Read lumasaaba 1 Samweli 16 Bible Online

1 Samweli 16 - lumasaaba bible

1 Samweli 16

¹Shifukhu shitweela, Umukasya waalomela Samweli ari, “Kane woolese eena kumutaambo khuukhuwaambila Saulo? Iwe waamanyile uri ise naamwikaanile niye khuuba umuyiinga wa Isiraeli. Aluno bukula lulwiika lwoowo ulwitsusemo kamafura, utsye isi umusaani isi balaanga bari Yese, uumenya mu Beselehemu. Ise naaroboole mutweela khu basooleli beewe khuuba umuyiinga.”

²Samweli naye weelamo ari, “Ise inyala ndyeena khuutsyayo? Saulo nga waashiwuliile anyala khukhuuntsira.” Ne Umukasya waamwiilamo ari, “Bukula ikhaafu imasoti utsye ni nayo, uboolele babaandu uri, uli khuutsya khuwaanayo isaayilo isi Umukasya.

³Lwanyuma ulaange Yese naye khukhwiitsa khuuwaanayo, ni nase kane ikhwookese shiina she khuukhola. Kane ikhwookese mutweela khu basooleli beewe isi indoboore, umutsukhekho kamafura khu murwe kweewe.”

⁴Aryo Samweli waakhola byeesi Umukasya aamulakila khuukhola, waatsya i Beselehemu. Baaraangilisi be shiriimba beetsa khuumwakaanana, ne baaba nga baariire naabi. Kila bamureeba bari, “Khukhwiitsa khwoowo khuno khuli khwe lukoosi?”

⁵Samweli naye waabeelamo ari, “E e, khukhwiitsa khwase khuli khwe lukoosi. Ise neetsile khuuwaanayo isaayilo isi Umukasya. Ni nashiryo, ni mwiŋoonaŋoone mwabeene, mwiitse mwitubaase ni nase.” Aryo walaanga Yese ni basooleli beewe, waabaŋoonaŋoona lwe khuuwaanayo isaayilo.

⁶Ne Yese ni basooleli beewe ni boola, Samweli waabona Eliyabu, umusooleli wa Yese umukhulu, kila eyambaasa mu mwoyo kweewe ari, “Ilala, uyu akhiile khuuba nga niye isi Umukasya erobooleele.”

⁷Ne Umukasya waaloma Samweli ari, “Ukhemalila khu mbonekha ya Eliyabu iye khu ngaaki, namwe buuleeyi bweewe, namwe lwe khuubonekha buulayi khweewe ta. Lwekhuuba ise naamulobile. Babaandu nibo balolelela khu ngaaki busa lwe mbonekha, ne Umukasya niye abona bibiili mukari mu mwoyo kw'omuundu.”

⁸Lwanyuma Yese waalaanga umusooleli weewe Abinadabu khuutsya isi Samweli. Ndi luundi Samweli waaloma ari, “Taawe, ni nayuno Umukasya akhumurobola ta.”

⁹Lwanyuma ndi Yese waalaanga umusooleli weewe Shama khuutsya isi Samweli. Ndi luundi Samweli waaloma ari, “Ni nayuno Umukasya akhumurobola ta.”

¹⁰Aryo Yese waarumanisa basooleli beewe musaafu boosi khukhwiitsa isi Samweli. Ndi Samweli waalomela Yese ari, “Khu bano boosi mbaawo namutweela isi Umukasya aroboolekho ta.”

¹¹Lwanyuma kila Samweli areeba Yese ari, “Bano nibo basooleli boowo babaaliwo bonyene?” Yese welamo ari, “Yaaramileyo mutweela yenyene ufuura bukyeekhe, ne ari ali mu maayilo ayisa kamasheese.” Samweli waamulomela ari, “N'umurumanise eetse ano. Ifwe singene khurakikhe kumukholo kuno nga niye ashiili khukhwoola ano ta.”

¹²Aryo Yese waarumanisa Dawudi khukhwiitsa. Dawudi aaba umushishifu buulayi, nga abonekha buulayi naabi, ni tsimoni tseewe nga tsimelamela. Nga alyoolelewo, Umukasya waalomela Samweli ari, “Uyo niye. Yinyukha aasi, umutsukhekho kamafura khu murwe kweewe.”

¹³Lwanyuma Samweli wenyukha, waatsukha kamafura khu murwe kwa Dawudi, nga bandaaye boosi babona. Ni abweene awo, Umwoyo w'Omukasya waamwiikhakho ni kamaani kamakali, waamenyatsaka ni naye khukhwaamila khu shifukhu sheene isho. Aryo Samweli wenyukha waakobolayo i Rama.

¹⁴Ari Umwoyo w'Omukasya aaba waarura khu Saulo, ni shisaambwa shiibi khukhwaama isi Umukasya shaaba nga shimutaambisa luukali.

¹⁵Kila babaakaanisi ba Saulo bamulomela bari, “Shino shibonekha khuuba nga shisaambwa shiibi khukhwaama isi Wele nisho shishiili khuukhutaambisa.

¹⁶O umuyiinga, n'ukhulakile ifwe khutsye khukhuweentsele umuundu umulayi unyala khukhuupila lituungu. Ari buli lweesi shisaambwa isho shikhuutsila khukhwaama isi Wele, umuundu uyo akhuupile lituungu, ni nawe uryo wiwulile buulayi.”

¹⁷Kila Saulo elamo ari, “Isho shilayi. Ni mutsye mundolele umuundu unyala khuukhupa lituungu buulayi, mumunderere ano.”

¹⁸Kila mutweela khu bakaanisi beewe elamo ari, “Iliwo umusaani isi balaanga bari Yese uwe Beselehemu, ali n'umusooleli unyala khuukhupa lituungu buulayi. Umusooleli uyo ali umunyindaalifu, umusoolani umulayi, abonekha buulayi, umukanikhi umulayi, naluundi Umukasya ali ni naye.”

¹⁹Kila Saulo waaruma baarume khuutsya isi Yese, bamulome bari, “N'untsakaanise umusooleli woowo Dawudi, uli umwaayi we kamasheese eetse ano.”

²⁰Kila Yese abukula isikilya, waakimemisakho kimikaati ni wootswa iye lihaafu nga yeetsuulemo iviini, ni mbusi imeeme, waabiwa Dawudi khuubiyilila Saulo.

²¹Aryo Dawudi waatsya isi Saulo waarakikha khuumwakaanisatsaka. Saulo waakana naabi Dawudi, kila amurobola niye khuuba nga niye umusutila bye busoolo byeewe.

²²Mu mbuka ifwiiti iri, Saulo ndi waarumanisa isi Yese nga amuloma ari, “N'ufukiilile Dawudi eloosele khuumenya ano ni nase, lwekhuuba imukana naabi.”

²³Khukhwaamila abweene awo, abe buli lweesi shisaambwa shiibi khukhwaama isi Wele shiitsila khuutaambisa Saulo, nga Dawudi abukula lituungu waamukhupila kumweenya. Ni abweene awo nga Saulo ewulila buulayi, ni shisaambwa shiibi nga shimwaamukha shaatsya, waaba umulayi luundi.