Read lunyole Yowaane 14 Bible Online

Yowaane 14 - lunyole bible

Yowaane 14

¹Nga Yesu aloma ati, “Muteŋendehereranga. Mute mu Hatonda owesige era keesi muutemo owesige.

²Ewa Bbaabba eriyo ebifo bingi era hiba ni hitali hiityo, nahabalomeeye. Era tiina ohubategeheera ehifo.

³Oluvanyuma lwʼohubategeheera, nja hugobola mberuhire, mwesi mube ni nange eyi nja huba.

⁴Mumanyire engira eyoola eyi ndi hutiina.”

⁵Ngʼaŋo Tomasi amuloma ati, “Musengwa, sihumanyire eyi oli hutiina. Huŋanga huutye ohumanya engira eyitiinayo?”

⁶Nga Yesu amugobolamo ati, “Ndiise engira, nʼamazima nʼobulamu. Ŋaŋuma atiina eyiri Bbaabba, ohutusaho nʼabitiire mu ese.

⁷Mbalomera ehituufu ti mubanga ni muumanyire,[17] mwahali mumanyire ni Bbaabba yeesi. Ohuŋwa hatyane mumumanyire era muhenire ohumubona.”

⁸Nga Filipo aloma Yesu ati, “Musengwa, tulage Bbaabba wuwo era ehyo hinatuhene.”

⁹Nga Yesu amugobolamo ati, “Filipo, buhye menye ni nenywe ahamanga ahaaga aŋo, ohiiri hutegeera? Hiisi owumbona, aba aweene Bbaabba. Lwahiina wundoma oti, ‘Tulage Bbaabba wuwo?’

¹⁰Soofugiirira oti ese ndi bulala ni Bbaabba, ni Bbaabba yeesi ali bulala ni neese? Ebibono ebi mbalomera, sibyange hu wange aye Bbaabba ali mu ese njʼahola emirimo jije, nʼabitira mu ese.”

¹¹“Mufugiirire ni mbalomera ti ese ndi bulala ni Bbaabba, ni Bbaabba yeesi ali bulala ni neese. Ni hitaba hiityo, mumale gafugiirira olwʼebyamaliholiho ebi kola.

¹²Mbalomera ehituufu ti hiisi owufugiirira, aja huhola ebyamaliholiho nʼohuhiraho bino ebi kola, olwohuba ndi hutiina eyiri Bbaabba.

¹³Era hiisi ehi munasungenga ni mutambisa esiina lyange nja huhibaŋanga ko hireetere abaatu ohuŋa Bbaabba eŋono.

¹⁴Era ni munasungenga ehiitu hyosihyosi ni mubita mu siina lyange, nahibaŋenga.”

¹⁵Nga Yesu aloma abeegi babe ati, “Ni muba ni munyenda, munaŋambenga ebiragiro byange.

¹⁶Era nja husunga Bbaabba, abaŋe Omuyeedi owundi, aja hubanga ni nenywe emirembe nʼemirembe.

¹⁷Omuyeedi oyo njʼOmwoyo aloma amazima agaŋamba hu Hatonda. Abaatu abandi sibaŋanga humufugiirira, olwohuba sibamutegeera era sibamumanyire. Aye enywe mumumanyire olwohuba ali mu enywe era anaabenga ni nenywe.”

¹⁸“Sinja hubaleha hyʼabafuubbi, nja hugobola ohuba ni nenywe.

¹⁹Mu hiseera ehitali hyaŋale, abatafugiirira sibaja humbona aye enywe muja humbona. Olwohuba nja hulamuha, mwesi muja huba balamu emirembe nʼemirembe.

²⁰Hu ludaalo olwo ni ndamuhire, mulitegeera muuti ndi bulala ni Bbaabba, mwesi muli bulala ni neese era keesi ndi bulala ni nenywe.

²¹Oyo owunyenda, afugiirira ebiragiro byange, gaahena gabiŋamba. Era Bbaabba aja hwenda oyo owunyenda, keesi nja humwenda kene mwehwehulire gategeere.”

²²Ngʼaŋo Yuda, ola atali Yisikaryoti, aloma Yesu ati, “Musengwa, lwahiina wenda ohutwehwehulira huhutegeere, aye sosi abaatu abatahufugiirira?”

²³Nga Yesu amugobolamo ati, “Hiisi owunyenda, aja huŋamba ebisomesa. Bbaabba aja humwenda. Era ese ni Bbaabba, huja hutiina eyi ali hube ni naye.

²⁴Oyo atanyenda, saaŋamba ebisomesa. Bino ebisomesa sibyange aye bya Bbaabba omwene oyo owaatuma.”

²⁵Bino byosibyosi mbiromire ni kiiri ni nenywe.

²⁶Aye Omuyeedi oyu Bbaabba alituma mu siina lyange, era nga njʼOmwoyo Omutukuvu alibasomesa era gabahebulisa byosibyosi ebi mbalomeeye.

²⁷Ale ngʼolu ndi hutiina, emiyaaya jibe ni nenywe. Emiyaaya eji mbalehera sijiri hyʼeji baatu baŋa. Olwʼehyo simweŋendehereranga era simutyanga.

²⁸“Muŋuliiye ni ndoma ti ‘Ndi hutiina aye nja hugobola. Era singa mubaaye munyenda, mwahasangaaye ese ni tiina eyiri Bbaabba, olwohuba gaakiraho eŋono.’

²⁹Mbalomeeye ehyo ni hihiiri hubaŋo, ni hiribaŋo ko musobole ohufugiirira.

³⁰Sinja hweyongera huloma ni nenywe, olwohuba Sitaani aŋuga ehyalo hino alihuuja ohumbwagala aye gapumaho buŋangi wosiwosi.

³¹Cooka abaatu abatafugiirira bali nʼohuhimanya baati nenda Bbaabba era olwʼohumwenda, ehigandagira cʼehi kola.” Ngʼaŋo aheneresa nʼaloma ati, “Ale ni mwinyohe, hutiine.”