Read lumasaaba 1 Samweli 25 Bible Online

1 Samweli 25 - lumasaaba bible

1 Samweli 25

¹Imbuka ni yoola, Samweli waafwa. Babaandu ba Isiraeli boosi baabuusana atweela khuumulila. Lwanyuma baamusiikha ango eewe i Rama. Lwanyuma lwa bino, Dawudi wenyukha waatsya mu mubiimbi kwe Parani.

²Mu shiriimba she Mawoni, yabayo umusaani mutweela uwaba ni buyiindifu bukali naabi. Buyindifu buno abe ali nabwo mu shiriimba she Karumeli. Umusaani yuno aba ali ni tsimbusi shikana shitweela (1,000), ni kamasheese bikana bitaru (3,000) abe keesi ali khubekakho bubwooya i Karumeli.

³Lisiina ly'omusaani uyo abe bari Nabali, n'umukhasi weewe abe bari Abigayili, uwaba umukhasi umukyesi naabi naluundi nga waamiliya waakhila ta. Ne Nabali aaba uwe mu shikuuka sha Kalebu, nga niye ali umusaani uwibirisaka buubi, luundi nga ali umulyaasi.

⁴Dawudi nga ali mu mubiimbi iyo, waawulila bari Nabali ali i Karumeli, ni baraambi beewe nga bali khuubekakho kamasheese keewe bubwooya.

⁵Kila Dawudi waarumana likhumi khu basaani beewe khuumutsyayo bamuyilile khuukheesa.

⁶Waabalomela khuutsya balome Nabali bari, “Dawudi waakhwakaanisile khuukheesa khweewe. Niye akhukanisa iwe ni be muungo mwoowo lukoosi, naluundi lukoosi lube khwiibyo byoosi byeesi uli nabyo!

⁷Naawuliile bari iyi niyo imbuka iye khuubekakho kamakheese bubwooya. Ne babaayi boowo ni baaba nga bali ni nafwe i Karumeli, ifwe sikhwababirisa buubi ta, naluundi mbaawo shishiindu shoosi sheesi baabeebakho ta.

⁸Nga waabareebile babeene, kane bakhuboolele shishiindu nisho shitweela sheene. Iyi n'ili imbuka iye kamayiiya, khuloomba ukhuwaambile ifwe shiisa, ukhwakaanile buulayi. N'ukhuwekho biilyo byeesi unanyalisa, ifwe babaakaanisi boowo n'umusaale woowo Dawudi.”

⁹Basaani ba Dawudi baatsya isi Nabali, baamwakaanisa buurume buno khukhwaama isi Dawudi. Bekhala baaliinda sheesi Nabali anabeelamo.

¹⁰Lwanyuma Nabali waabeelamo ari, “Dawudi? Wuutsi niye naanu? Umwaana wa Yese uyo, mutweela khu baakulwa uwatitukha khukhwaama khu mukoosi weewe! Baakulwa babaali nga niye, nga bali baakali biifukhu bino!

¹¹Shiina shishikila inywe mwaambaasa muri ise inyala naabukula kimikaati kyase, ni tsinyama tseesi iŋoonaŋooneele abo babaali khuubekakho kamasheese bubwooya, naabawa inywe? Ni shishiindi, ise naakhumanya inywe isi mwaama ta!”

¹²Baryo basaani bano beelayo, baatsya baboolela Dawudi bilomo byoosi byeesi Nabali aaloma.

¹³Lwanyuma Dawudi waabalakila ari, “Buli mutweela naabukule lurima lweewe!” Boosi buli mutweela weesabikha, ni Dawudi naye umweene weesabikha. Basaani bitoondo bine (400) baarura khuutsya ni Dawudi, ne bitoondo bibili (200) baarama khuuliinda bikuku byaabwe.

¹⁴Ibyo nga bili biryo, mutweela khu baraambi ba Nabali waatsya waaboolela Abigayili, umukyelama wa Nabali ari, “Waawuliilekho nga Dawudi n'arumanile babaakaanisi beewe khuureera khuukheesa isi umukoosi weefwe Nabali, ne niye waabakhomaka busa!

¹⁵Ate nga babaandu bano baakhubeela baalayi naabi khu mbuka isi khwabeela mu mubiimbi aambi ni nabo. Nibo sibaakhutaambisakho ifwe ta, naluundi mbaawo khu biindu byeefwe shishakoraanakho ta.

¹⁶Abe buli shiilo ni kumuusi bakhukhiinga ifwe, nga ni khwaba nga khwaayisa kamasheese keefwe aambi ni nabo.

