Read lunyole 1 Abasesalonika 5 Bible Online

1 Abasesalonika 5 - lunyole bible

1 Abasesalonika 5

¹Aboluganda, sinenda hulanduluhana mu hubalomera hu biŋamba hu biro nʼebiseera ebyo aŋa biryolera,

²olwohuba mwabeene mwesi muhimanyire bulaŋi muuti oludaalo lwʼohugobola hwa Musengwa luliba hyʼomwibi olu gaaja owiire nʼatalagire.

³Olu abaatu baliba ni baloma baati, “Ha-a! Huli bulaŋi, ŋaŋuma hituluma.” Hu olwo ndolu ohusihiiriha hulibagwaho bugwe ni batetegehire ngʼolu ebise biija hu muhasi nʼalumwa ohusaala, era ŋalibula buŋonere.

⁴Aye enywe, aboluganda, simuli mu hiirema oludaalo olwo ko lubagweho bugwe hyʼomwibi olu gaaja ohwiba.

⁵Mwesimwesi muli baatu ba mumwi, era muli hyʼeswa esiisi ejija omuusi etangalwe, muli bamu muusi. Olwohuba efe abafugiirira sihuli bamugenda wiire, wayire abaholera mu hiirema.

⁶Olwʼehyo hutaŋenyuha hyʼabandi olu bali huŋenyuha aye hubeŋo moni, era ni muli balangaasa.

⁷Abaŋenyuha, baŋenyuha wiire; nʼabameera bameera wiire.

⁸Aye efe ngʼolu huli bamumwi, hutameera aye husigale ni huli balangaasa. Husaanira hwehinge ohuhola ebibi, ohufugiirira nʼohwendana ni biri njʼengabo yeefe, nʼesuubi lyʼobunoŋosi obuŋwa eyiri Yesu libe eyi huli hyʼekofiira eyʼehyoma eyiri omusirikale.

⁹Olwohuba Hatonda sigatutegehera hutugudya mu hiruŋi hihye, ohutusaho ohutunoŋola nʼabita mu Musengwa weefe Yesu Kurisito,

¹⁰owatufiririra ko husobole ohuba balamu ŋalala ni naye, sisonga oba hufuuye oba huli balamu.

¹¹Kale hiisi mulala hu nywe agumyenga owahye, era ni muyeedana ngʼolu muhola hatyane.

¹²Aboluganda, hubegayirira mumanye era muŋe eŋono abaatu ababaholamo omulimo, aba Hatonda gatobola ohubatangirira nʼohubegirisa ebi musaanira ohuhola.

¹³Mubatengamo eŋono bugali, era mubendenga olwʼomulimo ogu babaholamo. Mwihale bulaŋi ni mweŋalama nionionio ŋagati wenywe.

¹⁴Aboluganda, hubegayirira mulabulenga abahyenywe abaŋuuna ohulera engalo, mugumyenga abatali bagumu, muyeedenga abanafu, mugumiikirizenga bosibosi.

¹⁵Mubone muuti mu nywe simubangamo omuutu owʼoluboole. Ohutusaho habuhyabuhya mwegumyenga hiisi muutu ohuholera owahye ebiraŋi, ŋalala nʼabaatu bosibosi ohuŋirira ŋalala.

¹⁶Mubenga basangaafu habuhyabuhya.

¹⁷Mujumiryenga Hatonda hiisi hiseera.

¹⁸Mu byosibyosi, mweyaasenga olwohuba enywe ngʼabaatu ba Yesu Kurisito, ehyo Hatonda cʼehi genda muhole.

¹⁹Mumanya mutahayisanga Omwoyo Omutukuvu.

²⁰Mutanyoomanga bunaabbi.

²¹Mwetegeresenga byosibyosi era mugumirenga hu hiraŋi,

²²ni mwebaayanga hiisi hibi.

²³Hatonda yeŋene atuŋa emiyaaya, abafuule abagwalaafu. Era muhuume emyoyo jenywe, obulamu wenywe nʼemibiri jenywe ni biri bulaŋi, Musengwa weefe Yesu nʼaliija mube ni mubulaho hyʼohubanenya.

²⁴Owabalanga mwesigwa, era ehi gasuubisa alihyoheresa.

²⁵Aboluganda, muteebirira hutusabirangaho.

²⁶Muheese aboluganda bosibosi mu keesa eyʼabaatu abagwalaafu.

²⁷Mbalagira, mu siina lya Musengwa weefe, ebbaluŋa yino muyisomere aboluganda bosibosi.

²⁸Musengwa weefe Yesu Kurisito abaŋambire ehisasabirisi.