Read lunyole Ebikolwa 20 Bible Online

Ebikolwa 20 - lunyole bible

Ebikolwa 20

¹Oluboyooboyo olwali mu hibuga hyʼEfeeso ni lwasima nga Pawulo atumisa abafugiirira Kurisito. Ni gahena ohubaloma ebibono ebi bagumya ngʼabaseebula atiina e Makedoniya.

²Ni goola eyo ngʼahyala mu hiisi hifo omwali abafugiirira nʼatiina nʼabagumya era ngʼagenda goola nomu twale lyʼe Buyonaani,

³eyi gahena emyesi edatu. Ni gaali nʼanatere ohusomoha ohutiina e Siriya ngʼaŋulira ati ŋaaliŋo Abayudaaya abaali ni bamwehobera ohumwitira mu ngira, ngʼasalaŋo ohubitira hu woomu e Makedoniya.

⁴Mu lugendo luno, Sopateri omusaani wa Puuro owʼe Bberoya nʼArisitaluuko ni Sekundo abaali ni basimuha mu hibuga Sesalonika ni Gaayo ohuŋwa e Derube ni Temuseewo ko ni Tukikasi ni Turofimo ohuŋwa mu twale lyʼAsiya bamuŋereheraho.

⁵Abasinde bano omusanvu batangiramo nga baja batuhuumira e Turoowa, ese ni Pawulo.

⁶Efe ababiri nga hugenda hwola mu hibuga Filipi. Oluvanyuma lwʼembaga yʼAbayudaaya eyi baliiraho Emigaati Eji batatayemo Ehisimbulusa hwasomoha ohuŋwa e Filipi hutiine e Turoowa. Mu ngira hwahenamo endaalo etaanu nga hwola hweŋimba hu bahyefe era nga huhenayo endaalo musanvu.

⁷Hu ludaalo olutagiiha mu wiiki[8] efe nʼabafugiirira abandi mu hibuga ehyo hwahumbaana ohubbwaga nʼohulya emigaati ni huhebulira ehyʼegulo ehyasembayo ehi Musengwa galya nʼabaloobera babe. Ni hwahena, Pawulo gaŋira ehiseera hireeŋi nʼaloma eyiri abafugiirira olwohuba gaali ategeha ohuŋwa mu hibuga ehyo ni buhyeye. Galoma ohwola esaawa mukaaga ejʼowiire.

⁸Ŋamugulu mu hisenge omu hwali mwalimo etaala enyene nyingi ni jaduha.

⁹Mu baali ni baŋulirisa ebi Pawulo gaali nʼaloma mwalimo omuseere oyu balanganga baati Ewutuuko. Omuseere oyo gaali gehaaye hu mwango gwʼedinisa eryali erigule eryʼehisenge omu hwali mu nyumba eyohudatu ŋamugulu mu kalina. Ngʼero liŋamba omuseere. Ni gaali nʼafiiriiye mwiro ngʼaŋanuha ohuŋwa eyo ŋa mugulu eyi hwali ngʼagwa ŋaasi era bamutusaŋo nʼafuuye.

¹⁰Pawulo ni ganiinuha gatiina aŋali omuseere oyo nga geeyala hu mulambo gugwe agufumbeerera ngʼahena aloma abaatu abaaliŋo ati, “Muteŋendeherera, Ewutuuko aliŋo mulamu.”

¹¹Pawulo ni gaagamayo ŋamugulu eyi hwali ni huhumbaaniiye ngʼabbwaga mu migaati hulya ni huhebulira ehi Musengwa gahola. Ni hwahena nga huŋaya huhyesa nga ko abaseebula asimbuha atiina mu lugendo lulwe.

¹²Bala nga bagamya Ewutuuko ewaawe emyoyo ni jibeehire olwohuba gaali mulamu.

¹³Ni hwaŋwa aŋo efe abandi nga hutiina huŋamba emeeri husomoha hutiina mu hibuga Asosi eyi hwali ni huuja hwagaanana ni Pawulo, olwohuba niye gaali aholire etegeha ohutiinayo nʼamagulu. Eyo peyi gaali nʼaja hutweŋimbiraho mu meeri.

¹⁴Ni gatweŋimbaho mu Asosi, nga husomoha hutiina mu hibuga hyʼe Mituleene.

¹⁵Ni wahya nga huŋwayo husomoha hutiina mu hifo ehyali ohuupi nʼe hizinga hyʼe Kiiyo. Hu ludaalo olwalondaho nga husomoha hutiina hu hizinga hyʼe Samusi. Hu ludaalo olwalondaho nga husomoha hwola mu hibuga hyʼe Mileto.

¹⁶Ni hwali ni hutiina hwabita hubita hu hibuga Efeeso. Hino hwahihola olwohuba Pawulo gaali ahenire ohusalaŋo ati sigenda hulwa mu twale lyʼAsiya. Gendire ni hiba ni hiŋangiha oludaalo lwʼembaga eyi balanga Petekoote lwole ni goolire e Yerusaalemu.

¹⁷Pawulo ni gaali nʼahiiri e Mileto ngʼatumisa bamulangire abatangirisi abaali ni batangirira ehibbubbu hyʼabafugiirira Kurisito mu Efeeso.

¹⁸Abatangirisi abo ni boola ngʼabaloma ati, “Mumanyire bulaŋi ngʼolu mbaayenga ni nebisya ahamanga hosihosi aha mbaaye ni nenywe ohuŋwera erala hu ludaalo olu noleraho mu twale lyʼAsiya.

