Read lunyole Ababbebbulaniya 7 Bible Online

Ababbebbulaniya 7 - lunyole bible

Ababbebbulaniya 7

¹Melukezedeki gaali habaha wʼehibuga ehi balanga baati Saalemu era nʼali musengi wa Hatonda Oyo Ali Ŋamugulu Obugali. Yibbulayimu ni gaali nʼaŋwa mu lutalo olu gaŋangula abahabaha gagaanana ni Melukezedeki, gamusabira ekabi,

²nga Yibbulayimu aŋa Melukezedeki hirala ehyʼehumi ehyʼebiitu byosibyosi ebi gaali nʼanyagire. Esiina Melukezedeki litegeesa, “Habaha ahola ebiruŋamu.” Ate “Habaha owʼe Saalemu” hitegeesa hiiti “Habaha aleeta emiyaaya.”

³Ŋabula amanyire hu byʼohusaaliwa oba ebyʼohufa hwa Melukezedeki. Ŋaŋuma amanyire semwana wayire nyina oba abasehulu babe. Melukezedeki ali hyʼOmwana wa Hatonda era asigala musengi emirembe nʼemirembe.

⁴Ale oweene ngʼolu Melukezedeki gaali muhulu! Ni sehulu yeefe Yibbulayimu gamuŋa ehirala ehyʼehumi hu ebyo ebi ganyaga mu lutalo!

⁵Amagambi galagira bejuhulu ba Leevi abafuuha abasengi ohusoloosa mu balebe baawe Abayisirayiri hirala hyʼehumi wayire nga abalebe baawe abo bejuhulu ba Yibbulayimu.

⁶Melukezedeki sigaali wamuhida hya Leevi aye Yibbulayimu gamuŋa hirala ehyʼehumi. Melukezedeki gahena gaaŋa Yibbulayimu, omuutu oyu Hatonda gaali nʼaŋaaye ebisuubise, ekabi.

⁷Ŋaŋuma hubuusabuusa ti omuutu ahiraho owahye edaala njʼamuŋa ekabi.

⁸Ni huloma hu basengi abomu lulyo lwa Leevi, abaatu obuutu abafa njʼabasoloosanga hirala ehyʼehumi. Aye Ebyaŋandihiwa biroma biiti Melukezedeki abasinga olwohuba niye mulamu.

⁹Oŋanga ohuloma oti Leevi yeesi nʼabasengi abʼomululyo lulwe, abasoloosa ehirala ehyʼehumi, boosi baahiŋa Melukezedeki ni babita mu Yibbulayimu.

¹⁰Hiri hiityo olwohuba Leevi ni gaali nʼahiiri mu tumbu ja Yibbulayimu, gaaŋa Melukezedeki hirala ehyʼehumi.

¹¹Abayisirayiri basuna amagambi ni gediiye hu buŋeeresa wʼAbaleevi. Omulimo gwʼabasengi abomu lulyo lwa Leevi guba ni gwali muluŋamu, hani sihyali ni hyetagisa omusengi owundi ohuuja nʼali hya Melukezedeki, nʼataŋwa mu hida hya Alooni.

¹²Obuŋeeresa wʼabasengi bunacuuha, nʼamagambi goosi gacuuha.

¹³Musengwa weefe oyu balomaho ebyo, wamu hiha hindi ehitali hyahuŋwamo musengi wayire mulala ohuŋeeresa hu hituuti.

¹⁴Huhimanyire huuti Musengwa weefe gaŋwa mu hiha hya Yuda ehi Musa atalomaho ati hiriŋwamo abasengi.

¹⁵Aye hitegereheha hiiti ŋaahani ŋaliŋo ecuuhacuuha, ŋaliŋo omusengi owundi ali hya Melukezedeki,

¹⁶ataafuuha Musengi wa Hatonda olwohuba gaali wamu hiha ehiŋwamo abasengi aye hu lwʼobuŋangi bwʼobulamu obutaŋwaŋo.

¹⁷Hiri hiityo olwohuba Ebyaŋandihiwa biroma biiti, “Oli musengi emirembe nʼemirembe, hya Melukezedeki.”

¹⁸Ehiragiro ehidaayi ehiŋamba hu basengi, bahidibya olwohuba hyali hinafu era ni hitagasa,

¹⁹olwohuba amagambi manafu era sigagasa. Aye ŋaahani huli nʼesuubi erihiraho obulaŋi erituleetera ohwigerera ohuupi ni Hatonda.

²⁰Hatonda galayira ati Yesu aja huba musengi emirembe nʼemirembe. Abandi bala bafuuha basengi nʼatalayiiye.

²¹Aye Yesu gafuuha musengi olu Hatonda galoma ati, “Musengwa saalicuusa biŋeego bibye olu gahulayirira ati, ‘Oli musengi emirembe nʼemirembe.’ ”

²²Olwʼehirayiro ehyo, Yesu gafuuha musingo gwʼendagaano ehira obulaŋi era njʼagira yoolerera.

²³Abasengi mu ndagaano endaayi baali bangi olwohuba bafanga.

²⁴Aye olwohuba Yesu saafa, obuŋeeresa buwe ngʼomusengi wa mirembe nʼemirembe.

²⁵Olwʼehyo, Yesu aŋangira erala ohunoŋola abo abaaja eyiri Hatonda ni babita mu ye olwohuba aliŋo ohubaŋoherehesa emirembe nʼemirembe.

²⁶Omuhulu wʼabasengi ba Hatonda oyo njʼowolana nʼobwetavu weefe olwohuba mwawufu, abula hyahumweŋambya, mwawufu hu fe ababbengi era Hatonda gamuhusa gaaba ŋamugulu wʼegulu.

²⁷Yesu saali hyʼabahulu bʼabasengi abandi. Sihimwetagisa huŋaayo eŋongo hiisi ludaalo olwʼebibi bibye ko nʼebyabandi. Niye geeŋayo ngʼeŋongo olwʼebibi byʼabaatu omulundi mulala gaahena, olu bamuhomerera hu musalabba.

²⁸Mu magambi ga Musa, batobolanga abaatu buutu abaali nʼobunafu ohuba abahulu bʼabasengi. Aye mu hirayiro ehyalondera amagambi ago, Hatonda gatobola Mwana wuwe ohuba omusengi owolereeye emirembe nʼemirembe.