Read lunyole 1 Temuseewo 3 Bible Online

1 Temuseewo 3 - lunyole bible

1 Temuseewo 3

¹Ngʼolu omanyire, efe abafugiirira Yesu huloma hituufu huuti, “Omuutu yeesi owenda omulimo gwʼobulabirizi wʼabaatu abafugiirira Yesu aba gegombire ohuhola omulimo omulaŋi.”

²Olwʼehyo, Omulabirizi, aseene ohuba omuutu owʼesambo endaŋi ejibulaho ehi omuutu geŋambya. Ali nʼohuba omusinde owʼomuhasi mulala, afuga owongo, omwegenderesa, oyu baatu baŋa eŋono, asangaalira abageni, amanyire ohusomesa,

³atali mumeesi, atali muhambwe aye nʼaŋamba ebiitu pola, ataduhanaduhana, era aŋuma mulungo gwʼebbeesa.

⁴Ali nʼohuba muutu aŋuga bulaŋi amago gage, nʼabaana babe ni bamuŋulira era ni bali bʼesambo ndaŋi.

⁵Kale omuutu ataŋanga huŋuga mago gage ameene dala, aba aŋanga atye ohulabirira ehibbubbu hyʼabafugiirira Kurisito?

⁶Nehindi, sihiraŋi Omulabirizi gaaba omuutu owahafugiiriranga Kurisito, olwohuba omuutu hyʼoyo ahanda geehudumbasa, ehyo hyamuleetera ohumusalira omusango, ngʼolu basalira Sitaani.

⁷Asaana ohuba omuutu oyu abaatu abatafugiirira Kurisito bosibosi baŋa eŋono. Olwohuba aŋabula ehyo, baaja humulomaho ebibi ataŋanga hulomeranga abaatu ehibono hya Hatonda bamuŋulira, ate hino njʼehi Sitaani genda.

⁸Mu ngeri njʼenyene, Abadiikoni boosi basaana ohuba abaatu aba baŋa eŋono, abaloma amazima, abatehapira mwenge, era abaŋuma mulungo gwʼebbeesa.

⁹Bateehwa ohufugiirira obuhwenda obuŋamba hu Kurisito. Hino bali nʼohuhihola nʼobulamu waawe wosiwosi.

¹⁰Era ni bahiiri hubangala ohubaŋa obuŋeeresa buno, beheererenga babahebera babona hanye baŋanga ohuhola bulaŋi obuŋeeresa buno ni ŋaŋuma hya hubeŋambya.

¹¹Mu ngeri njʼenyene, abahasi baawe[1] boosi baatyo, bateehwa ohuba abahasi aba baatu baŋa eŋono, abataŋaayirisa aye abegenderesa mu hiisi ehi bahola era abesigwa mu hiisi hiitu.

¹²Mu bufumbo, Omudiikoni ali nʼohuba omusinde wʼomuhasi mulala, era nʼaŋanga ohuŋuga obulaŋi abaana babe, nʼamago gage,

¹³olwohuba abaatu abaŋeeresa obulaŋi ngʼabadiikoni, mbaba abaatu baŋa eŋono era nʼabeene boosi baba nʼobugumu owʼohulomera abaatu ebihya hu hufugiirira Yesu Kurisito.

¹⁴Wayire nga suubira ohuuja mangu eyi oli, kuŋandiihira bino olwʼesonga ti,

¹⁵singa ŋabaŋo ehindwihiise ohuuja, obeeŋo nʼomanyire ebyʼohusomesa abaatu bamanye ngʼolu Hatonda genda abaatu baholagane hyʼabaana abomu nyumba endala, era nga bo njʼabaatu[2] ba Hatonda Omulamu era esiiro eyi ohufugiirira obuhwenda wa Kurisito obulaŋi era obutuufu, bwediiye.

¹⁶Aŋaŋuma hubuusabuusa, Hatonda gaatuwihulira ehyama ehiri mu hufugiirira Kurisito ehiroma hiiti: “Hatonda geebonesa eyi huli ni gambaaye omubiri hyʼomuutu, Omwoyo wa Hatonda ngʼahahasa ebigaholanga. Abamalayika baamubona, Hatonda ngʼamuŋira mwigulu mu ŋono eryʼamaani. Abafugiirira nga balomera abamawanga ebimuŋambaho, Ngʼabaatu bamufugiirira.”