Read lumasaaba 1 Samweli 31 Bible Online

1 Samweli 31 - lumasaaba bible

1 Samweli 31

¹Bafirisitiya baaba basoolana ni ba Isiraeli khu lukiingi Gilubowa. Baselikhale be ba Isiraeli batitukha khukhwaama isi Bafirisitiya, ni baakali khu nibo beeribwa naabi.

²Bafirisitiya baaminya Saulo ni basooleli beewe kamaani, beera Yonasani, ni Abinadabu atweela ni Malikishuwa.

³Buusoolo bwaba bukali naabi isi Saulo aaba, babalasa buyiingo baamulasa, baamutsiinisa naabi.

⁴Kila Saulo alomela uyo uwamusutatsakilakho bye busoolo byeewe ari, “Soolayo lurima lwoowo untsire! Singana Bafirisitiya basiinde busa abo, beetsa baanyoola baambunaka, baakholaka kumwiinyawo ta.” Ne umusuti we bye busoolo byeewe waalekha khushikhola ta, lwekhuuba aarya naabi. Isho shaakila Saulo waabukula lurima lweewe umweene waalukwakho.

⁵Umusuti we bye busoolo bya Saulo n'abona nga Saulo waakwiile waafwiile, naye waakwa khu lurima lweewe, waafwiila atweela ni Saulo musaambo niyo ndweela.

⁶Aryo Saulo waafwa, n'umusuti we bye busoolo byeewe naye waafwa, atweela ni basooleli beewe nabo baafwiila khu shifukhu sheene nisho shitweela.

⁷Ba Isiraeli babaaba khu luwaande luluundi lwe Litila lye Yezureeli, ni naabo babaaba shaanjelekha wa Yorudaani, baawulila bari liiye lye ba Isiraeli lyatitukhile. Naluundi bawulila bari Saulo naye ni basooleli beewe bafwiile, boosi benyukhilamo nabo batitukha. Bafirisitiya beetsa benjila mu biriimba byeesi ba Isiraeli baalekha, babimenyamwo.

⁸Khu shifukhu shisheelakho, Bafirisitiya beetsa isi busoolo bwaba nga bakana khuubukulaka bye busoolo khukhwaama khu milaambo kye baselikhale ba Isiraeli, baanyoola Saulo ni basooleli beewe nga baakalamiliile khu lukiingi Gilubowa.

⁹Baryo kila bakhalakho kumurwe kweewe, baamufuula ni bikwaaro byeewe bye busoolo. Baarumanisaka baarume khuutsya mu shibala shoosi she Bafirisitiya, batsye khuulaangilila kamakhuuwa ako mu mesaayilo kaabwe ke bifwaani, ni isi babaandu boosi.

¹⁰Baayila bye busoolo byeewe, baabira mu lisaayilo lya wele umukhasi Asitate, baatsangilila kumulaambo kweewe khwitikiiyi lye mu shiriimba Besi Shani.

¹¹Ne babaandu babaamenyatsaka i Yabeshi she Gileyadi baawulila byeesi Bafirisitiya baakhola khu mulaambo kwa Saulo.

¹²Kila shiilo shitweela, basaani boosi baanyindaalifu khukhwaama i Yabeshi, baatsya i Besi Shani. Ni boolayo, baahanulayo kimilaambo kya Saulo ni basooleli beewe, baakikobosa i Yabeshi, baakyooshelayo kumulilo.

¹³Lwanyuma baayila kamakuumba, baatsya baakasiikha mwiisina mwe kuusaala mu shiriimba Yabeshi, baaba nga babuya ntsala khukhwookesanisa kumutaambo kwaabwe, khuumala biifukhu musaafu.