Read lumasaaba 1 Samweli 7 Bible Online

1 Samweli 7 - lumasaaba bible

1 Samweli 7

¹Baryo babaandu be Kiriyasuyalimu bayila isanduuku iye kamakaambila y'Omukasya, bakira mu ntsu ya Abinadabu, iyaba khu lukiingi. Baarobola umusooleli weewe Eliyazari khuuba nga niye ukilolelela.

²Isanduuku yino iye kamakaambila y'Omukasya yaamenya i Kiriyasuyalimu imbuka indeeyi naabi, khukhwoolesa kimiiko nga kamakhumi kabili kamabuufu. Mu mbuka nyene iyo, ba Isiraeli baarama nga baayiwunamila busa mu mutaambo, nga balilila Umukasya khuubayeeta.

³Shifukhu shitweela, Samweli waalomela babaandu ba Isiraeli boosi ari, “Inywe khukhwokyesanisa nga ilala mulikho mukobola isi Umukasya ni kumwoyo kweenywe kwoosi, ni murusewo ba wele be kamanaambo kakaandi ni ba Ashitaroosi boosi. Mushuukhe mwiile isi Umukasya, mumwiisaaye niye yenyene, ni naye kane abawonese khukhwaama isi Bafirisitiya.”

⁴Baryo ba Isiraeli boosi barusawo bifwaani bya Bayaali, ni bya Ashitaroosi, baarakikha luundi khukhwisaaya Umukasya yenyene.

⁵Kila Samweli aloma ari, “Boolela ba Isiraeli boosi babuusanile i Mizupa, ni nase kane imbaloombele isi Umukasya khulweenywe.”

⁶Baryo ba Isiraeli boosi babuusana i Mizupa ni Samweli nga umuraangilisi waabwe. Kila bataha kameetsi bakatsukhayo nga shiwaanwa isi Umukasya. Baryo babuya ntsala shifukhu isho shoosi, khukhwokyesanisa kumutaambo kwaabwe, nga bebiiyisa bari, “Ifwe khwayonakisa isi Umukasya.”

⁷Bafirisitiya ni baashiwulila bari ba Isiraeli babuusaniile i Mizupa, bayiinga be Bafirisitiya benyukha ni kamaye kaabwe khuutsya khubebwakala. Nabo ba Isiraeli ni baashiwulilakho baryo, baarya naabi.

⁸Kila balomela Samweli bari, “Ukhaakamisakho khuuloomba isi Umukasya Wele weefwe ta, niye ukane akhuwonese ifwe khukhwaama isi Bafirisitiya.”

⁹Aryo Samweli waabukula lisheese lilyaana, waaliwaanayo libuufu nga isaayilo intsokhe isi Umukasya. Kila aloomba isi Umukasya khuuyeeta ba Isiraeli, ni Wele naye waamwiilamo.

¹⁰Ne Samweli n'aba nga ashiwaanayo isaayilo intsokhe, Bafirisitiya besyeenda aambi khuubebwakala. Ne Umukasya weelamo nga akuula ni khuukuula khwe kamaani isi Bafirisitiya boosi. Baryo Bafirisitiya baayumbaala busa, baasalanila boosi, baaweelawo ilala.

¹¹Baryo basaani ba Isiraeli, baamayo i Mizupa, baaloondakho khu Bafirisitiya nga babatimisa, khukhwoolela ilala i Besikari, nga beera buli muselikhale yeesi isi bawaambakho.

¹²Lwanyuma Samweli waabukula libaale waalikhwiikha akari a Mizipa ni Sheni, waatwiikhawo lisiina ari Ebenezeri, nga aloma ari “Ni khukhwoolisa ari, Umukasya waakhuyeetile ifwe.” Kila balilaanga lisiina bari, “Libaale lye buyeeti.”

¹³Baryo baawula Bafirisitiya, baalekha khukhwiilayo luundi khuuluumba ba Isiraeli ta. Mu miiko kyoosi kyeesi Samweli aaba nga ali umuwuli, Umukasya aayeeta naabi ba Isiraeli, khuuwula Bafirisitiya.

¹⁴Ni biriimba byoosi byeesi Bafirisitiya baaba baawaamba khukhwaama khu ba Isiraeli, khukhwaamila ilala i Ekuroni khukhwoola i Gasi, byakobosebwa isi ba Isiraeli. Baryo ba Isiraeli bekobosela liiswa lyaabwe abe lyeesi ba Firisitiya baababukula. Lwanyuma abawo lukoosi akari e ba Isiraeli ni ba Amori.

¹⁵Samweli waaba umuwuli wa Isiraeli biifukhu byoosi bye buulamu bweewe.

¹⁶Aryo buli mwiiko waatsya nga ebotokhelela mu biriimba byoosi khukhwaama i Beseli, i Gilugaali, ni Mizipa, nga akhala kimisaango mu bifwo byoosi mu Isiraeli.

¹⁷Lwanyuma welayo ingo weewe i Rama, ibweene iyo nayo isi aakhalatsakila kimisaango. Abe i Rama iyo nayo waayombekhayo shisheeso she khukhwisaayilakho Umukasya.