Read lunyole Luka 1 Bible Online

Luka 1 - lunyole bible

Luka 1

¹Owʼeŋono Tefiiro, abaatu bangi baŋandiihire hu biitu ebi Yesu atiinire nʼahola mu fe.

²Baŋandiihire ni batambisa ebibono byʼabo ababyeboneraho nʼemoni jaawe ohuŋwera erala oludaayi ngʼolu gatandiha obuŋeeresa buwe era basasaania nʼehibono ehyo mu baatu.

³Olwʼehyo, oluvanyuma lwʼohwendulirisa mu wiijufu hu hiisi hiitu ehibayeŋo keesi kuŋadiihira ewʼeŋono Tefiiro ebibono ebiroose obulaŋi ebyolereeye mu fe,

⁴ko weesi ofaanie ehituufu ehiŋamba hu bibono ebi bahusomesa.

⁵Mu himanga ehi habaha Herode gaali nʼaŋuga Buyudaaya, ŋaaliŋo omusengi wa Hatonda oyu balanganga baati Zakaliya owomu hibbubbu hyʼabasengi ehi balanganga baati Abbija. Omuhasi wuwe gaali njʼElizabbeesi yeesi owaali nʼaŋwa mu lulyo lwʼabasengi ba Hatonda, owomu lusaga lwʼAlooni.

⁶Abaatu bano bombi baholanga biruŋamu mu moni ja Hatonda Musengwa era ni badembuhira amagambi nʼebiragiro bibye byosibyosi.

⁷Aye baali baŋuma mwana olwohuba Elizabbeesi gaali mugumba, nindi bombi ni basahuluŋire.

⁸Lulala ehibinja ehi Zakaliya gaŋeerehesangamo ngʼomusengi mu moni ja Hatonda ni hyali hu luŋalo,

⁹abahye bamwangala ni bahubba ahalulu ngʼolu ekola yaawe yaali, aje adunyise obubbaani mu Yekaalu ya Hatonda Musengwa.

¹⁰Ehimanga ehyʼohudunyisa obubbaani ni hyola, abaatu bosibosi baali bahumbeene ebulafu wa Yekaalu ni basaba.

¹¹Ngʼaŋo mu himanga ehyene ehyo Zakaliya abona malayika wa Hatonda Musengwa ni gemereeye hu lubega lwʼomuhono omulungi ogwʼehituuti ohubadunyihisanga obubbaani.

¹²Zakaliya ni gamubona gesinduha bugali weene, nga nʼobuti wumuŋamba.

¹³Aye malayika oyo ngʼamuloma ati, “Zakaliya, otatya olwohuba Hatonda aŋuliiye ohusaba huhwo. Era omuhasi wuwo Elizabbeesi aja huhusaalira omwana omuseere, olimuguliha esiina oti Yowaane.

¹⁴Omwana oyo, aligira waaba nʼesangaalo nʼohusaŋalya era abaatu balisangaala olwʼohusaaliwa huhwe,

¹⁵olwohuba anaahabe mwegingihiriri mu moni ja Hatonda Musengwa. Era saagesangaho ohunywa omwenge gwomu mizabbibbu wayire ehiitu hyosihyosi ehimeesa. Omwoyo Omutukuvu anahamumaamire ohuŋwera erala mu hida hya nyina.

¹⁶Era aligira Abayisirayiri bangi bebbwaga baagobola eyiri Hatonda Musengwa yaawe.

¹⁷Aliba nʼamaani gʼOmwoyo Omutukuvu hyʼEriya era njʼalyeheerera ohuuja ohweyulira Musengwa engira. Alifaŋania abaana nʼabasaawe, era aligobosa abaatu abajeemera Hatonda mu ngira eyʼobugwalaafu, nʼabategeha olwʼohuuja hwa Musengwa.”

¹⁸Ngʼaŋo Zakaliya abuusa malayika oyo ati, “Hiina ehihahasa hiiti ehi oloma hinaholerere? Ese nʼomuhasi wange hwesahuluŋiiye.”

¹⁹Ngʼaŋo Malayika amugobolamo ati, “Ese, ndiise Gabbudyeri, aba mu moni ja Hatonda ni muŋeeresa. Hatonda gaatumire ohuhulomera amaŋuliro gano amalaŋi.

²⁰Aye olwʼohubuusabuusa ebi kulomera, sooja hugobolayo huloma ohwola olu Hatonda anahabyoherese ehiseera hyʼabo ni hyolire.”

²¹Mu hiseera ehyo, abaatu baali ebulafu ni bahuumiriiye Zakaliya era ni bebuusa ehimwolireho.

²²Zakaliya ni gatula, gaali saahiŋanga huloma aye nʼagesya hugesya nʼengalo. Ngʼabaatu bahifaania baati gaali asunire ohwolesewa.

