Read lumasaaba 1 Samweli 23 Bible Online

1 Samweli 23 - lumasaaba bible

1 Samweli 23

¹Shifukhu shitweela, babaandu beetsa baaboolela Dawudi bari, “Bafirisitiya balikho bebwakala shiriimba she Keyila, naluundi balikho banuula biilyo khukhwaama mu mawuliilo.”

²Kila Dawudi atsya khukhwiireeba khu Mukasya ari, “Inyala khuutsya nebwakala Bafirisitiya bano?” Umukasya waamwiilamo ari, “E e, n'utsye ubebwakale, uwonese shiriimba Keyila.”

³Ne basaani ba Dawudi baamuloma bari, “Ifwe abe yakhaba ano mu Yuda, khwayiyembelela naabi Bafirisitiya. Ne ari kane shoole eena, nikane khutsye khubebwakalile i Keyila.”

⁴Ndi luundi Dawudi waatsya wereeba khu Mukasya. Ne Umukasya waamuloma ari, “Yinyukhilamo utsye i Keyila, ni nase kane ikhunyalisise khuuwula Bafirisitiya abo.”

⁵Aryo Dawudi ni basaani beewe baatsya bebwakala Bafirisitiya. Baabasoolanisa ni kamaani kamakali, beera baakali khu nibo, baabukula tsikhaafu tsaabwe. Baryo baawonesa babaandu be Keyila.

⁶Nga Abiyasaari umwaana wa Ahimeleki n'atitukha khuutsya i Keyila khukhwitubaasa ni Dawudi, atsya ni efodi.

⁷Khu mbuka iyo Saulo waawulila bari Dawudi waatsiile i Keyila, kila elomela ari, “Ari Wele waamumbeele mu mukhono kwase. Dawudi ari wahaambikhiile mu shiriimba shishiilikho kamatikiiyi ni bilibwa.”

⁸Kila alaanga baselikhale beewe khukhwirekekhela busoolo, waabaloma bakhuumbe batsye i Keyila, bawaambe Dawudi atweela ni basaani beewe.

⁹Ne Dawudi n'awulila bari Saulo ali khukhwiitsa khuumuwaamba, waalomela umusaayi Abiyasaari ari, “Khakhwireebekho isi Wele akhuboolele shiina she khuukhola.”

¹⁰Lwanyuma Dawudi waaloomba ari, “O Umukasya Wele wa Isiraeli, ise umwakaanisi woowo naawuliile bari Saulo ali khuukana khukhwiitsa ano i Keyila, nga akana khukhwoonakisa shiriimba shino khulwase.

¹¹Manya babaandu be Keyila bano banyala bambaanayo isi Saulo? O Umukasya Wele wa Isiraeli, ise ikhwikoontselela ndi umboolele.” Kila Umukasya amwiilamo ari, “E e, Saulo kane eetse.”

¹²Dawudi waareeba luundi ari, “Ne manya babaandu be Keyila kane bambaaneyo ise ni baselikhale baase isi Saulo?” Umukasya waamwiilamo ari, “E e, kane bakhuwaaneyo.”

¹³Aryo Dawudi ni basaani beewe, babaaba boola nga bitoondo bisesaba, benyukha khukhwaama i Keyila nga bakyeendaana mu bifwo bibikhali bitweela ta. Saulo n'awulila ari Dawudi warurire i Keyila watsiile, wakhalawo khulekha khumuloondakho ta.

¹⁴Aryo Dawudi waamenyatsaka mu bifwo bye bubwibisilo, bye mu ngoongo mu Mubiimbi kwa Zifu. Saulo weloosela khuuweentsa Dawudi buli shifukhu, ne Umukasya walekha khuwaanayo Dawudi mu makhono keewe ta.

¹⁵Khu mbuka isi Dawudi aabeela mu shifwo she Horeshi mu mubiimbi kwa Zifu, waaba ni buuri bukali naabi, lwekhuuba Saulo aaba nga alikho aweentsa khuumwiira.

