Read lunyole Abafilipi 4 Bible Online

Abafilipi 4 - lunyole bible

Abafilipi 4

¹Aboluganda abahoda era abapembaho mu mwoyo gwange, musangaasa era nenyumiirisa hu lwenywe, mube bagumu mu hufugiirira Musengwa.

²Negayirira Ewudiya ni Sutuke baganye babe hirala olwa Musengwa.

³Kusunga muŋeeresa wahyange omwesigwa, oyeede abahasi abo bahole hirala. Olwohuba, ŋalala ni Kelemeeti ko nʼabaŋeeresa abandi aba masiina gaawe gali mu hitabo ehyʼobulamu,[2] baahola ni nange omulimo ogwʼohubuulira Amaŋuliro Amalaŋi.

⁴Hiisi hiseera musangaalenga olwohuba muli bulala ni Musengwa. Nindi ngobolamo ti musangaalenga.

⁵Muŋambenga abaatu bosibosi nʼohwegenderesa olwohuba Musengwa ali huupi hugobola.[3]

⁶Muteŋendehereranga olwʼehiitu hyosihyosi aye ebyetaago byenywe byosibyosi mubiŋambyenga Hatonda ni musaba nʼohwegalihira era nʼohweyaasa.

⁷Era emiyaaya ja Hatonda ejihutaŋanga hutegeerera erala, jihuumenga emyoyo nʼebiŋeego byenywe mu Yesu Kurisito.

⁸Aboluganda, ebiŋeego byenywe bibenga hu biitu ebiraŋi, ebyʼamazima, ebireetera abaatu ohubaŋa eŋono, ebiruŋamu era ebisaana.

⁹Hiisi ebi mwega oba ebi mwasuna ohuŋwa eyi ndi oba ebi mwabona mu ese oba mwaŋulira ni ndoma, ebyo njʼebi muba ni muta mu kola. Era Hatonda atuŋa emiyaaya aja huba ni nenywe.

¹⁰Ndi musangaafu bugali olwa Musengwa olwohuba wayire mubaaye muhenire ebbanga ni ŋuma buyeedi obu muupa, mutandihire ohufaaho. Hituufu mubaaye mufaayo aye ni muŋuma ngeri eyʼohulaga.

¹¹Sindoma hino olwohuba ndibubi. Nahena ohwiga ohubaŋo mu mbeera yosiyosi.

¹²Mbitire mu mbeera eyʼohuŋuma haatu hosihosi, nindi nʼembeera eyʼohuba ni nabyo mu bungi. Ngumira embeera yosiyosi oba huba ni nabyo oba hulumwa enjala, ohuba nʼebingi oba ohubuliriraho erala haatu hosihosi.

¹³Sobola ohubaŋo mu hiisi mbeera olwʼamaani ga Kurisito.

¹⁴Aye mwahola bulaŋi ohunjeeda mu bigosi byange.

¹⁵Bahyange Abafilipi, mumanyire muuti ni naŋwa e Makedoniya, mwali mwahafugiirira Amaŋuliro Amalaŋi era eŋuma hibbubbu hyʼabafugiirira Kurisito abanyeŋimbaho mu songa yʼohugaba nʼohusuna, ohutusaho enywe mweŋene.

¹⁶Era ngʼolu naali e Sesalonika, mwapeeresa obuyeedi emirundi ejiŋera.

¹⁷Sindoma hino olwohuba nenda muupe obuyeedi aye nenda mwahasuna omuhemba olwʼehyere hyenywe.

¹⁸Obuyeedi obu mwaŋa Epafuladito ohuleeta, buukena. Buli hyʼahasyololo ahaŋunya obulaŋi ahaŋwa mu hyayo ehibaŋongire eri Hatonda gasangaala.

¹⁹Era Hatonda wange alibaŋa hiisi ehi mwenda, nʼatusa hu buŋinda wuwe obubitiirifu obuli mu Yesu Kurisito.

²⁰Abaatu baŋenga Hatonda weefe era Seefe eŋono emirembe nʼemirembe. Amiina.

²¹Muheese abagwalaafu bosibosi. Abʼeno babahehiseeho.

²²Abagwalaafu bosibosi ohuhirira erala abali mu lubiri lwa Kayisaali[4] babahehiseeho.

²³Ehisasabirisi hya Musengwa Yesu Kurisito hibe ni nenywe. Amiina.