Read lunyole Abagalatiya 1 Bible Online

Abagalatiya 1 - lunyole bible

Abagalatiya 1

¹Ndiise Pawulo omuhwenda wa Kurisito abaŋandiihira enywe abafugiirira Kurisito abali mu twale lyʼe Galatiya. Ese Pawulo sindi muhwenda olwohuba ti abaatu batobola oba omuutu obuutu ohuutuma. Aye ndi muhwenda olwohuba Yesu Kurisito ni Hatonda Seefe owamulamusa, njʼabanyangala era baatuma.

²Ese ko nʼabalebe bosibosi mu Kurisito abali ŋano hubahehiiseho enywe ebibbubbu byʼabafugiirira Kurisito mu Galatiya,

³Hatonda Seefe ni Musengwa Yesu Kurisito babaŋambire ehisasabirisi era babaŋe emiyaaya.

⁴Yesu Kurisito oyo olwʼohugera hwa Hatonda era Seefe, geŋaayo bamwita hu lwʼebibi byefe atunoŋole mu mulembe guno omubi.

⁵Ale abaatu baŋenga Hatonda oyo eŋono emirembe nʼemirembe, Amiina.

⁶Bahyange, hikenire efiiri hu mutwe ohuba ti musenguhire ohuŋwa hu Hatonda owabalanga mufuuhe baana babe olwʼehisasabirisi hya Kurisito oyu mwahafugiiriranga, mangumangu mwabbaamira hu somesa eyindi eyi babadulinga baati mbo yoosi maŋuliro malaŋi,

⁷ate nga ko panaŋo. Ehihulu hiri hiiti ŋaliŋo abaatu abali hubaŋwitania olwʼohwenda ohuhoohera ebyawe mu Maŋuliro Amalaŋi agaŋamba hu Yesu Kurisito.

⁸Aye ŋanabaŋo omuutu agesyaho ohubabuulira obuhwenda obundi obutali obwo obu hwabaleetera oludaayi, omuutu oyo nʼolwaba mulala hu fe abahwenda oba malayika ohuŋwa mwigulu, Hatonda amusyenanga!

⁹Ngʼolu hwahena ohubalomera, nindi kigobolamo ti, hanye ŋaliŋo omuutu ali hugesyaho ohubabuulira obuhwenda obundi owenjabulo hu bula obu mwafugiirira, Hatonda amusyenanga!

¹⁰Bino simbiroma olwʼohwenda ohweŋomya eyiri abaatu wabula olwʼohwenda Hatonda asiime ebi kola. Olwohuba singa kola ogwʼohweŋomya eyiri abaatu, aŋo mba sipanga huba muŋeeresa wa Kurisito owolereeye.

¹¹Aboluganda, nenda mumanye hino ti Amaŋuliro Amalaŋi aga ndomera abaatu sigahuseega buseege.

¹²Sinagasuna huŋwa hu muutu yesiyesi oba ti omuutu njʼowasomesa, ohutusaho Yesu Kurisito omwene njʼowagambwihulira.

¹³Manyire ti mwaŋulira ebiŋamba hu bulamu wange ni naali ni kiiri mu diini lyʼEhiyudaaya, era ngʼolu nahiyaanianga ehibbubbu hyʼabafugiirira Kurisito aba Hatonda gaali nʼahenire ohutongosa, era ngʼolu nagesyaho ohubisihiirisa.

¹⁴Ebiŋamba hu bumanyi owʼediini lyʼEhiyudaaya naali netemaho mutwe era ni ŋaŋuma wa muwoolo gwange owaali ni gapunyamo era ni nenda abaatu bosibosi baŋambe obulombolombo wʼabasehulu beefe.

¹⁵Cooka Hatonda mu hisasabirisi hihye owanjabula ni kiiri nomu hida hya maama, olwʼohusiima huhwe gananga tambe omulimo gugwe,

¹⁶era gaamanyisa ebiŋamba hu Yesu Omwana wuwe olwʼohwenda mbiromere Abatali Bayudaaya. Hino natandiha ohuhihola aŋabula hwendula bumanyi eyiri omuutu yesiyesi.

¹⁷Sinatiina wayire nomu hibuga Yerusaalemu eyiri abaneherera ohuba abahwenda mbebuuseho aye nenyoheramo natiina mu twale lyʼe Buŋarabbu eyi naŋwa oluvanyuma nga tiina mu hibuga Damasiko.

¹⁸Ni ŋabitaŋo emyaha edatu, nga ko tiina e Yerusaalemu ohumanyana ni Peetero aye yeesi nahena ni naye endaalo ehumi nʼetaanu jooŋene.

¹⁹Ni naali eyo ŋabula muhwenda owundi oyu nabonanaho ni naye ohutusaho Yakobbo mulebe ya Yesu Musengwa.

²⁰Mu mazima ameene aga Hatonda ebindoma bino sibyabudulingi.

²¹Ni naŋwa e Yerusaalemu natiina mu matwale gʼe Siriya nʼe Kilikiya.

²²Mu hiseera ehyo abaatu abahira obungi mu bibbubbu byʼabafugiirira Kurisito abomu twale lya Buyudaaya baali bahiiri huumanya.

²³Baali baŋulira huŋulira efuma yʼebipambaho ebi baatu babalomeranga baati, “Omusinde ola owatuhiyaanianga leero yeesi abuulira abaatu bafugiirire ebyo ebi gaŋahanianga nʼatenda abaatu babifugiirire.”

²⁴Era nga bajumirya Hatonda olwʼebyali ni binjolireho.