¹⁷Ari yambaasa khaangu khu sheesi unyala khuukhola, lwekhuuba buwaangafu butsya khwoola khu mukoosi weefwe ni be muungo mweewe boosi. Umukoosi weefwe uyu ali ni kumurwe kumuboofu, mbaawo umuundu unyala waamukanikhayo ta.”

¹⁸Khaangukho, Abigayili wenyukhilamo, waabuusanisa kimikaati bitoondo bibili (200), ni tsisutilo tse kamahaafu tse viini tsibili, tsinyama tse kamasheese karaano, ni isawu imboofu iye ŋaano ikhalaange, biyuuyi biraano bye tsizabibu, ni kamatuunda ke kuusaala ku figi kamoomu. Bino byoosi waabimeemisa khu sikilya tseewe.

¹⁹Lwanyuma kila alomela babaakaanisi beewe ari, “Inywe ni muraangile mutsye iburaangisi wase, ni nase kane imbaloondekho.” Ne mu bino byoosi s'aboolelakho umuseetsa weewe Nabali byeesi aaba ali khuukhola ta.

²⁰Ne Abigayili n'aba nga alikho etsila khu sikilya yeewe khu ntsila iyibotokhelela khu lukiingi, khaangukho waakanana ni Dawudi ni basaani beewe, nga naye alikho eetsa khu mukhoosi kweene khuumwakaanana.

²¹Dawudi abe nio alimalile khuukanikha ari, “Ise namala busa imbuka yase khukhiinga bibiindu bya Nabali iyo mu mubiimbi, yaalekha khubawo shishiindu sheewe na shitweela shishakoraanakho ta. Ise namukhola niye buulayi, ne ari bona niye asasula ise ni bukhomo!

²²Ise nitsuba ndi antsye butsya khusha kumutikhinyi, singene ibewo umusaani na mutweela namwe umusooleli, khukhwaama muungo mweewe, ukane abe nga ali mulamu ta. Ise inoomba ndi khali Wele ambeele shitaambiso, niimba nga naakhushikhola ta!”

²³Aryo Abigayili n'abona khu Dawudi, waarura khaangu khu sikilya yeewe, waafukhama aasi, weenamisa kumurwe kweewe aasi iburaangisi a bikyele bya Dawudi.

²⁴Lwanyuma kila amulomela ari, “Musakhulu, ikhwikoontselela ndi uwuliilise byeesi ise umwakaanisi woowo inoma. Inoomba ndi khukhwikiitsa khuno khali khubeele khwiise!

²⁵Ikhuloomba ndi ukhenaanayo isi umusaani Nabali ukhalimo kamakyesi uyo ta. Nga lisiina lyeewe nilimanyisa liri, ‘Umuundu umusilu,’ ilala afwaana aryo! Ne mu ŋali, ise umwakaanisi woowo, sinabonakho khu basaani beesi iwe warumana ta.

²⁶Nashiryo nga ni shili ndi Umukasya umweene niye ukhaakhufukiilisa iwe khukhwiira baasiku boowo ta, ni khuubeliyaasa nibo ni kamakhono koowo kameene ta, ikhuloomba ndi khali baasiku boowo boosi, ni naabo babaakana khuukhukholakho iwe buubi, khali bafunile shitaambiso nga Nabali. Shino ishikhwitsubila mu lisiina ly'Omukasya ni mu lisiina lyoowo.

²⁷Ari ise ikhuloomba ndi khali ufukiilisile shiwaanwa shino sheesi ise umwakaanisi woowo naama khukhureerera, ushiwa basaani boowo bano.

²⁸Naluundi ikhuloomba ndi untsiyakhile ise umwakaanisi woowo. Umukasya umweene ali khukhiinga iwe ni be muungo mwoowo boosi, lwekhuuba iwe uli khuusoolana busoolo bw'Omukasya. Inoomba ndi ulekhe khukholakho shishiindu shiibi shoosi ta, imbuka yoosi isi ulimala nga ushiili mulamu.

²⁹Umukasya Wele umweene alikhuliinda iwe, siinga ibawo baasiku boosi babaakana khukhwiira iwe. Ne buulamu bwaabwe alibukhwaanyula khaangu khuuburusawo khuufwaana nga libaale lilirura khukhwaama mu kholoto.

