Read lumasaaba 1 Samweli 12 Bible Online

1 Samweli 12 - lumasaaba bible

1 Samweli 12

¹Ulwo Samweli waakanikha isi ba Isiraeli boosi ari, “Ise narekeeresa likono lyeenywe naabawa umuyiinga nga ni mwaloomba.

²Ari bona muli n'umuyiinga nga umuraangilisi weenywe. Ise imbeele umuraangilisi weenywe khukhwaama mu busooleli bwase khukhwoolesa shaleelo, ne bona ari indi umusakhulu naluundi naarura tsiifwi, ni basooleli baase boosi bali ano ni nanywe.

³Ari bona ise ndi ano nga imbareeba ndi naanu khwiinywe isi nanuulakho iyeeyi yeewe? Namwe naanu isi nabukulakho isikilya yeewe? Naanu isi ise nalyaakhanakho? Namwe naanu isi ise namiinilisakho? Iliwo umuundu yeesi isi ise nalyakho iwoongo nio ikhale kumusaango kukukhalimo ta? Ari ngana muntsilemo nga Umukasya n'umuyiinga weewe umurobole baawuliilisile. Ni nase nga iliwo shitweela khwiibyo byeesi nakhola, kane imbikoboseyo.”

⁴Ba Isiraeli boosi nabo beelamo bari, “Taawe, iwe waakhulyakhanakho, namwe waakhumiinilisakho umuundu yeesi, namwe khuuyilakho shishiindu sh'omuundu yeesi ta.”

⁵Samweli ndi waabaloma ari, “Umukasya n'umuyiinga weewe umurobole nibo baaboni khuuwandalasa byeesi mulomele.” Babaandu nabo beelamo bari, “E e, isho shaŋali, Umukasya niye uuli umuboni weefwe.”

⁶Lwanyuma Samweli weloosela nga aboolela babaandu ari: “Umukasya niye uwarusa bakuuka beenywe khukhwaama mu Misiri, naluundi niye uwarobola Musa ni Aroni khuuba baaraangilisi baabwe.

⁷Umukasya umweene niye ari utsya khuukhalawo. Ari nimwiimikhe isi muli murekeerese, nga ise imbashebusa isaambo isi Umukasya aabawonesamo inywe ni bakuuka beenywe khukhwaama isi baasiku beenywe.

⁸Lwanyuma lwa Yakobo khuutsya i Misiri, ni ba Misiri baabamiinilisa, isho shaakila bakuuka beenywe abo baalilila Umukasya lwe buyeeti. Isho shaakila Umukasya waarumana Musa ni Aroni, babaatsya baaraangilila bakuuka beenywe khuubarusa i Misiri, baabareera mu shifwo shino she khuumenyamo.

⁹Ne bakuuka beenywe bano beebilila Umukasya Wele waabwe, isho shaakila Umukasya waabahaanayo khuuwulibwa ni Bafirisitiya, n'umuyiinga wa Mowabu, ni Sisera umukhulu we liiye lya Hazori.

¹⁰Luundi ndi bakuuka beenywe baalilila Umukasya lwe buyeeti nga baloma bari, ‘Ifwe khwoonakile lwekhuuba khwaalekhile khuukhwisaaya iwe, Umukasya weefwe, khweelile khukhwakaanisa Bayaali ni Ashitoresi. Ne ari n'ukhuwonese ifwe khukhwaama mu mukhono kwe baasiku beefwe, ni nafwe kane khukhwisaayatsake iwe.’

¹¹Lwanyuma Umukasya waarumana Gidiyoni[4], Bedani, Yefusa, ni Samweli, khuubawonesa inywe khukhwaama isi baasiku beenywe, ni nanywe muryo mwamenyatsake mu lukoosi akhali khuurya ta.

¹²Ne inywe ni mwabona nga umuyiinga Nakashi uwe ba Amoni ali aambi khuubebwakala, mwaanomela ise muri, ‘Khukana umuyiinga ukane akhuraangilile ifwe,’ abe ikhaba nga Umukasya Wele weenywe niye umuyiinga weenywe.

¹³Ari umuyiinga isi mwaloomba, naluundi mwaloonda uyu shiina, mweesi mumubona. Umukasya umweene niye uwamubawa khuubawula inywe.

¹⁴Ne inywe atweela n'umuyiinga weenywe ni kane mube baloondeleli balayi b'Omukasya Wele weenywe, mumwisaayatsake niye yenyene nga muloondelela kamakaambila keewe, byoosi kane bibe biilayi naabi isi inywe.

¹⁵Ne nikane muminyaale khuulekha khuwulila kamakaambila k'Omukasya weenywe, naye aryo kane abashuukhekho, inywe n'umuyiinga weenywe nga nishaba isi bakuuka beenywe.

¹⁶Nashiryo ari inywe nimwiimikhe busa ano mubone shishiindu shikhulu sheesi Umukasya weenywe atsya khukhola nga mweesi mubona.

¹⁷Ari imbuka yino shiili iye shimiyu? Ari ise ntsya khukhwikoontselela Umukasya asiindikhe khukuula khwe fula ni fula. Ni nanywe nga mwashiboone nio mwimanye bubwoonaki bweenywe nga ni buli bukali bweesi mwakhola lwe khuukana khuuba n'umuyiinga.”

¹⁸Kila abweene awo Samweli waaloomba, ni khu shifukhu sheene isho, Umukasya waasiindikha khuukuula khwe fula ni fula. Ni abweene awo buli muundu waarya naabi Umukasya atweela ni Samweli.

¹⁹Baryo babaandu boosi kila baloma Samweli bari, “Khuloombelekho isi Umukasya Wele khulweefwe, nio khulekhe khuhela ta. Lwekhuuba ifwe khwayoneka naabi mu biseela bye nyuma iyo, ni naari khwalooselekho shishoonako shino she khuuloomba umuyiinga.”

²⁰Samweli kila abaloma ari: “Inywe mukharya ta. Abe yakhaba nga mwaakhola shishoonako shino shoosi, mukhaakamisa khuuloondelela Umukasya ta, ne ni mumwisaayatsake ni kumwoyo kweenywe kwoosi.

²¹Mukhatsya mwesaaya bifwaani ibyo bibikhalimo ta. Lwekhuuba nibyo sibili ni kamaani kakanyala kaabayeeta inywe, namwe byaabawonesa nga muli mu bukosi ta, lwekhuuba nibyo mbaamo shishiyeeta ta.

²²Umukasya umweene waakhalawo khuubarobola inywe khuuba babaandu beewe babeene. Nashiryo kane abaliinde inywe khukhwookesa buli mutweela ari niye ali uwe kamaani.

²³Ni nase kane imbe nga iminyaalila Umukasya siinga naakamisa khuubaloombela inywe. Kane niloosele khubaboolelela isaambo iye khuukhola biilayi naluundi bitsalaafu.

²⁴Ne inywe ni mubonele ilala muri murya Umukasya, naluundi mumwisaayatsake niye ni kumwoyo kweenywe kwoosi. Naluundi mushebulilatsake bibiindu bikhulu byeesi niye abakholela inywe.

²⁵Ne inywe atweela n'umuyiinga weenywe ni kane mwiloosele khuukhola bye bubwoonaki, Umukasya kane abahese mweesi.”