²³Olugobo lulwe olwʼohuŋeeresa mu Yekaalu ni lwaŋwaho, nga gagamayo ewuwe.

²⁴Ŋabitaŋo ehiseera ngʼElizabbeesi omuhasi wuwe aba hida, ngʼahena emyesi etaanu nʼatebonesa mu baatu.

²⁵Ngʼaŋo aloma ati, “Hatonda Musengwa gapambiiye ehisa mu hiseera hino gaatusaho eduho eryʼobugumba.”

²⁶Elizabbeesi nʼali hida ehyʼemyesi mukaaga, Hatonda gatuma Malayika Gabbudyeri mu hibuga ehi balanga baati Nazaleesi mu twale lyʼe Galilaaya,

²⁷eyiri omuhaana ataŋenyuhangaho nʼomusinde oyu balanga baati Malyamu owaali nʼaja hufumbirwa omusinde oyu balanganga baati Yosefu era gaali aŋwa mu lulyo lwa habaha Dawudi.

²⁸Malayika oyo ngʼamuloma ati, “Oli otye ewe omuhoda wa Hatonda? Oli nʼekabi era Hatonda Musengwa ali ni neewe!”

²⁹Ebibono ebyo byeŋunjisa Malyamu bugali weene, ni gebuusa ehi bitegeesa.

³⁰Ngʼaŋo Malayika amuloma ati, “Malyamu, otatya olwohuba osunire obuhoda eyiri Hatonda.

³¹Oliba hida wasaala omwana museere, olimuguliha esiina oti nje Yesu.

³²Omwana oyo, aliba nʼobuŋangi era balimulanga Mwana wa Hatonda oyo Owaŋamugulu Bugali. Hatonda Musengwa alimuŋa obuŋugi hyʼowa Dawudi sehulu wuwe.

³³Aliŋuga Yisirayiri emirembe nʼemirembe era obuŋugi buwe sibuliŋwaŋo.”

³⁴Nga Malyamu abuusa malayika oyo ati, “Naahabe tye hida, ese otaŋenyuhangaho nʼomusinde?”

³⁵Nga Malayika amugobolamo ati, “Omwoyo Omutukuvu anahahumaamire ngʼamaani ga Hatonda Owaŋamugulu Bugali gahuujaho, ngʼoba hida. Olwʼehyo omwana oyu olisaala aliba mwawufu era aliba Mwana wa Hatonda.

³⁶Nʼomulebe wuwo Elizabbeesi oyu babaaye ni balanga omugumba, yeesi aja husaala omwana mu busahulu buwe era guno aŋira omwesi gwa mukaaga nʼali hida.

³⁷Olwohuba ŋaŋuma ehihaya Hatonda.”

³⁸Nga Malyamu aloma ati, “Ese ndi muŋeeresa wa Hatonda Musengwa. Hahibe hiityo hu ese ngʼolu olomire.” Ngʼaŋo Malayika aŋwaŋo getiinira.

³⁹Mu hiseera ehyene ehyo, Malyamu genyoheramo gaŋamba olugendo gatiina mu hibuga mu twale lyʼe Buyudaaya mu ehyalo hyʼesozi eyi Zakaliya gamenyanga.

⁴⁰Ni goola gengira mu nyumba ya Zakaliya ngʼaheesa Elizabbeesi.

⁴¹Wangewe, Elizabbeesi ni gaŋulira Malyamu nʼamuheesa, ngʼomwana asamba mu hida. NgʼOmwoyo Omutukuvu amaamira Elizabbeesi.

⁴²Ngʼaŋo Elizabbeesi olwʼesangaalo aloma nʼejanjaasi eryaŋamugulu ati, “Hatonda ahuŋaaye ekabi ohuhira abahasi bosibosi era nʼomwana oyu oja ohusaala yeesi ali nʼekabi.

⁴³Ko ndiise ani, ewe oja huba nyina ya Musengwa ohuupa eŋono lino eryʼamaani ohucaalira?

⁴⁴Olu puliiye ejanjaasi liryo ni bukeesa, omwana asambire mu hida olwʼesangaalo.

⁴⁵Oli nʼekabi olwʼohufugiirira oti ebi Hatonda Musengwa gaaloma bija hwolerera.”

⁴⁶Ngʼaŋo Malyamu aloma ati, “Mu mwoyo gwange njumirya Hatonda Musengwa.

⁴⁷Nʼobulamu wange busangaafu olwa Musengwa Omunoŋosi wange,

⁴⁸olwohuba gapambiiye ehisa ese omuŋeeresa wuwe aŋumaho naŋaali. Ohuŋwa ŋaahani abaatu aba hiisi mulembe, bananangenga wʼekabi,

⁴⁹olwohuba Hatonda omwene buŋangi era omwawufu gakoleeye ebihulu.

⁵⁰Ohuŋwa mu hiisi mulembe ogubaluhaŋo ehisa hihye hiba eyiri abo abamutya.

