Read lunyole Abefeeso 5 Bible Online

Abefeeso 5 - lunyole bible

Abefeeso 5

¹Ŋaahani ngʼolu muli abaana ba Hatonda abahoda, leha abe ehyʼohuboneraho mu bulamu wenywe,

²era mwendanenga ngʼolu Kurisito gatwenda geeŋayo gaafa hu lwefe ohuba eŋongo erisangaasa Hatonda.

³Mutaholanga obuhwedi oba omuutu yesiyesi ohuba nʼemoni enyangu oba ayayaanira ebibi byʼehyalo hino. Ebiitu hyʼebyo, sihiraŋi ohuba mu abaatu ba Hatonda.

⁴Mutalomanga ebyʼobuŋemu wayire ohumooca ohwehisirusiru aye mweyaasenga hweyaasa Hatonda.

⁵Hino muhimanyire erala muuti ŋaŋuma muhwedi wayire oyo ahola ebyʼobuŋemu oba ebyʼobudakaani oba aŋemberesa hu ebibi byʼehyalo hino, ko njʼohujumirya ebitali Hatonda, alisuna omugabo mu buŋugi wa Hatonda ni Kurisito.

⁶Omuutu yesiyesi saabadulinganga ati Hatonda afugiirira ebiitu hyʼebyo, olwohuba aligudya abajeemu, nʼehiruŋi.

⁷Olwʼehyo, mutaholanga muhumba nʼabaatu hyʼabo.

⁸Ni muhiiri hufugiirira Kurisito, mwagenderanga mu hiirema aye ŋaahani ngʼolu muli nʼomuhumba ni Musengwa, mugenderenga mu njase olwohuba muli baatu bʼenjase.

⁹Hiri hiityo olwohuba enjase njʼegira omuutu gaahola ebiraŋi, ebiruŋamu era ebyʼamazima.

¹⁰Era mugesyengaho ohuhola ebisangaasa Musengwa.

¹¹Mutaholanga ebiitu ebyʼehiirema olwohuba biŋuma ehi biyeeda aye mubyanihenga hubyaniha.

¹²Hiŋambya nʼesoni ohuloma hu ebyo ebi bajeemu bahola mu ngiso.

¹³Aye enjase enahubba mu hiirema, ebiitu byosibyosi ebyomu hiirema biboneherera,

¹⁴olwohuba enjase njʼegira hiisi hiitu hyaboneha. Cʼehigira baloma baati, “Sisimuha ewe oli hyʼofuluuta, era ewe oli hyʼomufu lamuha oŋwe mu bafu, era onahola otyo, Kurisito aja hu huhwaduhisa enjase.”

¹⁵Mwegenderesenga, mutebisyanga hyabaŋubeebe aye hyʼabali nʼamagesi.

¹⁶Mutambisenga hiisi kabi eyi muba ni nayo bulaŋi ohuhola ebiraŋi olwohuba omulembe guno mubi.

¹⁷Olwʼehyo, mutaba hyʼabatategeera aye mufaanie ehi Musengwa genda.

¹⁸Era mutameeranga olwohuba ehyo hija hu bonoona aye mulehe Omwoyo Omutukuvu abamaamirenga.

¹⁹Nʼomwoyo mulala, mwemberenga Musengwa e Zabbuli nʼenyembo ejʼohumujumirya, nʼeji Mwoyo abaŋa ohuseega.

²⁰Era habuhyabuhya mweyaasenga Hatonda Seefe olwʼebiitu byosibyosi, ebi Musengwa weefe Yesu Kurisito gaatuholera.

²¹Hiisi muutu aŋulirenga owahye olwʼohuŋa Kurisito eŋono.

²²Abahasi, muŋulirenga abawamwenywe ngʼolu muŋulira Musengwa,

²³olwohuba omusinde njʼomutwe gwʼomuhasi wuwe ngʼolu Kurisito ali njʼomutwe gwʼabamufugiirira, omwene nʼali njʼOmunoŋosi waawe.

²⁴Ngʼolu abafugiirira bagondera Kurisito, nʼabahasi boosi baŋulirenga abawamwawe mu hiisi hiitu.

²⁵Abasinde, mwendenga abahasi benywe ngʼolu Kurisito gendire abamufugiirira era geeŋayo gafa hu lwawe,

²⁶gabagwalaasa nʼabooga nʼamaaji, njʼehibono hihye,

²⁷ko abamufugiirira abo, babe bagwalaafu eyi ali ni baŋumaho hamogo wayire mbalo oba efunyi.

²⁸Mu ngeri njʼenyene, nʼabasinde mwesi mwendenga abahasi benywe ngʼolu mweyenda mwabeene. Owenda omuhasi wuwe aba geyenda.

²⁹Ŋaŋuma kadi mulala owerya olubeŋe aye geeriisa era geerabirira ngʼolu Kurisito alabirira abamufugiirira,

³⁰olwohuba huli mubiri gugwe.

³¹Hyaŋandiihiwa hiiti, “Olwʼehyo, omusinde analehenga semwana ni nyina, geŋimba nʼomuhasi wuwe nga bombi bafuuha mubiri mulala.”

³²Hino hyama hihulu era hiraga ngʼolu Kurisito nʼabamufugiirira bali omuutu mulala.

³³Ale, hiisi musinde gendenga omuhasi wuwe ngʼolu geyenda omwene era nʼomuhasi yeesi aŋenga wamwe eŋono.