino yoosi, nga imboolela Umukasya bikosi bibiili mu mwoyo kwase.

¹⁶Ukhaambila ise umukhaana woowo, khuuba umukhasi umumoyaani ta. Imbeele ndi khuuloomba ndyo lwe kumutaambo kwase kumukali ni ngunyi.”

¹⁷Lwanyuma kila Eli amwiilamo ari, “Ari n'utsye ingo woowo ni lukoosi. Khali Wele wa Isiraeli akhuweele sheesi ubeele uloomba.”

¹⁸Hana naye weelamo ari, “Ise umwakaanisi woowo, khali inyoolatsakile shiisa mu moni tsoowo.” Aryo Hana waarurawo waatsya, waalya biilyo, nga s'ashiili ni kumutaambo luundi ta.

¹⁹Khu shifukhu shisheelakho kumutikhinyi, Elukaana ni be muungo mweewe benyukha, baamala khukhwisaaya Umukasya, baakobolayo iwaabwe mu Rama. Elukaana wetubaasa ni Hana umukyelama weewe, ni Wele waabeelamo khuuloomba khwaabwe.

²⁰Ni abweene awo Hana waahesa, waaba shisoombo. Ni mbuka ni yoola, waasaala umwaana umusiinde waamutwiikha lisiina Samweli, lwekhuuba aaloma ari, “Namuloomba khukhwaama isi Wele.”

²¹Imbuka ndi ikiindi niyoola, Elukaana ni be muungo mweewe beelayo i Shilo khuuwaanayo isaayilo iya buli mwiiko isi Umukasya, ni khukhwoolelesa isho sheesi aasuubisa.

²²Ne Hana niye s'atsya khu muluundi kuno ta, lwekhuuba aalomela umuseetsa weewe Elukaana ari, “Ise khaniinde khukhwoolesa nga naarusile umwaana khu mabeele, nio imusute imuyile mu ntsu y'Omukasya.”

²³Kila Elukaaana umuseetsa weewe amwiilamo ari, “Iwe n'ukhole sheesi ubona uri shifuura buulayi, uliinde khukhwoolesa nga waarusile umwaana khu mabeele. Nase isuubila ndi Wele kane akhuyeete khukhwoolelesa mu sheesi wamusuubisa.” Aryo Hana waarama ingo, nga anuunisa umwaana weewe khukhwoolesa n'amurusa khu mabeele.

²⁴Aryo lwanyuma lwe khuumurusa khu mabeele, waamuyila i Shilo, nga atsya ni iwuunwa iyoolesa kimiiko kitaru kye buukhulu, ni shishiipo she buufu, ni iwootswa iye lihaafu, iyitsuulemo iviini. Hana aayila Samweli abe akhaba nga aaba ashiili mukyeekhe, waamureera mu ntsu y'Omukasya.

²⁵Baryo lwanyuma lwe khuukhoonya iwuunwa tsana, baareera umwaana isi Eli.

²⁶Kila Hana aloma ari, “Musakhulu, nga isi iwe ushiili mulamu, ushebulila uri ise niye umukhasi uwemikha ano mu moni tsoowo, nga inoomba isi Umukasya.

²⁷Naloomba Umukasya khukhuumba umwaana. Ari niye uyushiina! Umukasya waayiimba umwaana nga isi namuloomba.

²⁸Ni nashiryo ari ise ndi khuumuwaanayo isi Umukasya, ni naye kane abatsake uw'Omukasya biifukhu byoosi bye buulamu bweewe.” Baryo besaayila Umukasya ibweene iyo.