Read lumasaaba 1 Samweli 3 Bible Online

1 Samweli 3 - lumasaaba bible

1 Samweli 3

¹Umusooleli Samweli wakaanisatsaka Umukasya nga ayeetakho umusaayi Eli. Mu biifukhu ibyo, Wele s'aba nga akanikhaka isi babaandu shabusheele ta, ni khuubonekhelwa khukhwaama is'ali khwaba khukyeekhe naabi.

²Mu shilo shitweela, Eli uwaba nga saashibona buulayi ta, nga waabofwaala tsimoni, aaba nga waakonile mu shiseenge sheewe.

³Samweli aaba waakonele aasi mwisaayilo ly'Omukasya, mumwaba isanduuku iye kamakaambila iya Wele. Itaala ya Wele yaba nga ishiili khusima ta,

⁴Umukasya walaanga Samweli lisiina ari, “Samweli, Samweli.” Ni Samweli naye welamo ari, “Ise niy'oyu.”

⁵Aryo kila enyukha atimaka isi Eli, waamuloma ari, “Ise niy'oyu paapa nga n'unaangile.” Ne Eli waamwiilamo ari, “Ise akhukhulaangakho ta. N'uwileyo ukone aasi.” Aryo Samweli welayo waakona.

⁶Umukasya waamulaanga luundi ari, “Samweli.” Samweli ndi wenyukha waatimaka isi Eli, waaloma ari, “Ise n'iyooyu, nga n'unaangile.” Eli waamwiilamo ari, “Mwaana wase, ise sinakhulaangilekho ta. N'uwileyo, utsye ukone aasi.”

⁷Samweli s'amanya ari Umukasya niye uwaba amulaanga ta, lwekhuuba Wele aba ashiili khumukanikhatsakayo ta.

⁸Umukasya walaanga Samweli kumuluundi kwe khataru. Ndi luundi wenyukha waatimaka isi Eli, waamuloma ari, “Ise niy'oyu paapa, unaangile.” Abweenewo Eli waamanya ari Umukasya niye uwaba ali khuukanikha isi umwaana uyo.

⁹Shikila Eli waaloma Samweli ari, “N'uwileyo, utsye ukone aasi. Ne noola nga waakhulaangile luundi, uloma uri, ‘Umukasya, n'ukanikhe ni nase. Ise umwakaanisi woowo naarekeeresile.’ ” Aryo Samweli welayo waakona aasi mu shifwo sheewe.

¹⁰Umukasya weetsa weemikha aambi ni naye, walaanga luundi Samweli, nga n'akhola kimiluundi kikyanyoowa ari, “Samweli! Samweli!” Samweli welamo ari, “Umukasya, n'ukanikhe ni nase. Ise umwakaanisi woowo naarekeeresile.”

¹¹Aryo Umukasya waaloma Samweli ari, “Iliwo shishiindu shikosi naabi sheesi ntsya khukhola khu baandu ba Isiraeli, na buli muundu yeesi ulishiwulilakho, alilulukha busa.

¹²Khu shifukhu isho, indyoolesa khu Eli ni ntsu yeewe bitaambiso byoosi byeesi nasuubisa, khukhwaama khu khurakikha khukhwoolesa khu ntsakamo.

¹³Lwekhuuba ise namuboolela ndi ntsya khuwa be mu ntsu yeewe shitaambiso shikhawawo ta, lwe shishoonako isho sheesi umweene aamanyakho, nga basooleli beewe benyaalutaka isi Wele, ne niye waalekha khubakhaangabisa ta.

¹⁴Ni nashiryo, ise netsubila ilala khu lwe ntsu ya Eli ndi, mbaawo shishiwongebwayo namwe shiwaano shishinyala shaarusawo shiibi shikali shino sheesi bakholile ta.”

¹⁵Aryo Samweli waarama mu bulili bweewe khukhwoolela ilala kumutikhinyi. Lwanyuma wenyukha wekulakawo kimilyaango kye ntsu y'Omukasya. Ne waaba waariire naabi waalekha khuboolelakho Eli byeesi Umukasya aaba waamubooleele mu khubonekhelwa ta.

¹⁶Ne Eli waamulaanga waamuloma ari, “Mwaana wase Samweli!” Samweli naye weelamo ari, “Ise niy'oyu paapa.”

¹⁷Eli waamureeba ari, “Shiina sheesi Umukasya akhuboolele? Ukhaambisakho ilomo yoosi ta. Ni nawe nikane umbisekho ilomo yoosi khu byeesi akhubooleele, Wele kane akhuwe shitaambiso.”

¹⁸Aryo kila Samweli amuboolela byoosi byeesi Umukasya aamuloma, nga mbaawo ni ilomo na ndweela isi aamubisakho ta. Shikila Eli naye aloma ari, “Niye ali Umukasya, naakhole shoosi sheesi kane asiime.”

¹⁹Samweli waatsowa nga Umukasya ali ni naye, naluundi buli lomo yoosi isi Samweli aakanikhatsaka, Umukasya aakyolelesatsaka.

²⁰Ni babaandu boosi ba Isiraeli, khukhwaamila ilala i Dani khukhwoola i Berisheba baashimanya bari, Samweli ilala ali Umuŋoosi w'Omukasya.

²¹Umukasya weloosela naabi khukhwiyokesanisa isi Samweli i Shilo, nga amuwatsaka ilomo shiina iye khuukanikha.