Read lunyole Ababbebbulaniya 3 Bible Online

Ababbebbulaniya 3 - lunyole bible

Ababbebbulaniya 3

¹Ale baluganda, enywe aba Hatonda galanga musune omugabo gwʼobulamu obwomwigulu, muŋeegenga hu Yesu Omuhwenda era Omuhulu wʼabasengi ba Hatonda oyu hufugiirira.

²Niye gaali mwesigwa eyiri Hatonda owamutobola ohuhola omulimo gugwe, ngʼolu Musa gaali mwesigwa mu nyumba ya Hatonda.

³Cooka ngʼolu omutongoli aba nʼeŋono erihira enyumba eyi atongola, ni Yesu asaniira ohuba nʼeŋono erihira erya Musa.

⁴Hiri hiityo olwohuba hiisi nyumba ebaaho owayitongola aye owatongola hiisi hiitu nje Hatonda.

⁵Musa gaali muŋeeresa mwesigwa mu nyumba ya Hatonda era gaaloma hu biitu ebi Yesu gaali nʼaja hulomaho mu biseera ebyomu moni.

⁶Aye Kurisito ngʼomwana, mwesigwa mu nyumba ya Hatonda. Ndiife enyumba ya Hatonda singa husigala ni huli bagumu era ni huli nʼesuubi eryo eri hwebonehesyamo.

⁷Ngʼolu Omwoyo Omutukuvu aloma ati, “Olwa leero ni munaŋulire ejanjaasi lirye,

⁸mutahahanyasa myoyo jenywe, hyʼabasehulu benywe olu bajeema hu ludaalo olu bahemeraho Hatonda mu lulafu,

⁹eyo eyi basehulu benywe baakema, era ohuhena emyaha amahumi ane baabona ebinabahola.

¹⁰Cʼehyagira naluŋira abaatu abo, era nʼaloma ti, ‘Habuhyabuhya emyoyo jaawe jiŋaba, era sibaŋamba magambi gange.’

¹¹Ni naluŋa nalayira ti, ‘Sibalyola mu hifo omu naali nʼohubaŋeramo ehiŋuumulo.’ ”

¹²Olwʼehyo, aboluganda, mweŋomehe ŋatabaŋo kadi mulala hu enywe aba nʼomwoyo oguŋemba ohuhola ebibi era ogutafugiirira, gaaŋwa hu Hatonda omulamu.

¹³Aye hiisi muutu agumyenga owahye hiisi ludaalo, ni huhiiri mu “Olwa leero” ko ŋatabaŋo wayire mulala hu enywe oyu hibi hidulinga gahahanyasa omwoyo gugwe.

¹⁴Hiri hiityo olwohuba hwafuuha abaloma ehirala mu Kurisito kasita hugumihisya erala owesigwa weefe obu hwatandiha ni nawo ohwola olu huliŋwa hu hyalo huno.

¹⁵Ebyaŋandihiwa biroma biiti, Olwa leero ni munaŋulire ejanjaasi lirye, mutahahanyasa myoyo jenywe, hyʼabasehulu benywe olu bajeema.

¹⁶Mbaba ani abaŋulira ejanjaasi lya Hatonda bamujeemera? Mbabo bosibosi aba Musa gaatusa e Misiri.

¹⁷Era mbaba ani aba Hatonda galuŋira ohuhena emyaha amahumi ane? Mbabo abonoona, baafa era emirambo jaawe jasigala mu lulafu.

¹⁸Era mbaba ani aba Hatonda galayirira ati sibalingira mu hiŋuumulo hihye? Mbabo abamujeemera.

¹⁹Olwʼehyo, hubona ti sibengira mu hiŋuumulo hihye olwʼohutafugiirira hwawe.