Read lunyole 1 Abakoriiso 1 Bible Online

1 Abakoriiso 1 - lunyole bible

1 Abakoriiso 1

¹Ndiise Pawulo oyu Hatonda galanga olwʼohusiima huhwe ohuba muhwenda wa Yesu Kurisito. Ndi nʼowoluganda Sosinesi.

²Pandiihira enywe ehibbubbu hyʼabafugiirira ehiri mu hibuga Koriiso, abaatu abagatobola nʼabitira mu Kurisito ohuba ababe, ŋalala ni naabo bosibosi abali hiisi ŋaatu abesiga Yesu Kurisito Musengwa, Musengwa weefe hwesihwesi.

³Hatonda Seefe ni Musengwa Yesu Kurisito, babaŋambire ehisasabirisi era babaŋe nʼemiyaaya.

⁴Habuhyabuhya, neyaasa Hatonda olwenywe olwohuba gabajuhira ebirabo ebyʼOmwoyo bingi nʼabitira mu Yesu Kurisito.

⁵Ohubita mu Yesu Kurisito, Hatonda gabaŋa ebiraŋi bingi, muloma ehibono hihye era muli nʼohutegeera.

⁶Obuhwenda obuŋamba hu Kurisito buhomire emisi mu bulamu wenywe.

⁷Olwʼehyo, ni muhuumirira nʼesuubi, Yesu Kurisito Musengwa ohugobola, ŋaŋuma birabo byʼOmwoyo ebi muŋuma.

⁸Era Hatonda alibahuuma mwasigala ni muli bagumu ohwola hu komerero, ko muŋume musango hu ludaalo olu Yesu Kurisito Musengwa weefe aligobola.

⁹Hatonda owabalanga ohuba bulala nʼOmwana wuwe Yesu Kurisito Musengwa weefe, alibaŋa obugumu olwohuba mwesigwa.

¹⁰Aboluganda, hu lwʼobuŋangi wa Yesu Kurisito Musengwa weefe, mbasunga mube bulala mwesimwesi ko ŋaŋumengaŋo hweyabulayabula era mubeere erala bulala mu biŋeego nʼomutegeera yenywe.

¹¹Aboluganda, hino kiroma olwohuba balala hu bomu mago ga Kuloowe bandomera mbo musiiba muhuŋahana hu biŋamba hu batangirisi benywe.

¹²Ehi ndoma cʼehino; abandi mu enywe mbo muloma muuti Pawulo njʼomutangirisi wenywe, abandi baati Apolo njʼomutangirisi wenywe, abandi baati Keefa njʼomutangirisi wenywe, ko nʼabandi baati Kurisito njʼomutangirisi wenywe.

¹³Hambuseho, olwo Kurisito bamwabulamo? Bahomereraho Pawulo hu musalabba hu lwenywe? Oba bababatiza ni batambisa esiina lya Pawulo?

¹⁴Ndi musangaafu olwohuba simbatizangaho wayire mulala hu nywe, ohutusaho Kurisipo ni Gaayo.

¹⁵Olwʼehyo eŋuma asobola ohuloma ati bamubatiza mu siina lyange.

¹⁶Era nabatiza nʼamago ga Sitefanaasi. Ohutusaho abo, sikebulira ti nabatizaho omuutu owundi yesiyesi.

¹⁷Hiri hiityo olwohuba Kurisito sigaatuma hubatiza aye hulomera abaatu Amaŋuliro Amalaŋi ni taholera hu magesi gʼomuutu olwohuba sinenda ohufa hwa Kurisito hu musalabba hube hwawereere.

¹⁸Obuhwenda obuŋamba hu Yesu ohutufiirira hu musalabba buŋuma mahulu eyiri abo abagota olwohuba sibabutegeera, aye eyiri efe abali hunoŋoha, hiraga maani ga Hatonda.

¹⁹Hiri hiityo olwohuba hyaŋandiihiwa hiiti, “Ndisihiirisa amagesi gaabo abaŋeega baati bagesi, era tabuujule ohumanya hwʼabo abaŋeega baati bamanyire.”

²⁰Ni hiba ni hiri hiityo, omugesi ali ŋeena? Omusomesa wʼamagambi ga Hatonda ali ŋe? Oyo amanyire ohuŋahana owʼomulembe guno ali ŋeena? Ehituufu hiri hiiti, Hatonda alagire ati amagesi gʼabagesi mu hyalo hino, busirusiru wereere.

²¹Hiri hiityo olwohuba Hatonda mu magesi gage gahihola ngʼolu hisoboha, abaatu ohutamutegeera ni batambisa amagesi gaawe. Aye gasalaŋo ohunoŋola abaatu abamufugiirira nʼabita mu busirusiru wʼohubuulira Amaŋuliro Amalaŋi.

²²Abayudaaya benda baboneho ahabonero aheŋunjisa ohuhahasa ti hituufu. Aye Abatali Bayudaaya nibo benda ohuŋulira ebibono ebi baŋeega baati byʼamagesi.

²³Aye hubuulira Kurisito oyu bahomerera hu musalabba, ehiitu ehireetera Abayudaaya ohwegumula ne eyiri Abatali Bayudaaya, bya busirusiru.

²⁴Aye eyiri Abayudaaya nʼAbatali Bayudaaya aba Hatonda galanga ohuba abaatu babe, Kurisito alaga ati Hatonda ali nʼamaani era nʼamagesi.

²⁵Hiri hiityo olwohuba obusirusiru wa Hatonda buhira amagesi gʼabaatu era obunafu wuwe buhira amaani gaawe.

²⁶Aboluganda, muhebulire obulamu obu mwalimo ko Hatonda abalange ohuba abaatu babe. Batono hu enywe mwali abo aba baali ni baŋira baati mwali bagesi, era batono hu enywe mwali baŋugi era batono mwali ni mwasaaliwa mu mago amahombe.

²⁷Aye Hatonda gatobola abaatu ababalanga ababuyabuya olwʼohwenda ohuswasa aberanga abagesi. Era gatobola abo ababalanga abanafu olwʼohwenda ohuswasa abaŋeega baati bʼamaani.

²⁸Hatonda gatobola abaatu ohuŋwa mu mago agatali mahombe era ababatala ni babalanga ebitagasa, ko asobole ohusihiirisa abo abaŋeega baati bamugaso,

²⁹ko ŋaŋume owehudumbasa mu moni jije.

³⁰Hatonda njʼogira ni muli bulala ni Yesu Kurisito, owafuuha amagesi ga Hatonda ohutunoŋola, gatufuula abagwalaafu, abatobole era abanunule babe.

³¹Olwʼehyo, ngʼolu hyaŋandiihiwa hiiti, “Oyo owepaaha, gepaahenga olwa Musengwa.”