Read lunyole Ababbebbulaniya 2 Bible Online

Ababbebbulaniya 2 - lunyole bible

Ababbebbulaniya 2

¹Huli nʼohugumira erala hu hituufu ehi hwaŋulira, ko hutaŋaba huhiŋwaho.

²Ohulaga ti amagambi ga Hatonda aga bamalayika balomera abaatu gaali matuufu, hiisi atagagonderanga, Hatonda gamuboneresanga.

³Olwo ŋaahani efe huliŋona huutye singa hutala obunoŋosi obubbala obwaga aŋo? Musengwa omwene njʼoweherera ohuŋa obuhwenda obuŋamba hu ngeri eyi baatu banoŋohamo era abo ababuŋulira batuhahasa ngʼolu buli butuufu.

⁴Ni Hatonda omwene gahahasa ati obuhwenda obwo butuufu ni gaahola ebyʼeŋunyisa nʼebyamaliholiho era nʼagaba nʼebirabo byʼOmwoyo Omutukuvu ngʼolu omwene genda.

⁵Abamalayika si mbaba Hatonda gaaŋa obuŋangi ohuŋuga ehyalo ehinyaaha, ehiriija ehihulomaho.

⁶Aye ŋaliŋo mu Byaŋandiihiwa aŋa bihahahisa erala biiti, “Hatonda, omuutu njʼani ohuba ti omuŋeegaho, era omwana wʼomuutu njʼani ohuba ti omulumirwa?

⁷Wahola omuutu ŋabuliraho ŋadiidiri ohuba hyʼabamalayika. Era wamwambasa engule eyʼeŋono,

⁸era ngʼomuŋa nʼobuŋangi ohuŋuga hiisi hiitu.” Hatonda ni gaata ebiitu byosibyosi ŋaasi wʼobuŋangi bwʼomuutu, ŋaŋuma hiitu kadi hirala ehi atamuŋa huŋuga. Aye ŋaahani huhiiri hubona byosibyosi nʼabiŋuga.

⁹Aye hubona Yesu oyu beesa ŋaasi gaŋumiraho ŋadiidiri ohuba hyʼabamalayika ŋaahani ni bamuŋaye engule eyʼeŋono olwʼohubonaabona ohugabonaabona. Era olwʼehisasabirisi hya Hatonda gaafiiririra abaatu bosibosi.

¹⁰Hatonda owatonda ebiitu byosibyosi era agira byabaŋo, gasiima ohunoŋola abaana babe bangi gaabambasa eŋono. Olwʼehyo, gabona ati Yesu njʼosaniira ohuba omutangirisi owolereeye nʼabita mu humugudya ko abanoŋole.

¹¹Yesu ko ni naabo aba agwalaasa, bali ni saawe mulala. Cʼehigira esoni ni jitamuŋamba ohubalanga ati balebe babe.

¹²Yesu aloma Hatonda ati, “Nahamanyise abalebe bange obuhulu wʼesiina liryo, nahembe ni kujumirya mu humbaaniro.”

¹³Era nindi aloma ati, “Nja hwesiganga Hatonda.” Era geyongera ohuloma ati, “Ndi ŋano nʼabaatu aba Hatonda gaapa.”

¹⁴Olwohuba abaatu bali nʼomubiri nʼamafugi, cʼehyagira Yesu gafuuha hya nibo ko aŋange ohufa asihiirise Sitaani owaali nʼobuŋangi hu hufa,

¹⁵ko abo abaali hyʼabasibe mu bulamu waawe ni batya ohufa, abaŋe edembe.

¹⁶Mu butuufu oweene, Yesu sigaaja huyeeda abamalayika aye gaaja huyeeda bejuhulu ba Yibbulayimu.

¹⁷Cʼehyagira gafaana hya balebe babe mu hiisi ngeri, ko aŋeerese Hatonda ngʼOmuhulu wʼabasengi ali nʼehisa era omwesigwa, ko aleetere Hatonda ohusoniŋa abaatu ebibi.

¹⁸Era ŋaahani aŋanga ohuyeeda abo abahemewa, olwohuba yeesi bamuhema era gabonaabona.