Read lunyole Abarooma 12 Bible Online

Abarooma 12 - lunyole bible

Abarooma 12

¹Ŋaahani balebe bange, mbegayirira olwʼehisa hya Hatonda, mumuŋe obulamu wenywe bube eŋongo endamu eyi bamutoboleeye era emusangaasa. Eyo njʼengeri etuufu eyʼohumujumirya.

²Mutebisyanga hyʼabaatu bʼehyalo hino, aye muganye Hatonda acuuse emyoyo nʼepeega yenywe ko mufaanie ebi genda ngʼolu biri ebiraŋi, ebisangaasa era ebyolereeye.

³Olwʼehirabo ehi Hatonda gaapa olwʼehisasabirisi hihye, ndoma ti hiisi muutu hu enywe ateebona ati njʼohihenaho ate nga ko paanaŋo. Aye geŋeegengaaho mu kola endaŋi era geheberenga ni geema hu hufugiirira ohu Hatonda gamuŋa.

⁴Hiisi muutu ali nʼomubiri mulala era ni guli nʼebimesu bingi, aye ebimesu ebyo byosibyosi sibitamba mulimo njʼomwene.

⁵Mu ngeri njʼenyene, wayire nga huli bangi aye huli mubiri mulala mu Kurisito era hiisi muutu hu efe getaaga owahye.

⁶Huli nʼebirabo byenjabulo ngʼolu Hatonda gatuŋa olwʼehisasabirisi hihye. Singa omuutu aba nʼehirabo ehyʼobunaabbi, atiine mu moni nʼohulomera abaatu ehibono hya Hatonda nʼafugiirira ati ali humulomeramo.

⁷Ni huba huŋeeresa, afubenga ohuŋeeresa nʼomwoyo mulala, oba ohusomesa abaatu ba Hatonda, afubengaho ohubasomesa.

⁸Oyo ali nʼehirabo ehyʼohugobosangamo abahye amaani, afubengaho ohuhihola. Ali nʼehyohugaba, agabenga nʼomwoyo mulala. Ali nʼehyobuŋugi, aŋugenga nahenereye. Ni nooyo ali nʼehyohulaga ehyere, aholenga atyo naali musangaafu.

⁹Ohwendana hwenywe hubenga hwʼamazima. Mweŋalenga ehibi era mwegumyenga ohuholera abaatu ebiraŋi.

¹⁰Mwendanenga hyʼabalebe era hiisi muutu aŋenga owahye eŋono.

¹¹Mubenga baheneerefu era muŋeeresenga Musengwa nʼomwoyo mulala.

¹²Esuubi eri muli ni nalyo libaleetere ohuba nʼesangaalo, mwehalirihenga mu bigosi ebi mubitamo era mulombenga hiisi haseera.

¹³Mubugulenga hu bimuli ni nabyo mwayeeda abafugiirira bahyenywe abaŋuma hyahweŋambaho era musangaalirenga abageni mu mago genywe.

¹⁴Mutabaŋwaba abo ababahiyaania aye mubasabirenga ekabi.

¹⁵Musaŋalihisyenga ŋalala ni naabo abasaŋalya era mulirisenga abo ababa ni bali hulira.

¹⁶Hiisi muutu amenyenga mu bulala nʼabahye era mutehudumbasanga aye mube nʼomuhago nʼabaatu abʼedaala eryʼaŋaasi. Mutaŋeeganga muuti mbo ndinywe omuhihenaho.

¹⁷Omuutu anahuhola ehibi, ewe otamwegalula. Muholenga ebi abaatu bosibosi basiima baati biraŋi.

¹⁸Mufubenga ngʼolu hiŋangiha ohuhola ebiitu ebireeta ohumenya mu miyaaya nʼabaatu bosibosi.

¹⁹Bahyange, mutegalulanga muutu yesiyesi abahola ehibi, aye muleherenga Hatonda omwene gaaba njʼobegalulira. Olwohuba Musengwa aloma mu hyaŋandiihiwa ati, “Ohwegalula hwange, ndibesasula.”

²⁰Ngʼolu ehyaŋandiihiwa hiroma hiiti, “Enjala yinaba ni yiruma omulabe wuwo, omuŋanga ebiryo galya, era enduŋo yinaba nʼemuluma, omuŋa amaaji ganywa. Onahola otyo, anaahabe oŋeesa amanda agʼomuliro hu mutwe gugwe.”[8]

²¹Ehibi hitabaŋangulanga aye muhiŋangule ni muhola ebiraŋi.