¹⁹Mbaaye peeresa Yesu Musengwa nʼohweŋomeha ohwʼamaani era oluusi nʼohulira ni ndira amasiga olwʼabaatu ohugaanira mu bibi byawe. Mumanyire ngʼolu mbitire mu biseera ebigosi olwʼAbayudaaya abatafugiirira Musengwa ohunesoomera.

²⁰Muhimanyire ngʼolu mbaaye mwesigwa mu hubalomera obuhwenda wa Hatonda ni ŋaŋuma ehi ndehayo ehiŋanga ohuba ehyʼomugaso eyi muli. Aye mbayenga mbasomesa mu lwijuuye era ni tiina nyumba hu nyumba mu mago genywe.

²¹Mbaayenga ndomera Abayudaaya nʼAbatali Bayudaaya ti bateehwa ohwebbwaga bacuuhe baŋwe mu bibi byawe bagobole eyiri Hatonda era bafugiirire Musengwa weefe Yesu.

²²Ne ŋaahani mbalomeraho ti ndi hutiina e Yerusaalemu eyi Omwoyo Omutukuvu ali hunumiirisa ohutiina cooka eyi tamanyire ebinahanjoleho ni noolireyo.

²³Ohutusaho ti mu hiisi hibuga ehi nooliremo Omwoyo Omutukuvu gandabula ati ekomera nʼohubonaabona njʼebinindiiriiye.

²⁴Aye sifayo hu hinahanjoleho, nolu banjita banjite, kasita nʼaba ni mbubuuye omulimo ogu Yesu Musengwa gapambya, ndomere abaatu Amaŋuliro Amalaŋi agaŋamba hu ngeri eyi Hatonda atunoŋolamo olwʼehisasabirisi hihye.

²⁵“Ehiitu hindomera hiiti ŋaahani ŋaŋuma kadi mulala hunywe aba mbaaye ni ndomera Amaŋuliro Amalaŋi agaŋamba hu buŋugi wa Hatonda anahamboneho nindi.

²⁶Olwʼehyo, olwa leero hambalomere ti singa ŋaabaŋo mu nywe omubaaye ni muŋulira ebi mbuulira afiira mu bibi, simusango gwange.

²⁷Hiri hiityo olwohuba mbaaye sinekeka hubalomera byosibyosi ebi Hatonda genda muhole.

²⁸Enywe abatangirisi mwehuumenga ohutaŋwa hu hufugiirira era ni muyeeda nʼabafugiirira abandi bosibosi abʼOmwoyo Omutukuvu gabaŋambya ohulabiriranga. Ngʼolu omwayi alabirira ebyayo bibye, mwesi muutyo mulabirirenga ehibbubbu hyʼabafugiirira aba Hatonda[9] gesunira omwene nʼabita mu hufa hwa Yesu Kurisito hu musalabba.

²⁹“Manyire ti ni ndiba ni tiinire abaatu ababi abali hya nalaŋa aŋuma husasira baliija babeŋimbaho badulingadulinga abafugiirira.

³⁰Nomu nywe mwabeene muliŋwamo abaatu abalisomesa ebyʼobudulingi bagodamya abafugiirira babatusa hu hituufu olwʼohwenda babe balobera baawe.

³¹Olwʼehyo mwehuume ŋatabaŋo aŋwa hu hufugiirira! Era muhebulire muuti mu myaha edatu eji mbaaye ni nenywe mbaaye sindehera omuusi nʼowiire ohubalabula mu hino nʼamasiga nga pohu taaye.

³²“Ŋaahani mbaseebula ni mbaŋambya Hatonda abahuume era abayeede mwegumye ohufugiirira obuhwenda obuloma buuti atunoŋola lwʼehisasabirisi hihye. Obuhwenda obwo mbobuja hubaŋangasa mu hufugiirira Musengwa era bubaleetere Hatonda ohubaŋa ebiraŋi ebi gasuubisa abaatu bosibosi aba gagwalaasa bafuuha abaatu babe.”

³³Ese mbula bbeesa yʼomuutu, oba ebyambalo ebi mbaaye ni nduluhanira.

³⁴Ohutusaho mumanyire muuti ese omwene mbaayenga nefululuhanira nʼengalo jange jino nʼaŋanga ohweyemeresaŋo era naahena nayeeda nʼabahyange aba nabanga ni nabo.

³⁵Ebyo byosibyosi nabiholanga ohubalaga ti pohuseene ohuholanga huutyo emirimo konyo huŋange ohuyeedenga abataŋanga hweyeeda. Habuhyabuhya huli nʼohuhebuliranga ebibono bya Yesu Musengwa ebi galoma ati, “Ohugaba hulimo ekabi ohuhira ohunaaŋa ebi baba ni batuŋaaye.”

³⁶Pawulo ni gahena ohuloma ebibono ebyo, ngʼahoma ekumbo nʼabatangirisi abo bosibosi nga basaba.

³⁷Ni bahena nga hiisi mulala hu batangirisi abo aseebula Pawulo nʼamugwa mu hifuba nʼohulira ni balira amasiga.

³⁸Ehyasinga ohubalisya amangi njʼehibono ehi gabaloma ati baali sibaja humubonaho nindi. Ngʼaŋo bamuŋereheraho bamwosa hu mwalo aniina emeeri nga ko bagamayo.