Read lumasaaba 1 Samweli 28 Bible Online

1 Samweli 28 - lumasaaba bible

1 Samweli 28

¹Mu biifukhu ibyo Bafirisitiya babuusanisa liiye lyaabwe nga bakana khuutsya khusoolanisa ba Isiraeli. Kila umuyiinga Akishi alomela Dawudi ari, “Iwe uli ni khuushimanya uri, iwe ni basaani boowo muli ni khukhwitubaasakho mu liiye lyeefwe.”

²Kila Dawudi elamo Akishi ari, “Isho shili ni shisheene! Iwe kane wamweene wibonelekho sheesi ise umwakaanisi woowo inyala khukhola.” Akishi naye waaloma ari, “Isho shilayi. Ise kane ikhwikyelise iwe khuuba umuliindi wase uwa penani.”

³ Khu mbuka yino abe Samweli waamala khaale khuufwa, ni ba Isiraeli abe baamala khaale khuumulila, naluundi abe baamala khaale khuumusiikha muungo mweewe mu shiriimba she Rama. Abe Saulo waawoona bafumu ni naabo babaakanikha ni bisimu bye baafu khuurura mu Isiraeli.

⁴Liiye lye Bafirisitiya lyoonga lubatsaangwa lyaatsya lyaabuusanila i Shunemu. Kila Saulo naye alaanga liiye lye ba Isiraeli lyoosi, baatsya baabuusanila i Gilubowa.

⁵Ne Saulo n'akhupa tsimoni khu liiye lye Bafirisitiya, waarakikha khuunikina lwe khuurya khuukali.

⁶Kila atsya khukhwiireeba khu Mukasya abone shiina she khuukhola. Ne Umukasya waalekha khumwiilamo nakhari ta, oba khuubirira mu marooro, oba mu musaayi, oba mu muŋoosi yeesi ta.

⁷Kila Saulo alaanga babaakaanisi beewe boosi atweela waabaloma ari, “Ni mumeentseleyo umukhasi uli umufumu unyala khuukanikha ni bisimu bye baafu. Ise ngana khuutsya imwireebekho.” Kila babaakaanisi beewe bamwiilamo bari, “I Endori, iliyo umukhasi mutweela unyala khuushikhola.”

⁸Aryo mu shilo isho, Saulo waakwaara tsingubo tsiindi busa, yaalekha khubawo umuundu umumanya ari niye. Kila enyukha ni basaani baandi babili, baatsya w'omukhasi tsana. Waalomela umukhasi ari, “N'undeebeelekho isi shisimu sh'omufu. Unyala waanaangila shisimu sh'omuundu isi ingana?”

⁹Kila umukhasi naye elamo ari, “Iwe shiina kila ulikho undeka kumureko? Iwe waamanya buulayi uri umuyiinga Saulo waawoona baafumu boosi, ni naabo boosi babaakanikha ni bisimu bye baafu khuurura mu Isiraeli.”

¹⁰Saulo welamo ari, “Ise ikhwitsubila mu lisiina ly'Omukasya ndi, mbaawo shishiindu shoosi shishinakhukholikhakho lwe lomo yino ta.”

¹¹Kila umukhasi amureeba ari, “Ukana ikhureerere naanu umweene?” Saulo welamo ari, “Ngana shisimu sha Samweli.”

¹²Ne umukhasi n'abona Samweli wahariina ni likono liikali, waashuukha waalomela Saulo ari, “Lwashiina iwe umoombelesile? Iwe uli umuyiinga Saulo!”

¹³Saulo waamwiilamo ari, “Ukhaba ni khuurya ta. Iwe imboolele busa sheesi uboone.” Umukhasi welamo ari, “Indi khuubona shisimu shaama aasi mwiloba.”

¹⁴Kila Saulo areeba umukhasi ari, “Ne shifwaana shirye?” Umukhasi waamwiilamo ari, “Shibonekha nga umusaani umusakhulu nga wakwaarire ikaantso.” Abweene awo Saulo washimanya ari niye Samweli, aryo waafukhama aasi, weenamisa kumurwe kweewe khwiloba lwe khuumuwa shiriifwa.

¹⁵Kila Samweli areeba Saulo ari, “Iwe lwashiina uli khukhuundaambisa ise? Lwashiina ukilile ise nakobola khu shibala ndi?” Saulo waamwiilamo ari, “Ise ndi mu bukosi bukali naabi, lwekhuuba Bafirisitiya beetsile khukhuuntsibwakala. Wele wandekhile, s'akana khukhuuntsilamo nga araambisa buŋoosi, namwe kamarooro ta. Isho shishikila ikhukobosile, ingana umboolele, ari ikhole ndyeena?”

¹⁶Samweli waamuloma ari, “Ari lwashiina untsireebakho siinga nga Umukasya aba waakhulekhile, nga s'ashiili ni nawe ta?

¹⁷Ise naamala khaale khuukhuboolela iwe byeesi Umukasya ali khuukhola. Niye waamala khaale khuukhurusakho khwiiwe buyiinga, waabuwaambisa umwesanwa woowo Dawudi.

¹⁸Iwe waminyaalila likaambila ly'Omukasya, nga n'akhulomela khuuhesa ba Amaleki, iwe waaminyaala waalekha khushikhola ta. Ari isho nisho shishiili khuukila naye ali khuukhukhola aryo.

¹⁹Umukasya atsya khunyalisisa Bafirisitiya khuuwula liiye lye ba Isiraeli. Kumukaamba iwe ni basooleli boowo nanywe mwiitse muntsitubaasekho i makoombe ino. Umukasya atsya khuwa Bafirisitiya bunyala khu liiye lye ba Isiraeli.”

²⁰Lubaluba, Saulo wereendula aasi nga waatsalaalile busa yeesi, nga wetsuule khuurya lwe bilomo byeesi Samweli aaloma. Kamaani kaaba nga kaamuweelemo, lwekhuuba aaba waakhulyakho khakhaandu khoosi ta khu shifukhu isho shoosi ni shiilo sheene.

²¹Umukhasi tsana weetsa isi Saulo, ne n'abona ari waariire naabi, kila amuloma ari, “Ise umukhaana woowo ikhuwuliilisile byeesi iwe uloma, newaanayo buulamu naakhola sheesi unoombile khuukhola.

²²Ari ikhuloomba ndi nawe uwuliilise sheesi nase inoma. Lekha ikhuwekho biilyo ulyekho, manya waafuna kamaani kakanyala kaakhunyalisisa khuukyeenda utsye.”

²³Saulo wekaana, waaloma ari, “Ise naalobile, siinalya ta.” Ne basaani beewe atweela n'umukhasi mweene beloosela khuumwikoontselela bari alyekho. Lwanyuma waabawulila, wenyukha aasi wekhala khu shitaanda.

²⁴Khaangukho umukhasi tsana weera ikhaafu inere buulayi, waakiŋoonaŋoona buulayi. Waabukula buufu, waabukaanda buulayi, waakhola kumukaati kukukhalimo kamamela ta.

²⁵Aryo waareera biilyo bino waabiwa Saulo ni basaani beewe, baabilya. Ni baamala khuulya, benyukha baatsya shiilo sheene isho.