Read lunyole Ababbebbulaniya 10 Bible Online

Ababbebbulaniya 10 - lunyole bible

Ababbebbulaniya 10

¹Amagambi aga Hatonda gaŋa Musa nigo hisisigo busisigo ehyʼebiraŋi ebiija aye sinje byene nʼebyene. Eŋongo eji bagobojolamo ohuŋa hiisi mwaha jiŋanga ohugwalaahisa erala omuutu ajiŋayo? Bbe.

²Eŋongo ejo jibanga ni jaali ni jiŋanga ohufuula abaatu ohuba abagwalaafu, hani balehera aŋo ohujiŋayo. Hani abo abaŋonga bahababalire bagwalaafu omulundi mulala baahena era bahali sibahiiri nʼehibi.

³Aye eŋongo ejo hiisi mwaha jihola gwa hubahebulisa jiiti bahiiri nʼebibi.

⁴Hiri hiityo olwohuba amafugi gʼebunwa yʼeŋombe ko nʼagembusi sigaŋanga hutusaŋo ebibi.

⁵Olwʼehyo, Kurisito ni gaaja mu hyalo gaaloma Hatonda ati, “Siwendire birabo nʼeŋongo, aye omubiri ogu waapa.

⁶Ebyayo ebi boohya ni biri bihwiye, ni neebyo ebi baŋaayo olwʼebibi, siwabisiima.

⁷Cʼehyagira nʼaloma ti, ‘O Hatonda, nijire ohuhola ebi osiima, ngʼolu bapandiihaho mu Byaŋandiihiwa.’ ”

⁸Ehidaayi galoma ati, “Siwendire birabo nʼeŋongo ko nʼebyayo ebi boohya olwʼebibi.” Hino gahiroma wayire ngʼamagambi gaali galagira ohuŋangayo eŋongo.

⁹Nga nindi aloma ati, “Nijire ohuhola ebi osiima.” Olwʼehyo atusaaŋo ekola endaayi eyʼohuŋonga ko agumye eyohubiri eyʼohugwalaasa abaatu nʼamafugi gage omwene.

¹⁰Era batubala ohuba bagwalaafu olwohuba Yesu Kurisito olu geeŋayo ngʼendiŋi omulundi mulala gaahena, gaahola ehi Hatonda asiima.

¹¹Mu ndagaano endaayi, abasengi baŋangayo eŋongo hiisi ludaalo aye sijatusangaŋo bibi byawe.

¹²Aye Kurisito ni geeŋayo omulundi mulala ngʼendiŋi olwʼebibi byʼabaatu, gahena geehala hu lubega olwʼomuhono omulungi ogwa Hatonda.

¹³Ŋaahani ahumiriiye ohwola olu Hatonda alifuula abalabe babe ekookolo ohu ata amagulu gage.

¹⁴Olwʼohweŋayo omwene ngʼendiŋi omulundi mulala, galeetera abaatu ohubabala ohuba abagwalaafu emirembe nʼemirembe.

¹⁵Era Omwoyo Omutukuvu atuhahasa ati ehyo hituufu. Geheerera galoma ati,

¹⁶“Hatonda Musengwa aloma ati, ‘Yino njʼendagaano eyi ndihola ni nabo, mu ndaalo ejʼoluvanyuma. Ndiŋandiiha amagambi gange hu myoyo jaawe.’ ”

¹⁷Ngʼameedaho ati, “Sindihebulira ebibi nʼobujeemu waawe.”

¹⁸Ŋaahani, naaba nʼasoniŋire abaatu ebibi byawe, hiba hiŋuma mahulu ohweyongera ohuŋaayo eŋongo.

¹⁹Olwʼehyo aboluganda, huŋanga ohwingira mu Hifo Ehihira Owabufu mwigulu ni huŋuma hutya olwʼamafugi ga Yesu.

²⁰Gatwiguliraŋo engira epyaha eyija ewa Hatonda era eyireeta obulamu nʼabita mu lutimbe, ko njʼomubiri gugwe, olu gaafa.

²¹Era ngʼolu huli nʼOmuhulu wʼAbasengi aŋuga enyumba ya Hatonda,

²²ale hutiine eyiri Hatonda ni hufugiirira nʼomwoyo mulala olwohuba gagwalaasa emyoyo nʼemibiri jeefe najoogaho nʼamaaji amagwalaafu.

²³Ale mugende hugumye esuubi eri huli ni nalyo, hutalidaanya olwohuba Hatonda omwene husuubisa, mwesigwa.

²⁴Huŋengayo omwoyo hiisi muutu ohuhubbirisanga owahye, ohuhola ebiraŋi nʼohwendana.

²⁵Hutegania huhumbaananga ŋalala ngʼolu abandi bahola. Aye hiisi muutu agobose mu wahye amaani ohuhirira erala ngʼolu ohugobola hwa Musengwa hunaatere ohwola.

²⁶Eŋumayo eŋongo eyindi oyʼohutusaŋo ebibi byefe, hunabbenga mu hugenderera ni huhenire ohutegeera amazima agaŋamba hu Yesu.

²⁷Wabula ehiba ni hisigaaye huhuumirira Hatonda ohutusalira omusango nʼohutudanya mu muliro oguja ohwohya abalabe babe.

²⁸Omuutu owajeemeranga amagambi ga Musa, bamwitanga nʼeŋuma husaasira kasita ŋabangaŋo abajulizi babiri oba badatu ohumulumiirisa.

²⁹Olwo ŋaahani omuutu abisya emoni mu hufa hwʼOmwana wa Hatonda owatugwalaasa nʼamafugi gage, oba gaajerega Omwoyo amuŋambira ehisasabirisi saalisuna hibonerezo ehisingayo obuhambwe?

³⁰Humanyire oyo owaloma ati, “Ohwegalula hwange. Ndibesasula.” Era ati, “Musengwa alisalira abaatu babe omusango.”

³¹Nga hiŋambya olusisimo ohugwa mu ngalo ya Hatonda Omulamu!

³²Muhebulire ebiseera ebyahale ebi mwasuniramo enjase ya Maŋuliro Amalaŋi aga Yesu, ngʼolu mwehaliiriha ohubonaabona ohwʼamaani olwʼohumufugiirira.

³³Emirundi ejindi babaduhanga era babahiyaania mu lubona era mwali nʼohulumirwa abo abaali mu hubonaabona hyenywe.

³⁴Mwalumirwa abasibe era mwehaliiriha nʼesangaalo olu abatafugiirira Kurisito babanyagaho ebyenywe, olwohuba mwali mumanyire muuti muli nʼebihira obulaŋi ebyʼemirembe nʼemirembe.

³⁵Olwʼehyo, mutaŋwamo maani olwohuba muja husuna omuhemba mubbala.

³⁶Muteehwa ohwehaliriha muhole ebi Hatonda genda ko musune ebi gasuubisa.

³⁷Esigaaye ahateŋama hadiidiri heene, “Oyo owuuja, gaaje era saanahalwe.

³⁸Aye oyo ahola ebiruŋamu alibaŋo mulamu olwʼohufugiirira huhwe. Era singa gaagama egongo, sindimusaasira.”

³⁹Efe sihuli mu abo abagama egongo ohusihiiriha aye huli mu abo abafugiirira banoŋoha.