Read lumasaaba 1 Samweli 5 Bible Online

1 Samweli 5 - lumasaaba bible

1 Samweli 5

¹Bafirisitiya ni baamala khuuyila isanduuku iye kamakaambila iya Wele, baakisuta khukhwaama i Ebenezeri, baakiyila i Ashidodi.

²Lwanyuma baakira mu lisaayilo lya wele waabwe Dagoni, baakira aambi ni shifwaani sheewe sheesi besaayatsaka.

³Ne ni bwasha kumutikhinyi kukweelakho, babaandu be Ashidodi baatsya mu lisaayilo lya Dagoni, baanyoola nga shifwaani sha Dagoni shaakwiile aasi mafumala mu moni tse sanduuku iye kamakaambila y'Omukasya. Baryo benyusa Dagoni baamwiisayo mu shifwo sheewe.

⁴Ne luundi ndi kumutikhinyi kukweelakho kwe shifukhu shishiindi, baanyoola ndi nga shifwaani sha Dagoni shaakwiile aasi mafumala mu moni tse sanduuku iye kamakaambila y'Omukasya. Ne kumuluundi kuno, kumurwe ni kamakhono ke shifwaani sha Dagoni nga byaabuumbulukhilekho, byakwiile iyo byonyene amulyaango, ni kusiintsa kukuuramile kwe kumubili nga nakwo nga kwaakwiile kuliiyo kwonyene.

⁵Shino nisho shishiikila khukhwoolesa ni shaleelo, basaayi ba wele Dagoni, ni babaandu babenjila mu lisaayilo lyeewe i Ashidodi, balekha khusaambakho khu shifwo isho namwe khuushikyeendelakho ta.

⁶Umukasya waawa babaandu be mu Ashidodi ni bisiintsa bibibotokheleelewo shitaambiso shiikali. Yabayo shiriisa shikali, lwe babaandu khuururaka kamarurise khu mibili kyaabwe.

⁷Lwanyuma lweebyo bibyaboolakho, babaandu be mu Ashidodi ni baabona baryo, baaloma bari, “Wele wa Isiraeli niye ukhuwa ifwe ni wele weefwe Dagoni shitaambiso yuno. Ni nashiryo, isanduuku yino iye kamakaambila siyakhiile khuuba ano ni nafwe luundi ta.”

⁸Baryo baaruma baarume khuutsya khulaanga baawuli be Bafirisitiya boosi baabareeba bari, “Isanduuku iye kamakaambila iya Wele wa Isiraeli, khukikhole khuryeena?” Baawuli baabeelamo bari, “Isanduuku iye kamakaambila iya Wele wa Isiraeli nimukiyile i Gasi.” Baryo nabo baakiyila mu shiriimba she Gasi.

⁹Ne ni baamala khuukyolesayo, Umukasya waawa babaandu be mu shiriimba isho boosi shitaambiso khuururaka kamarurise khu mibili kyaabwe. Babaandu be Gasi nabo baaba ni khuurya khuukali naabi.

¹⁰Isho shaakila ndi isanduuku iyo iye kamakaambila iya Wele, baakiyila i Ekuroni, shishaba shiriimba shishiindi she Bafirisitiya. Ne ni boolesa isanduuku iyo i Ekuroni, babekhali b'eyo baalilila angaaki luukali nga baloma bari, “Nio ndi baareera ino isanduuku iye kamakaambila iya Wele wa Isiraeli, akhuhese nafwe fweesi!”

¹¹Baryo nabo baarumana baarume khuutsya khulaanga baawuli be Bafirisitiya, baabaloma bari, “Nimwiiseyo isanduuku iye kamakaambila iya Wele, mukire mu shifwo shayo. Nio ilekhe khukhwiira ifwe ni babaandu beefwe ta.” Shaba shiryo lwekhuuba yabayo shiriisa she khuufwa shikali mu shiriimba shoosi, nga Wele abawa shitaambiso.

¹²Ni babaandu boosi babaarama nga baalamu, baaba bataambisikha busa lwe kamarurise. Babaandu boosi be mu shiriimba baalilila ba wele baabwe lwe buyeeti.