Read lunyole 1 Abakoriiso 13 Bible Online

1 Abakoriiso 13 - lunyole bible

1 Abakoriiso 13

¹Wayire ndoma mu endimi ejʼabaatu neja bamalayika, aye ni puma hwenda, mba hyʼehivuga ehiŋwamo ejanjaasi eritategereheha.

²Wayire mba nʼehirabo ehyʼobunaabbi era nʼohumanya namanya ebyama byosibyosi, era wayire mba nʼamagesi nʼohufugiirira ohugengula esozi, aye nga puma hwenda, mba puma mugaso.

³Wayire paayo ebyange byosibyosi ohuyeeda abagadi, era nʼohweŋaayo Neŋayo ohunjohya omuliro,[12] aye ni puma hwenda, ehyo hiba sihingasa.

⁴Ohwenda hugumikiriza era huli nʼehisa. Ohwenda huŋuma esaalwa, sihwepaahapaaha, sihwehudumbasa,

⁵huŋuma ehabyo, sihweyendesa ebiraŋi, huŋuma busungu owamangumangu, era sihweŋambirira hibi.

⁶Ohwenda sihusangaalira ebikolwa ebibi, aye husangaalira ebiitu ebituufu.

⁷Ohwenda hwehaliriha, hugumira ebigosi byosibyosi, sihuleheraŋo hufugiirira ti Hatonda asobola byosibyosi, mu biitu byosibyosi ohwenda huba nʼohusuubira nʼohugumikiriza.

⁸Ohwenda nihwo sihuhoma. Aye obunabbi bulyola ehiseera wahoma. Nʼehirabo ehyʼohuloma mu ndimi hija huŋwaŋo, nʼohumanya hwosi huhome aŋo.

⁹Hiri hiityo olwohuba humanyireho bidiidiri era nʼobunaabbi obuhuŋa sihubuhenayo.

¹⁰Aye ni hulisuna ebyene nʼebyene, ebindi ebyo birihoma aŋo.

¹¹Ni naali ni kiiri muŋere, nʼalomanga hyʼomuŋere, naŋeeganga hyʼomuŋere era ni mbona ebiitu hyʼomuŋere. Aye ni nahula, nga ebyʼobuŋere mbita ŋala.

¹²Hatyane hubona biroliroli. Aye ni hulitiina mwigulu, hulibona hiisi hiitu moni hu moni. Sitegeera hiisi hiitu mu wiijufu, aye hu olwo ndimanyira erala byosibyosi bulaŋi, ngʼolu Hatonda gamanyire mu wiijufu.

¹³Ebiitu biri bidatu ebija husigalaŋo emirembe nʼemirembe; ohufugiirira, nʼohusuubira, nʼohwenda. Aye ohwenda njʼohuhira byosibyosi.