Read lumasaaba 1 Samweli 17 Bible Online

1 Samweli 17 - lumasaaba bible

1 Samweli 17

¹Bafirisitiya baabuusana beŋoonaŋoona, bareera liiye lyaabwe khuubuusanila i Soko, shiriimba she mu Yuda. Baryo baabuusanila mu shifwo sheesi balaanga bari Efesidamimu, akari a Soko ni Azeka.

²Umuyiinga Saulo ni ba Isiraeli beetsa atweela baabuusanila mu litila lya Ela, nga beŋoonaŋoona lwe buusoolo ni Bafirisitiya.

³Bafirisitiya baabuusanila khu lukoongo lutweela, ni ba Isiraeli nga bali lukoongo luluundi nga akari aabwe aliwo litila khuubawukhanisa.

⁴Bafirisitiya baaba n'umuselikhale naambakha umweene, isi balaanga bari Goliyasi, uwaba aama mu shiriimba she Gaasi. Niye aaba buuleeyi bweewe oolisa tsimita tsitaru.

⁵Aba waakwaara ikuutwa iya buroonzi khu murwe kweewe, ni bikwaaro bye khukhwikhiinga mu shifuba nabyo byaba bya buroonzi nga byoola busiro tsikilo kamakhumi karaano na musaafu.

⁶Ni khu bikyele byeewe nakhwo yaba waakwaarakho bye khukhwikhiinga bya buroonzi, naluundi aaba waasuta ni lifumo nalyo lya buroonzi khwiibeka lyeewe.

⁷Lifumo lyeewe lyaba liboofu naabi, nga imurwe walyo iyokiya yonyene yoola tsikilo nga musaafu. Yabaatsakawo umuselikhale uwamuraangilatsaka iburaangisi weewe nga waamusutiile ingabo yeewe.

⁸Goliyasi wenyukha werusa ibulafu, waakhupila liiye lye ba Isiraeli luutsine nga aloma ari, “Lwashiina mwiimikha mweruungikhile nga babaakana khusoolana? Inywe mwaakhumanya muri ise niye umuselikhale ufuura khuusoolana mu Bafirisitiya, ne inywe muli baakulwa ba Saulo ta? Ari nimwirobolelewo umuselikhale ufuura buurafu eetse khuusoolana ni nase khubone.

⁹Umweene uyo nikane asoolanise ise antsire, ifwe fweesi kane khube baakulwa beenywe. Ne ise nikane imusoolanise imwiire, inywe nanywe muba baakulwa beefwe.

¹⁰Ni khu mbuka yino imbasuluusa inywe mweesi baakhulu be liiye lye ba Isiraeli! Ni mwiroboleleyo umuundu unyala khukhusoolanisa ise khubone.”

¹¹Ne Saulo ni baselikhale beewe ni baawulila bilomo bya Goliyasi bino, baarya luukali naluundi beyembelela naabi.

¹²Dawudi aaba umusooleli wa Yese, uwe mu shikuuka sha Efurasa, abe umenya mu Beselehemu, shisiintsa she mu Yuda. Yese aaba ali ni basooleli shinaane, ni khu mbuka isi Saulo aabeelamo umuyiinga, aaba umusakhulu, nga wahangaale naabi mu miiko.

¹³Basooleli beewe baakhulu bataru baaba baatsiile ni Saulo mu busoolo. Kamasiina kaabwe nga niko; Eliyabu nga niye umukiboole, uwilakho nga niye Abinadabu, n'uwe khataru nga niye Shama.

¹⁴Dawudi aaba niye ufuurayo buukyeekhe. Ne nga babandaaye baakhulu bano baabatsaka ni Saulo,

¹⁵ne niye aaba atsyatsakayo isi Saulo, ne lwanyuma naakyelawo weelayo ingo mu khwaayisa kamasheese ka paapawe i Beselehemu.

¹⁶Goliyasi weetsaatsaka khuusuluusa ba Isiraeli buli kumutikhinyi na buli angoloobe, khuumala biifukhu kamakhumi kane (40).

