Read lumasaaba 1 Samweli 22 Bible Online

1 Samweli 22 - lumasaaba bible

1 Samweli 22

¹Dawudi waarura mu shiriimba she Gaasi, waatitukha waatsya weebisa Mwifuluma lya Adulamu. Babaandaaye ni be muungo mweewe boosi ni baamanya isi aaba, baatsya baamwitubaasakho ibweene iyo.

²Ni babaandu babaandi baryo nabo beetsa; abo babaaba mu mutaambo, ni naabo babaaba ni kamakobi, ni babaandi babaaba baakhalafu; boosi babuusana is'ali. Boosi baaba babaandu nga bitoondo bine (400), ni Dawudi wekyela umuraangilisi waabwe.

³Aryo Dawudi waarura Mwifuluma lya Adulamu, waatsya i Mizipe shiriimba sha Mowabu, waakanikha isi umuyiinga wa Mowabu, nga amuloma ari, “Inoomba ndi ufukiilile paapa wase ni maayi wase bamenyekho ano ni nawe, khukhwoolesa ni ndimanya shiina sheesi Wele akana khukhuukholela ise.”

⁴Aryo Dawudi waareera basaali beewe, waabalekha n'umuyiinga wa Mowabu, ne niye waatsya waaba nga amenya iyo mwifuluma.

⁵Shifukhu shitweela umuŋoosi Gadi waalomela Dawudi ari, “Ukhamenya mwifuluma lino ta. Yinyukha urure ano utsye mu shaalo sha Yuda.” Aryo Dawudi wenyukha waatsya mu shisaali sha Heresi.

⁶Shifukhu shitweela Saulo aaba wekhaale aasi e kuusaala mu shiniini shakwo, khu ngaaki khwe lukiingi i Gibeya, waawulila bari aabawo babaabona Dawudi ni basaani beewe. Saulo aaba wahaambile lifumo lyeewe mu mukhono kweewe, ni baselikhale beewe baaba baamwibotokheleele.

⁷Kila Saulo abalomela ari, “Nimundekeerese buulayi, inywe babaandu be mu shikuuka sha Benyamini. Inywe mwaambaasa muri umusooleli wa Yese kane abakabile inywe buli mutweela tsinimilo ni kimikuunda kye kimisabibu? Niye kane abekyelise inywe khuuba babaakhulila liiye mu bikana ni bitoondo nga ise n'imbakholeele?

⁸Isho nisho shishiili khuukila inywe mundyamo ise luwomelo? Mbaawo na mutweela khwiinywe uwamboolelakho ise ari umwaana wase Yonasani waakhola indakaano n'umwaana wa Yese ta. Mbaawo na mutweela uwenaanayo khulwase namwe weetsa waamboolelakho ari Yonasani aayeeta mutweela khu baselikhale baase khukhwikyela nabumiinyi ta. Bona ari niye uulikhukhakakho khuuweentsa isaambo iye khukhuuntsira ise.”

⁹Dowegi uwe Edomu uwaba weemile atweela ni baakhulu ba Saulo weelamo ari, “Ise ni naba mu shiriimba she Nobu, nabona umusooleli wa Yese uyo, nga weetsile khuubona umusaayi Ahimeleki umwaana wa Ahitubu.

¹⁰Ahimeleki waatsya waamwireebelakho isi Umukasya, lwanyuma waamuwakho biilyo, atweela ni lurima lulwaba lwa Goliyasi Umufirisitiya.”

¹¹Aryo Saulo waarumanisa umusaayi Ahimeleki khukhwiitsa is'ali, atweela ni baalebe beewe boosi babaaba basaayi nabo i Nobu.

¹²Saulo waaloma Ahimeleki ari, “Ari n'undekeerese buulayi, iwe umwaana wa Ahitubu.” Ahimeleki naye weelamo ari, “Naarekeeresile, O umuyiinga.”

¹³Saulo waamureeba ari, “Lwashiina iwe n'umusooleli wa Yese muli khuukana khukhuundyamo ise luwomelo? Iwe woolele ni khuumuyeeta waamuwa biilyo ni lurima lulwaba lwa Goliyasi, naluundi waatsya waamwireebelakho isi Wele. Ari bona ali khuuweentsa khukhuuntsira ise.”

¹⁴Ahimeleki naye weelamo ari, “Mbaawo mu bakaanisi boowo umuundu uuli umwiyikinwa is'uli nga Dawudi ta. Niye ali umusaani woowo uyila umukhaana woowo, naluundi niye ali ukhulila liiye lyoowo lilikhuliinda iwe. Buli mutweela khu baandu be muungo mwoowo mubweene bamwiisamo naabi lukoosi.

¹⁵Kumuluundi kuno shikuli nikwo kukunyoowele ise khukhwireebelakho Dawudi isi Wele ta. Isho shikhakila iwe waakhalalila ise, umwakaanisi woowo ta. Namwe iwe ukhabirisaka babaandu be muungo mwase buubi ta, lwekhuuba ise naakhumanyakho shishiindu shoosi ta.”

¹⁶Saulo weelamo ari, “Ahimeleki, iwe ni be muungo mwa paapawo mweesi, mutsya khukhwiiribwa.”

¹⁷Kila Saulo alakila baaliindi beewe babaamuba aambi ari, “Nimushuukhe mwiire basaayi b'Omukasya bano, lwekhuuba nibo baayeeta Dawudi. Nibo baashimanyakho buulayi bari alikho atitukha, baalekha khwiitsa khukhuumboolelakho ta.” Ne baaliindi b'omuyiinga baalekha khunyalisa khukhwiira basaayi b'Omukasya ta.

¹⁸Lwanyuma kila umuyiinga alakila Dowegi uwaba uwe Edomu ari, “Yiira basaayi bano.” Dowegi aryo khu shifukhu isho weera basaayi kamakhumi shinaane na baraano, babaaba bali ni kumulimo kwe khuusuta i efodi.

¹⁹Waamawo weloosela khukhwibwakala shiriimba she Nobu, isi basaayi bano baamenyatsaka. Ibweene iyo, weeraka babaandu baayo boosi; basaani ni bakhasi ni babaana, ni baŋaalye beene. Waalooselakho weeraka ni tsikhaafu, tsisikilya, atweela ni kamasheese.

²⁰Ne mutweela khu baana ba Ahimeleki isi balaanga bari Abiyasaari webisa waatitukha, waatima waatsya wetubaasa khu Dawudi.

²¹Waaboolela Dawudi ari Saulo weerire basaayi b'Omukasya boosi i Nobu.

²²Kila Dawudi aboolela Abiyasaari ari, “Khu shifukhu isho nga ni nabona Dowegi, namanya ndi ilala atsya khuboolela Saulo. Nashiryo babaandu be muungo mwa paapa woowo bafwiile khulwase.

²³Ari n'urame ano atweela ni nase, ukharya ta. Umuundu uyo uuli khuweentsa khukhwiira iwe, ali khukhuumeentsa ni nase. Ne ukharya ta, kane ube buulayi nga uli ni nase.”