Read lunyole Yowaane 18 Bible Online

Yowaane 18 - lunyole bible

Yowaane 18

¹Yesu ni gahena ohusaba atyo, ngʼasimbuha atiina nʼabeegi babe bambuha ahalungu ahabalanga baati Kedulooni. Ngʼaŋo boola mu ndimiro yʼemisaala emizayiti nga baba omwo.

²Yuda owamulyamo oluhwe, gaali amanyire ehifo ehyo olwohuba emirundi mingi Yesu nʼabeegi babe bahumbaanirangamo.

³Nga Yuda atiina mu ndimiro eyo nʼatangiriye ehibinja hyʼabasirikale nʼabahuumi ba Yekaalu abʼabatangirisi bʼabasengi ba Hatonda nʼAbafalisaayo baatuma. Era baali baŋambire etooki nʼetaala ko nʼebisoosa.

⁴Cooka Yesu gaali amanyire ebyo ebyali ni bija humwolaho, olwʼehyo nga getusayo ababuusa ati, “Njʼani oyu mwendula?”

⁵Ngʼaŋo bamugobolamo baati, “Hwendula nje Yesu omusaale wʼe Nazaleesi.” Nga Yesu abaloma ati, “Ndiise oyu.” Yuda owamulyamo oluhwe gaali gemereeye aŋo ni nabo.

⁶Yesu ni gabaloma ati, “Ndiise oyu,” nga baagama hinyumanyuma bagwa ŋaasi.

⁷Nga nindi Yesu ababuusa ati, “Njʼani oyu mwendula?” Nga bamugobolamo baati, “Yesu omusaale wʼe Nazaleesi.”

⁸Nga Yesu abagobolamo ati, “Mbalomeeye ti ndiise ono. Ni muba ni mwendula ndiise, bano mubalehe betiinire.”

⁹Ebyo byaliŋo ohwoheresa ebi gaali nʼalomire ati, “Sinagosyaho wayire mulala hu abo aba waapa.”

¹⁰Mulala hu beegi babe oyu balanga baati Simooni Peetero gaali nʼepiima. Ngʼayisoŋolayo, atema hu mwidu wʼomuhulu wʼabasengi ba Hatonda ohutwi ohulungi. Omwidu oyo baali bamulanga baati Maluko.

¹¹Nga Yesu aloma Peetero ati, “Yagamyayo epiima yiyo aŋa yibaaye. Siwenda ese nywe hu hihopo ehyʼohubonaabona ehi Bbaabba gaategehera?”

¹²Ngʼaŋo ehibinja hyʼabasirikale nʼomuduumisi waawe nʼabahuumi ba Yekaalu baŋamba Yesu bamuhaada.

¹³Nga bamuŋira ewa Anaasi semwana yʼomuhasi wa Kayaafa omuhulu wʼabasengi ba Hatonda mu mwaha ogwo.

¹⁴Era njʼowaali nʼaŋaaye Abayudaaya amagesi ati hiraŋi omuutu mulala ohufiirira bosibosi.

¹⁵Nga Simooni Peetero nʼomwegi wahye owundi balonda hu Yesu. Olwohuba omwegi oyo gaali mumanye eyiri omuhulu wʼabasengi ba Hatonda, ehyo hyagira gamulondaho ohwola mu lunya ewomuhulu wʼabasengi oyo.

¹⁶Aye Peetero gasigala ebulafu gahuumira hu mulyango. Oluvanyuma, omwegi oyo owaali omumanye eyiri omuhulu wʼabasengi, gaagamayo ngʼaloma omuhaana owaali omuhuumi wohu mulyango amufugiirira gengisa Peetero mu lunya.

¹⁷Ngʼomuhaana oyo abuusa Peetero ati, “Weesi sooli mulala hu beegi bʼomusinde nago?” Nga Peetero amugobolamo ati, “Bbe.”

¹⁸Olwʼobuŋololohi, abaŋeeresa nʼabahuumi ba Yekaalu baali baŋweene omuliro hu hihoso ni bemerereeye ohuhyeswanigirisa ni boota. Peetero yeesi gaali ali hwota ni nabo.

¹⁹Ngʼaŋo omuhulu wʼabasengi ba Hatonda abuusa Yesu hu biŋamba hu beegi babe nʼebi abaaye nʼasomesanga.

²⁰Nga Yesu amugobolamo ati, “Mbayenga somesa abaatu mu lwijuuye mu mahumbaaniro nomu Yekaalu omu Bayudaaya bosibosi bahumbaaniranga. Eŋuma ehi ndomangaho mu ngiso.