¹⁷Shifukhu shitweela Yese waalomela Dawudi ari, “Aso suta iwootswa yino iye tsimbeleenge tsikhalaange, ni kimikaati kino likhumi, ubiyilile babaandaayo babaali iyo mu libuusanilo lye busoolo.

¹⁸Ni isi umukhulu we liiye lyoosi, umuyilile bisiintsa bino likhumi bye luboonda luno luubalakafu. N'utsye ubone babandaayo nga ni bali, lwanyuma ukobole ni shishokyesana shiri bali baalayi.

¹⁹Umuyiinga Saulo ni babandaayo, ni liiye lyoosi lye ba Isiraeli bali mu litila lya Ela, nga basoolana ni Bafirisitiya.”

²⁰Aryo Dawudi waawuliilisa byeesi paapawe amulomela, waawuuna kumutikhinyi naabi, waalekhela umwaayi ukuundi khuuliinda kamasheese. Kila asuta byeesi baamubowela, waarakikha lukyeendo. Aryo woola isi liiye lyoosi lyabuusanila, nga ari balikho beŋoonaŋoona lwe buusoolo, nga balikho benyusa luwuungu lwe buusoolo.

²¹Liiye lye ba Isiraeli ni liiye lye Bafirisitiya keemikha nga kalolelaniile.

²²Kila Dawudi alekha bibiindu byeewe mu bunyala bw'omuliindi we bibiindu bibiraambisibwa byoosi, waatimaka waatsya isi busoolo butsya khurakikhila, khuutsya khusheesa babandaaye abone nga bali balayi.

²³Ne Dawudi n'aba nga ashikanikha ni nabo, Goliyasi werusayo luundi khukhwaama mu lubatsaangwa lwe Bafirisitiya, waarakikha khuubasuluusa nga ndaalo. Dawudi naye waamuwulila byaloma.

²⁴Ne liiye lye ba Isiraeli ni baabona khu Goliyasi, baatitukha boosi nga baariire luukali.

²⁵Boosi baaba nga belomela bari, “Ni mubone umusaani uyu uwiitsa khuukhukhomyaasaka ifwe, nga akhusuluusa. Umuyiinga Saulo waasuubisa khuuwa bye buyiindifu biikali naabi umuundu yeesi unyala khumwiira. Naluundi umuundu uyo kane amufukiilile khuuyila n'umukhaana weewe nga umukhasi, ni be muungo mweewe singene bawatsake kumusolo luundi ta.”

²⁶Kila Dawudi areeba baselikhale babaaba beemikhile aambi awo ari, “Shiina shishinakholekhela umuundu unyala weera Umufirisitiya yuno ni khuumwaakamisa byeesi akhomyaasa babaandu ba Isiraeli? Umufirisitiya oyu ukhalimo ta, eyambaasa ari niye naanu, unyala ni khuukhomyaasa liiye lya Wele umulamu!”

²⁷Kila baselikhale baboolela Dawudi byeesi umuyiinga aaba atsya khukholela umuundu uwaba nga anyalisa khukhwiira Umufirisitiya uyo.

²⁸Ne Eliyabu, wandaaye wa Dawudi umukhulu n'awulila byeesi aaba alikho akanikha ni baselikhale, lirima lyaamuniina. Weetsa waalomela Dawudi ari, “Iwe nawe shiina sheesi uli khuukhola ano? Ari kamasheese koowo naanu uuli khuukalolelela iyo mu kyeewa? Ise naamanyile khukhwiyiingayiinga khwoowo, namanyile ndi weetsile ano khulolelela busoolo nga ni bubiindabiinda.”

²⁹Kila Dawudi amwiilamo ari, “Ari ise noonakisile shiina? Ise sinyala ni khuukanikhakho busa ilomo yonyene ta?”

³⁰Kila ndi ashuukha waareeba umuselikhale ukuundi shireebo sheene nisho shitweela sheesi areeba babaaramile. Aryo waafuna ndi she khukhwiilamo sheene nisho shitweela.

