Read lunyole Ababbebbulaniya 8 Bible Online

Ababbebbulaniya 8 - lunyole bible

Ababbebbulaniya 8

¹Ehihulu ehi huli hulomaho cʼehino ti, huli nʼOmuhulu wʼabasengi ba Hatonda era gehaaye mwigulu hu lubega lwʼomuhono omulungi ogwa Hatonda Omwene Buŋangi.

²Omuhulu wʼabasengi oyo aŋeeresa mu Hifo Ehihirira erala Owabufu mu weema eyi Hatonda Musengwa omwene gabbota, sosi abaatu.

³Hatonda gataŋo hiisi muhulu wʼabasengi ohuŋangayo ebirabo nʼeŋongo. Olwʼehyo, ni Yesu yeesi gaali nʼohuba nʼehi aŋayo.

⁴Abanga nʼahiiri hu hyalo, sigahali musengi wa Hatonda kadi naŋadiidiri olwohuba eriyo abasengi abaŋaayo ebirabo ngʼolu magambi galagira.

⁵Ebi abasengi abo bahola bifaana bufaane hyʼebyo ebiri mwigulu. Era Musa ni gaali nʼaja hubbota eweema, Hatonda gamulagira ati, “Hola byosibyosi nʼolonderera endagiriro eyi wasuna ni waali hu lusozi Sinaayi.”

⁶Aye obuŋeeresa wa Yesu buhira owʼabasengi abadaayi ngʼolu endagaano epyaha eyi gahola nʼafaaŋania abaatu ni Hatonda yihira endaayi olwohuba yediiye hu bisuubiso ebisinga obulaŋi.

⁷Endagaano endaayi yibanga ni yaali nʼeŋuma ehiŋumiraho, Hatonda sigahaholire eyohubiri.

⁸Aye Hatonda Musengwa galoma ni goloobya abaatu babe ati, Hatonda Musengwa aloma ati: Ehiseera hinahoole, nʼahola endagaano epyaha nʼabaatu ba Yisirayiri, ko nʼabaatu abomu hiha hya Yuda.

⁹Siyiriba hyʼendagaano eyi nahola nʼabasehulu baawe, olu nabaŋamba hu muhono nabatusa e Misiri. Aye olwohuba sibagumya ndagaano eyo, keesi nalehayo ohubaŋulirisa.

¹⁰Yino njʼendagaano eyi ndihola nʼAbayisirayiri mu hiseera ehiija. Ndiŋandiiha amagambi gange hu myoyo jaawe. Banahanjumirye nga Hatonda waawe, era boosi baliba baatu bange.

¹¹Ŋaliŋuma alisomesa omulebe wuwe oba muliranwawe, nʼamuloma ati, “Osaana ohumanya Musengwa.” Olwohuba ohuŋwera erala hu baŋere ohwola hu bahulu, bosibosi baliimanya nga Musengwa yaawe.

¹²Olwohuba ndisoniŋa ebibi byawe era sindibihebulira kadi naŋadiidiri.

¹³Hatonda nʼaloma hu ndagaano epyaha, endaayi aba ayidibisye. Era ehiitu banahidibya hiba hiŋuma mugaso.