²¹Lwahiina bumbuusa otyo? Buusa abo ababaayenga ni bapulirisa, olwohuba bamanyire ebi mbaye ni somesanga.”

²²Yesu ni galoma atyo, nga mulala hu bahuumi ba Yekaalu owaali ni gemereeye ohuupi ni naye amuhubba oluŋi hu tama ngʼahena amubuusa ati, “Eyo njʼengeri eyi ogobolamo omuhulu wʼabasengi ba Hatonda?”

²³Nga Yesu amuloma ati, “Oba ndomire bubi laga obubi wange aŋa buli. Aye hanye ndomire ebituufu, lwahiina wukubba?”

²⁴Ngʼaŋo ni bahimuhaadire, Anaasi aloma bamuŋire ewa Kayaafa omuhulu wʼabasengi ba Hatonda.

²⁵Simooni Peetero ni gaali ni gemereeye aŋo ni goota omuliro, nga ŋabaŋo owamubuusa ati, “Weesi sooli mulala hu beegi bʼomusinde nago?” Nga Peetero amuloma ati, “Ese kwegaana.”

²⁶Ngʼaŋo mulala hu beedu bʼomuhulu wʼabasengi ba Hatonda era mulebe yʼomusinde oyu Peetero gatemaho ohutwi, amuhamiirisa ati, “Sikubone nʼoli ni naye mu ndimiro yʼemisaala emizayiti?”

²⁷Nga nindi Peetero gegaana era mu hiseera ehyo ngʼengoho yiholyoha.

²⁸Ngʼaŋo mu mugamba pwipwipwi, abatangirisi bʼAbayudaaya baŋwa ewa Kayaafa, batangirisa Yesu bamuŋira ewa gavana Omurooma. Aye olwohuba ohwingirayo hwali huja hubafuula abatali bagwalaafu, hibaleetere ohutasaanira hulya Mbaga eyʼOhuhebuliriraho Ohubihisya, abatangirisi abo sibengira yibuwe. Bendire ohwehuuma batabbwaga magambi ko baŋange ohulya.

²⁹Ngʼaŋo Pilaato atula atiina aŋa baali ababuusa ati, “Omusinde ono mumuhaabya hi?”

³⁰Nga bamugobolamo baati, “Abanga nʼatasaaye musango, hani sihumuleete eyi oli.”

³¹Nga Pilaato abaloma ati, “Mumuŋire, mwabeene mumusalire omusango ni mwema hu magambi genywe.” Aye nibo nga bamugobolamo baati, “Sibatufugiirira husalira muutu yesiyesi ogwʼohufa.”

³²Hino hyaliŋo ohwoheresa ebibono ebi Yesu gaali nʼalomire ebiŋamba hu ngeri eyi gaali nʼaja ohufamo.

³³Ngʼaŋo Pilaato gagamayo mu lubiri alanga Yesu amubuusa ati, “Ndiiwe habaha wʼAbayudaaya?”

³⁴Nga Yesu amugobolamo ati, “Ehyo ohiroma hu lulwo, oba eriyo abahulomeeye ebipambaho?”

³⁵Nga Pilaato amugobolamo ati, “Koni ndi Muyudaaya? Mbona ti abaatu babo abeene nʼabasengi abahulu njʼabahuleetire eyi ndi. Osaaye musango hi?”

³⁶Nga Yesu amugobolamo ati, “Obuŋugi wange siwa hu hyalo huno. Singa hiri hiityo, hani abeegi bange basooye nʼAbayudaaya ohulobera ohupamba. Aye obuŋugi wange wʼenjabulo.”

³⁷Ngʼaŋo Pilaato amubuusa ati, “Ehi oloma oli habaha?” Nga Yesu amugobolamo ati, “Ngʼolu oloma olwo. Ehyo cʼehigira nasaaliwa era naaja hu hyalo huno ohulomera abaatu amazima. Hiisi owenda ohuba wʼamazima aŋulirisa ebyange.”

³⁸Ngʼaŋo Pilaato amubuusa ati, “Amazima cʼehiina?” Ni gahena ohumubuusa atyo, ngʼatula nindi atiina eyiri Abayudaaya abaloma ati, “Simbona musango hu musinde ono.

³⁹Aye kola yenywe ohubalehuliranga omusibe mulala mu biseera byʼEmbaga eyʼOhuhebuliriraho Ohubihisya. Ŋaahani, mwenda mbalehulire Habaha wʼAbayudaaya?”

⁴⁰Ngʼehiŋindi hyʼabaatu hyosihyosi higobolamo nʼejanjaasi eryʼamaani hiiti, “Bbe, sinje oyo, tulehulire nje Bbarabba!” Bbarabba oyo baali bamuŋambire ogwʼobujeemu.