⁵¹Alagire obuŋangi wuwe owʼamaani mu byamaliholiho ebi ahola, ni goŋania abeŋeegaho baati njʼabahihenaho.

⁵²Aŋanuuye abaŋugi hu buŋugi aye genyosa abeŋomeha gabaŋa obubbala.

⁵³Geguhise abayala nʼebiraŋi, aye abo aberanga abaŋinda gabagamirisaho engalo ni jirereeja.

⁵⁴Ayedire Yisirayiri abaatu babe abamuŋeeresa abahebuliiye gaba nʼohusasira,

⁵⁵eyiri Yibbulayimu nʼolusaaye lulwe emirembe nʼemirembe, ngʼolu gahisuubisa abasehulu beefe.”

⁵⁶Nga Malyamu amenya nʼElizabbeesi emyesi ngʼedatu, nga ko gaagama engo.

⁵⁷Endaalo ejʼohusaala ni joola, ngʼElizabbeesi asaala omwana omuseere.

⁵⁸Abaliranwa nʼabalebe babe ni baŋulira ngʼolu Hatonda Musengwa amuŋambiye ehisa gamuŋa omwana, nga boosi basangaala.

⁵⁹Omwana ni gaŋesa endaalo munaana, nga batiina ohumuhomola. Baali baja humuguliha esiina lya semwana baati nje Zakaliya.

⁶⁰Aye nyina ngʼaloma ati, “Bbe, humugulihe huuti nje Yowaane.”

⁶¹Nga bamuloma baati, “Mu lulyo lulwo muŋumamo muutu kadi mulala oyu baguliha esiina eryo!”

⁶²Ngʼaŋo beeyedesa obubonero ohubuusa semwana yʼomwana esiina eri genda bamugulihe.

⁶³Zakaliya ngʼasunga ehipande ehyʼohuŋandiihaho, ngʼaŋandiiha ati, “Esiina lyʼomwana nje Yowaane.” Bosibosi nga beŋunja.

⁶⁴Aŋo ni naaŋo nga Zakaliya geguha omunwa era nʼolulimi lulwe nga luboŋoloha, ngʼatandiha ohuloma nʼajumirya Hatonda.

⁶⁵Hino hyaleetera abaliranwa babe bosibosi ohweŋunja. Era ngʼebibono bino bihwana hu ŋingi jʼe Buyudaaya josijosi.

⁶⁶Bosibosi ababiŋulira, bebuusanga abeene nʼabeene baati, “Omwana ono anaahabe muutu wa ngeri hi?” Baaloma baatyo olwohuba Hatonda Musengwa gaali ni naye.

⁶⁷Ngʼaŋo Omwoyo Omutukuvu amaamira Zakaliya semwana ya Yowaane ngʼaŋa obunaabbi nʼaloma ati,

⁶⁸“Hujumirye Hatonda Musengwa wa Bayisirayiri, olwohuba ahyaliiye abaatu babe era abanunuuye.

⁶⁹Atuŋaaye Omunoŋosi owʼamaani ohuŋwa mu lulyo lwa Dawudi omuŋeeresa wa Hatonda, atunoŋole

⁷⁰ngʼolu gasuubisa ahale nahale nʼabita mu banaabbi babe abagwalaafu,

⁷¹atunoŋole ohuŋwa eyiri abasigu beefe, nomu muhono gwabo bosibosi abatatwenda.

⁷²Ngʼolu gasuubisa ohuŋambira abasehulu beefe ehisa era gahebulira endagaano yiye eyʼenjabulo

⁷³mu hirayiro ehi galayirira sehulu yeefe Yibbulayimu, ati alitununula ohuŋwa mu ngalo jʼabasigu beefe

⁷⁴ko humuŋeerese ni huŋuma hutya,

⁷⁵mu bugwalaafu era ni hwolereeye mu moni jije obulamu weefe bosibosi.

⁷⁶Ne ewe mwana wase, balihulanga naabbi wa Hatonda oyo Owaŋamugulu Obugali. Hiri hiityo olwohuba olitangiramo ohutiina ohweyulira Musengwa engira,

⁷⁷nʼohuleetera abaatu babe ohufaania engira eyʼobunoŋosi, Hatonda nʼabasoniŋa ebibi byawe,

⁷⁸olwʼehisasabirisi hihye ehingi, ehiriiha ohuŋwa mwigulu hyʼenjase eyʼeryuba ni liŋwayo,

⁷⁹ohwaduhira abali mu hiirema hyʼebibi nʼehisisigo hyʼolumbe, nʼohutuluŋamya mu ngira ereeta emiyaaya.”

⁸⁰NgʼOmwana ahula mu hirangi nomu bulamu wuwe owʼomwoyo era gamenyanga mu lulafu ohwola olu gatandiha ohulomera Abayisirayiri ehibono hya Hatonda.