³⁰Umukasya umweene waakhusuubisa khuukhukholela iwe bibiindu biilayi, ni khukhwoolisa khuukhukhola iwe khuuba umuyiinga wa Isiraeli. Umukasya alyoolelesa bisuubiso byeewe isi iwe,

³¹ni mu byambaaso byoowo, iwe s'ulibakho ni she khukhwiyikiitsa ta, lwekhuuba s'ulibakho ni butsiina mu mwoyo kwooyo lwe khuutsukha kamafuki ke babaandu babaakhalikho ni kumusaango ta, namwe bari lwekhuuba wabakho ni she khukhwiliyaasa ta. Ne nga Umukasya waakhukholeele bibiindu biilayi bino byoosi, ikhwikoontselela ndi ukhaantsibililatsaka ise, umwakaanisi woowo ta!”

³²Kila Dawudi naye waalomela Abigayili ari, “Umukasya Wele wa Isiraeli aruuyibwe naabi! Umweene akhiile khuuba nga niye ukhurumanile iwe khukhwiitsa khukhuuntsakaanana ise shaleelo shino.

³³Ni nawe waakha khuusiima Wele lwe khuukhalawo khwoowo khwe kamakyesi. Naluundi khuukhalawo khwoowo ukhwo khwanjeetile ise khuulekha khwiliyaasa ta, ni khukhwiira babaandu babaakhalikho ni shiibi shoosi ta.

³⁴Iwe uba nga ukheetsile khaangu khukhuuntsakaanana ise ta, khali isi antsye butsiile khusha, nga buli musaani, na buli musooleli yeesi muungo mwa Nabali weriibwile. Ise ikhwitsubila shino mu lisiina ly'Omukasya Wele wa Isiraeli, ukhwaayilisile iwe, ndi shino sheesi inoma shili shaŋali.”

³⁵Lwanyuma Dawudi waakaanila ibyo byoosi byeesi Abigayili aamureerera. Ne ndi waamulomela ari, “Ukheyembelela ta. N'uwileyo ingo woowo mu lukoosi. Kane ikhukholele sheesi uloombile.”

³⁶Abigayili weelayo ingo weewe, waanyoola nga Nabali umuseetsa weewe waakabuule kamayiiya, abe kafwaana nga keesi bakabuliile umuyiinga. Nabali abe umweene waanyweele waameelile, nga wetsuule kumwikhoyo. Kila Abigayili waalekha khuumuboolelakho shishiindu shoosi shiilo isho ta.

³⁷Ne antsye ni bwasha kumutikhinyi, nga ari Nabali waatelelile mu byambaaso, Abigayili waamuboolela byoosi bibyaba byakholekhile. Nabali kumwoyo kwaamusuna muunda, waakona mu bulili wafwaana libaale, waaba busa nga ufwiile.

³⁸Ne lwanyuma lwe biifukhu likhumi, Umukasya waamukhweesamo buulamu bweewe, waafwa na khufwa.

³⁹Ne Dawudi n'awulila bari Nabali waafwiile, waaloma ari, “Umukasya aruuyibwe naabi! Lwekhuuba niye waakhaliile Nabali kumusaango lwe bukhomo bweesi aakhoma ise. Umukasya umweene niye ukhaafukiilisa ise khuukholakho shishiindu shoosi shiibi ta, waakila Nabali umweene waafwa lwe buubi bweewe umweene.” Lwanyuma Dawudi waarumanisa isi Abigayili khuumukanikhisa, nio amuyile nga umukyelama weewe.

⁴⁰Babaakaanisi ba Dawudi baatsya isi Abigayili, uwaba ashiili i Karumeli, baamulomela bari, “Dawudi waakhurumaane ifwe is'uli bari khukhuyile iweewe ube umukyelama weewe.”

⁴¹Abigayili waafukhamila aasi, weenamisa kumurwe kweewe, waaloma ari, “Ise naafukiilile khuuba umukulwa wa Dawudi, khuumusiingatsaka bikyele byeewe.”

⁴²Lubaluba, Abigayili weenyukhilamo, weŋoonaŋoona, waaniina khu sikilya yeewe, nga ali ni bakhaana beewe baraano babaamulolelela. Aryo waatsya ni babaakaanisi ba Dawudi, weekyela umukyelama weewe.

⁴³Abe makiboolekho Dawudi waayila Ahinomu khukhwaama mu shiriimba sha Yezureeli. Baryo boombi, niye ni Abigayili beekyela bakyelama ba Dawudi.

⁴⁴Khu mbuka iyo, abe Saulo alikhuŋoonaŋoona khuukhwaalikhisa Mikaali uwaba mukha Dawudi, wa Paluti, umusooleli wa Layishi khukhwaama mu shiriimba sha Galimu.