¹⁶Ne Yonasani umusooleli wa Saulo waatsya khuubona Dawudi mu shifwo isho, waamuyeeta nga amwiisamo kamaani mu Wele.

¹⁷Yonasani waamulomela ari, “Ukheyembelela ta. Paapa wase Saulo singene anyaalise khuukhwiira iwe ta. Lwekhuuba niye waamanyila ilala ari, iwe niye utsya khukhwiilawo nga umuyiinga wa Isiraeli, naluundi waamanya ari ise niye utsya khuba umuro woowo. Shino paapa wase waashimanyila ilala ari shili shaŋali.”

¹⁸Baryo boombi baakhola indakaano mu moni ts'Omukasya, nga bafukiilisana khuuba babeyikinwa umuundu isi uwashe. Lwanyuma Yonasani weelayo ingo, ne Dawudi niye waarama i Horeshi.

¹⁹Babaandu baalala khukhwaama mu shiriimba she Zifu, baatsya isi Saulo i Gibeya baamulomela bari, “O Umuyiinga Saulo, Dawudi ali ni bubwibisilo aambi ni nafwe iweefwe iyo i Horeshi, mu bikoongo bya Hakila, shiifwo shishiili imwaalo wa Jeshimoni.

²⁰Ari iwe n'uba nga unyalisa khukhwiitsa nga kumwoyo kwoowo ni kukana, ifwe kane khukhuyeete umuwaambe.”

²¹Saulo waabeelamo ari, “Umukasya abawe tsikhabi, lwekhuuba inywe mwanjeetile ise naabi.

²²Ari ni mutsye muweentselese buulayi. Ne ni muba nga mwaamunyoolile is'ali, ni khuumanya eena isi atela khuutsya, ni naanu umuboone is'ali. Baayimboolela buulayi bari ali umuundu umwikobani naabi.

²³Ni nashiryo ni muweentselese buulayi, mumanye biifwo byeesi atela khukhwiibisamo, mukobole mumboolele. Ni nase lwanyuma kane intsye ni nanywe, siinga aba nga waayibisa mu bisiintsa bibiili mu bikuuka bya Yuda, indyo kane imunyoole.”

²⁴Baryo babaandu bano benyukha baaraangila ibweeni wa Saulo, baatsya i Zifu. Baatsya baashifumbula nga Dawudi ni basaani beewe abe baayibisa imwaalo wa Jeshimoni mu Mubiimbi kwa Mawoni.

²⁵Aryo Saulo ni basaani beewe baatsya khuuweentsa Dawudi. Ne Dawudi n'ashiwulilakho bari Saulo ali khukhwiitsa, wenyukha waatsya mu shifwo isi balaanga bari Lulwaanda shishiili mu Mubiimbi kwa Mawoni. Saulo naye n'ashiwulilakho aryo, weloosela khuuweentselesela ilala Dawudi.

²⁶Saulo waaba nga akyeendela khu luwaande lutweela khwe lukiingi, ni Dawudi ni basaani beewe naye waaba khu luwaande luluundi, nga bakhakakho khuutitukha. Aryo Saulo ni baselikhale beewe ni baaba nga bali aambi khuuwaamba Dawudi,

²⁷yabayo umuundu mutweela uweetsa isi Saulo waamuboolela ari, “Nuwiitse khaangu! Bona Bafirisitiya bali khukhwibwakala linaambo lyeefwe, ate bali khuuyila buli shiindu shoosi.”

²⁸Ni abweene awo, Saulo waakamisa khuuloondelela Dawudi, weelayo ingo khuusoolanisa Bafirisitiya. Ni shiifwo isho shikila bashilaanga bari, “Lulwaanda lwe Bubwilukhilo.”

²⁹Dawudi wenyukhayo iyo, waatsya weebisa, nga amenya mu shisiintsa sha Engedi.