³¹Ni baselikhale babaawulila byeesi Dawudi akanikha, baatsya baabiboolela Saulo. Kila Saulo arumanisa Dawudi khukhwiitsa is'ali.

³²Kila Dawudi alomela Saulo ari, “O Umuyiinga, umusaani Umufirisitiya yuno akhakhwiyembelesa ifwe ta. Ise umwakaanisi woowo kane intsye imusoolanise.”

³³Saulo waamwiilamo ari, “Iwe ushiili mwaana busa, nashiryo s'unyala waanyalisa khuusoolanisa Umufirisitiya yuno ta, lwekhuuba niye waabatsaka umuselikhale buulamu bweewe bwoosi.”

³⁴Ne Dawudi weelamo Saulo ari, “O Umuyiinga, ise niye uwaayisa kamasheese ka paapa wase. Ne nga italanyi namwe liiŋu byeetsile khuwaambakho indweela khu masheese,

³⁵ise injiloondakho, naakhupa kuusolo ukwo, khukhwoolesa ni kulekhuula lisheese. Ne nga kuusolo ukwo kwaashuukhile khukhuuntsibwakala ise, ingukulukhila imumilo, naakukhupa, naakwiira.

³⁶Ise umwakaanisi woowo naayira tsitalanyi ni kamaŋu musaambo iyo, ni nashiryo ise inyala neera Umufirisitiya ukhalimo yuno, nga ni nakhola ndweela khu solo itso. Niye s'akhila khuukhomyaasa liiye lya Wele Umulamu aryo ta!

³⁷Ni nashiryo Umukasya uwambonesa ise khukhwaama mu matere ke talanyi, ni mu matere ke liiŋu, kane ambonese ise khukhwaama mu mukhono kw'Omufirisitiya yuno.” Kila Saulo amwiilamo ari, “Kale buulayi. N'utsye umusoolanise. Ne khaniyikine ndi Umukasya kane akhuyeete.”

³⁸Kila Saulo akwaarisa Dawudi bikwaaro byeewe bye khukhwikhiinga mu busoolo, waamukwaarisa n'ikuutwa yeewe iya buroonzi khu murwe kweewe.

³⁹Dawudi wesabikha ni lurima ni bye busoolo bibiindi, waakhakakho ari akyeende, ne lwekhuuba abe akhubimanyiila ta, waalekha khunyala ta. Kila Dawudi alomela Saulo ari, “Ise sinyala khuukyeenda nga nesabikhile bino ta. Ilala bino naakhubimanyiila ta.” Aryo waabiyabulakho.

⁴⁰Dawudi waabukula busa imiimbo yeewe iye bubwaayi mu mukhono kweewe. Waatsya waangala kamabaale kamamiliwu karaano khukhwaama mu luutsi lwe kameetsi, waakara mu sutilo yeewe iye lihaafu. Waasuta ni kholoto yeewe waatsya burereefu khukhwakaanana n'Umufirisitiya.

⁴¹Lulwoola, Goliyasi nga umusuti we ngabo yeewe waamuraangiliile, waakyeenda nga eetsa isi Dawudi.

⁴²Ne Goliyasi n'ola aambi waabona Dawudi buulayi, waarakikha khuumulekelesa lwekhuuba Dawudi aaba umusooleli umushishifu, nga abonekha buulayi.

⁴³Kila Goliyasi areeba Dawudi ari, “Iwe waambaasa uri ise ndi imbwa shikila untsiitsayo ni tsimiimbo?” Aryo waarakikha khuutsuba Dawudi mu lisiina lye ba wele ba Filisitiya.

⁴⁴Weloosela nga aloma Dawudi ari, “Ari iwe n'untsitseyo khubone. Kumubili kwoowo kane inguwe binywiinywi bye mu ngaaki ni tsisolo tse mwirome.”

