Read lunyole Yowaane 15 Bible Online

Yowaane 15 - lunyole bible

Yowaane 15

¹Ngʼaŋo Yesu aloma abeegi babe ati, “Ndiise omuzabbibbu omwene nʼomwene era Bbaabba njʼomulimi omwenegwo.

²Asalaaho hiisi lusaga olutaama bibala, aye olwama alusabagulya ko lweyongerere erala ohuleremala.

³Enywe ŋaahani muli hyʼolusaga olu bahena ohusabagulya olwʼohufugiirira ebibono byange.

⁴Olwʼehyo, musigale ni muli bulala ni neese, keesi nja husigala ni ndi bulala ni nenywe. Olusaga lwʼomuzabbibbu siruŋanga hwama ebibala ni luli ŋa lwoŋene ohutusaho ni lusigaaye hu hiholo. Mu ngeri njʼenyene, ni nenywe mwesi simuŋanga huhola ebi Hatonda genda ohutusaho nga muli bulala ni neese.”

⁵“Ndi hyʼomuzabbibbu, enywe muli hyʼamasaga. Singa musigala ni muli bulala ni neese, keesi ni ndi bulala ni nenywe, muja hwama ebibala bingi. Aŋaŋuma ese, eŋuma ehi muŋanga ohuhola.

⁶Singa simusigala ni muli bulala ni neese, muja huba hyʼolusaga olu batema hu hisaala badanya. Ni lwoma, balwohya omuliro.

⁷Singa musigala ni muli bulala ni neese era mwaŋamba ebibono byange, ni munasungenga hyosihyosi ehi mwenda, munahisunenga.

⁸Abaatu baja huŋa Bbaabba eŋono singa mwama ebibala bingi ohulaga muuti muli beegi bange.”

⁹Ngʼolu Bbaabba ganyenda, keesi pombenda tyo. Musigale ni muli bulala ni neese ko neyongere ohubenda.

¹⁰Singa mugondera ebiragiro byange, muja husigala ni muli bulala ni neese ko neyongere ohubenda ngʼolu ese ngondera ebiragiro bya Bbaabba yeesi geyongera ohunyenda.

¹¹Mbalomeeye ebiitu bino ko mube nʼesangaalo hyʼeryange era mube ni nalyo mu wijuufu.

¹²Ehiragiro ehi mbaŋa cʼehino ti: mwendanenga ngʼolu ese mbenda.

¹³Ŋaŋuma ali nʼohwenda ohuhira ohwʼomuutu aŋayo obulamu wuwe olwʼabameeri babe.

¹⁴Singa mugondera ebiragiro byange, muba bameeri bange.

¹⁵Simbalanga baŋeeresa olwohuba omuŋeeresa saamanyire ehi musengwawe ahola. Aye mbalanga bameeri bange, olwohuba nabalomera byosibyosi ebi Bbaabba gandomera.

¹⁶“Si ndinywe omwasalaŋo ohuba abeegi bange aye ese ndiise onabatobola mube beegi bange, nga kena mbatuma mutiine mwame ebibala ebija hubaŋo emirembe nʼemirembe. Era hiisi ehi munasungenga Bbaabba mu siina lyange, anabaŋenga.

¹⁷Ehi mbalagira cʼehino ti, mwendanenga.”

¹⁸“Abaatu ni babacaawanga, muhebuliranga muuti beeheerera hucaawa ndiise.

¹⁹Singa mubaaye hya nibo, bahabendire. Aye olwohuba nʼabatobola ohutaba hya nibo, cʼehifa babacaawa.

²⁰Muhebulire ebi nʼabalomera ti ŋaŋuma mwidu ahira musengwawe eŋono. Obanga bakiyaania ese Musengwa yenywe, baja hubahiyaania mwesi. Abagondera ebisomesa, baja hugonderanga nʼebyenywe.

²¹Baja hubabisya baatyo olwʼese, olwohuba sibamanyire owaatuma.”

²²“Mba ni taaja nabalomera obuhwenda ohuŋwa eyiri Bbaabba, bahaŋumire musango. Aye ŋaahani baŋuma hyahweŋambya ohuguŋunuha olwʼebibi byawe.

²³Hiisi owucaawa, acaawa ni Bbaabba yeesi.

²⁴Mba ni taahola ebyamaliholiho ebi bandi baatahola, bahaŋumireho hibi. Aye babyeboneyeho ne baacaawa ese ni Bbaabba.

²⁵Aye bahola ebyo ohwoheresa ehyaŋandiihiwa ehiroma hiiti, ‘Baacaawira wereere.’ ”

²⁶“Omuyeedi oyu ndibaŋindihira ohuŋwa ewa Bbaabba nʼaliija, Omwoyo alomera abaatu amazima agaŋamba hu Bbaabba, era alibalomera ebipambaho.

²⁷Era ni nenywe muli nʼohulomera abaatu ebipambaho, olwohuba mubaaye ni nange ohuŋwa mu hutandiha.”