Read lunyole Ababbebbulaniya 5 Bible Online

Ababbebbulaniya 5 - lunyole bible

Ababbebbulaniya 5

¹Hiisi muhulu wʼabasengi ba Hatonda bamutobola ohuŋwa mu baatu ohubahihirira ewa Hatonda nʼaŋayo ebirabo nʼeŋongo olwʼebibi byawe.

²Hiri hiityo olwohuba omwene yeesi ali nʼobunafu, era aŋamba pola abo abahola ebicaamu ni batamanyire ŋalala ni naabo abaŋaba.

³Ehyo cʼehigira nʼaŋayo eŋongo hu lwʼebibi bibye ko nʼolwa ebibi byʼabaatu.

⁴Ŋaŋuma aŋanga ahwepaatihaho eŋono eryohuba muhulu wʼabasengi ohutusaho Hatonda omwene nʼamulangire ngʼolu galanga Alooni.

⁵Mu ngeri njʼenyene, Kurisito yeesi sigepaatihaho ŋono eryo wabula Hatonda omwene njʼowamuloma ati, “Oli Mwana wange, olwa leero kusaaye.”

⁶Aŋaatu aŋandi mu Byaŋandiihiwa Hatonda aloma ati, “Oli musengi emirembe nʼemirembe, hyʼolu Melukezedeki gaali.”

⁷Yesu ni gaali nʼahiiri hu hyalo huno, gegayiriranga era gasaba nʼejanjaasi eryʼamaani nʼamasiga nʼaliririra Hatonda owaali nʼobuŋangi ohumunoŋola eri ohufa era yeesi gamuŋulira olwohuba Yesu gamuŋanga eŋono bugali.

⁸Wayire Yesu gaali Mwana wa Hatonda, ohugudya ohubamugudya hwamwigirisa ohuba mugondi.

⁹Era ni gahena ohubita mu hubonaabona, gafuuha munoŋosi owʼemirembe nʼemirembe eyiri abo bosibosi abamugondera,

¹⁰ni Hatonda gaamufuula muhulu wʼabasengi hya Melukezedeki.

¹¹Huli nʼebingi ebyʼohuloma hu hya Yesu ohuba hya Melukezedeki aye higosi ohubanyonyola olwohuba mulwaŋo ohutegeera.

¹²Mu butuufu oweene hani hatyane muli basomesa aye muhyenda omuutu owohubasomesa ebi batagihiraho ohwega hu Hatonda. Era muli hyʼabaana abaŋere abasaanira mabeere sosi mere ekahadafu.

¹³Hiisi muutu ahyenda ohutambisa amabeere goŋene aba ahiiri mwana muŋere ataŋanga hwawula ehiraŋi nʼehibi.

¹⁴Aye emere ekahadafu yʼabaatu abaŋangaaye mu byʼomwoyo, abamanyire ohwawula ehiraŋi nʼehibi.