⁴⁵Dawudi naye waamwiilamo ari, “Iwe uli khukhwiitsa isi ndi nga uli ni lurima ni kamafumo, ne ise niitsa is'uli mu lisiina ly'Omukasya. Niye Wele unyala byoosi, luundi Wele we kamaye ke ba Isiraeli isi iwe uli khuukhomyaasa.

⁴⁶Shaleelo shino Umukasya waakhureere iwe mu bunyala bwase. Intsya khukhukhuuruurira aasi, luundi ikhukhalekho kumurwe kwoowo. Ni kimibili kye baselikhale Bafirisitiya boosi, inakiwa binywiinywi bye mu ngaaki ni tsisolo tse mwirome. Ni abweene awo kane shibala shoosi shimanye shiri Isiraeli ali ni Wele umulamu.

⁴⁷Ni babaandu boosi kane bamanye bari Umukasya niye sishimukanisa khuuba ni tsiindima namwe ni kamafumo, nio awonese babaandu beewe ta. Lwekhuuba busoolo buno buli bw'Omukasya, ni naye kane akhuyeete ifwe khuubawula inywe.”

⁴⁸Aryo Goliyasi n'eloosela khukhwiitsa iburaangisi, Dawudi naye aryo waatimaka weetsa is'ali khuumwakaanana.

⁴⁹Kila ekhisa kumukhono kweewe mu sutilo yeewe, waabukulamo libaale litweela, waalira mu kholoto yeewe, waakiwuutsaka. Lwanyuma waalekhuula libaale lyaatsya lyaakhupa bubweeni bwa Goliyasi, lyenjila mu shoongo mukari lyewaambamo. Aryo weelima aasi mafumala.

⁵⁰Musaambo iyo Dawudi waawula Goliyasi, nga araambisa ikholoto ni libaale. Waamukhoonya nga s'araambisakho lurima lwoosi ta.

⁵¹Dawudi waatimaka waatsya waamwiimikhakho, waasowoolayo lurima lwa Goliyasi lulweene khukhwaama mu shilaalo shalwo. Aryo waaluraambisa khuukhalakho kumurwe kwa Goliyasi. Ne Bafirisitiya ni baabona shishaba shaakholekhile khu mukhulu waabwe, baatimawo baatsya nga baatitukha.

⁵²Baselikhale be ba Isiraeli ni Yuda baakhupa liyoombo lye busoolo, baatima nga baloonda khu Bafirisitiya, khukhwoolela ilala i Gaasi ni i Ekuroni. Baaba nga beeraka Bafirisitiya, ni kimilaambo kyaabwe kyaasalanisibwa khu lukuuto lulwaamila ilala i Sharayimu khuutsya khwoola i Gaasi ni Ekuroni.

⁵³Ba Isiraeli ni baamala khuutimisa Bafirisitiya, nga baamayo bakobola, baatsya bayaaya bibiindu byeesi baakana khukhwaama mu libusanilo lyaabwe.

⁵⁴Dawudi waayila kumurwe kwa Goliyasi i Yerusalemu, ne bye busoolo bya Goliyasi waabira mu lisari lyeewe.

⁵⁵Lwanyuma nga Saulo waaboone Dawudi atsya isi Goliyasi khuumusoolanisa, kila areeba Abuneri umukhulu we liiye lyeewe ari, “Abuneri, umusooleli uyu umwaana wa naanu?” Abuneri weelamo ari, “O Umuyiinga, ise ikhwitsubila ndi sinyala namanya ta.”

⁵⁶Kila Saulo amulomela ari, “Entselesa umanye ali umwaana wa naanu.”

⁵⁷Aryo Dawudi n'amayo mu busoolo, nga waamalile khukhwiira Goliyasi, Abuneri waamuyila isi Saulo, nga ashiili ni kumurwe kwa Goliyasi mu mukhono kweewe.

⁵⁸Kila Saulo amureeba ari, “Musooleli, iwe uli umwaana wa naanu?” Dawudi naye weelamo ari, “Ise ndi umwaana wa Yese, umwakaanisi woowo, uwe Beselehemu.”