Read lumasaaba 1 Samweli 27 Bible Online

1 Samweli 27 - lumasaaba bible

1 Samweli 27

¹Dawudi welomela mu mwoyo kweewe ari, “Mu biifukhu bino Saulo anyala khukhuuntsira. Nashiryo shishikane shinjeete ise nikhwo khukhwilukhila mu shibala she Bafirisitiya. Nga ndi iyo kane Saulo akhakekho khukhuumeentsa akhaasikhe khukhuunyoola, lwanyuma andureyo.”

²Kila Dawudi enyukha ni basaani beewe bitoondo bisesaba (600) beesi aaba nabo, waakyeenda waatsya w'omuyiinga Akishi, umwaana wa Mawoki uwe Gaasi.

³Dawudi ni basaani beewe baatsya baamenya i Gaasi, nga bali atweela ni be muungo mwaabwe. Dawudi waaba nga ali ni baakyelama beewe babili: Ahinomu uwe Yezureeli, ni Abigayili uwe Karumeli, uwaba namulekhwa wa Nabali.

⁴Ne ndi Saulo n'awulila bari Dawudi waatitukhiile i Gaasi, waakamisa khuumuweentsa nga akana khuumuwaamba.

⁵Shifukhu shitweela Dawudi waakanikha ni Akishi nga aloma ari, “Iwe n'uba nga waasiimile ise, ikhuloomba ndi umbekho shiriimba shitweela shishiili aleeyikho, intsye imenyatsake ibweene iyo. Ise sishintsakhila khuumenya ni nawe ano mu shiriimba she buyiinga ta.”

⁶Aryo khu shifukhu sheene isho, Akishi waawa Dawudi shiriimba sha Zikulaga. Ni khukhwaamila abweene awo, Zikulaga shekyela shiriimba she bayiinga ba Yuda.

⁷Dawudi wamenya mu Firisitiya khuumala imbuka iye kumwiiko mutweela ni kimyeesi kine.

⁸Khu mbuka iyo Dawudi atweela ni basaani beewe baatsyatsaka khukhwibwakala babaandu be Giruzi, ni ba Amaleki, nga nibo babaabatsaka babaandu babaamenya mu bifwo ibyo khukhwaama khaalekho. Abe Dawudi atsya webwakala biifwo byaabwe khukhwoolela ilala i Shuri, shishiili aambi ni Misiri.

⁹Abe buli lweesi Dawudi bebwakaalila shiriimba, nga beyilila kamasheese, tsikhaafu, tsisikilya, tsiŋamila, ni bikwaaro. Ne nga abe beera buli muundu yeesi isi baanyoolatsaka. Lwanyuma abe Dawudi akobola waatsya khuubona Akishi.

¹⁰Abe Akishi atela khuureeba Dawudi ari, “Shaleelo utsiile khukhwibwakala naanu?” Nga Dawudi naye abe elamo ari, “Ntsiile khusoolanisa shiriimba Negebu she mu Yuda,” namwe abe alala elamo ari “Ntsiile khusoolanisa Negebu isi ba Yerameeli bamenya,” namwe ari, “Isoolanisile Negebu she ba Keni.”

¹¹Dawudi abe akhoonya buli muundu yeesi abe isi anyoola, oba musaani, oba mukhasi, nga mbaawo na mutweela isi alekha khukhwiilayo i Gaasi nga mulamu ta. Abe buli mbuka ambaasa ari, “Siinga mbalekha beelayo nga baalamu i Gaasi, banyala baatsya baaboola byeesi ise mbeele nga ikhola.” Dawudi waakholatsaka aryo imbuka yoosi isi aamenyatsakila mu shibala she Bafirisitiya.

¹²Ne Akishi niye waaba nga eyikina naabi Dawudi, nga ambaasa ari, “Dawudi uyu babaandu beewe baamubiyila naabi. Ni nashiryo, kane abe nga mutweela khu bakaanisi baase biifukhu byoosi.”