Read lunyole 1 Peetero 2 Bible Online

1 Peetero 2 - lunyole bible

1 Peetero 2

¹Olwʼehyo mwefihuleho ebibi byosibyosi, ohuhotogerera abaatu, obudulingi, obunafuusi, ekirihindi nʼohuloma ebibi hu bahyenywe.

²Ngʼolu baana abaŋere benda amabeere amatomwa ko bahule bulaŋi, mwesi muŋembenga hu hibono hya Hatonda mwahaŋangala mu bunoŋosi wenywe.

³Hyaŋandiihiwa hiiti, “Mwalega hu Musengwa weefe era mumanyire ngʼolu ali mulaŋi.”

⁴Mutiine eyiri Yesu Musengwa, ebaale eryʼebbeeyi eri baatu baagaana baati siryamugaso aye Hatonda galitobola lyaba lyʼebbeeyi eyi ali.

⁵Mwesi muli mabaale agʼebbeeyi aga Hatonda ali hutambisa ohutongola enyumba[1] yiye. Mwesi muli basengi ba Hatonda abamuŋa eŋongo eyi musangaasa ohubita mu Yesu Kurisito.

⁶Hyaŋandiihiwa hiiti, “Bona taaye ebaale mu Sayuuni, erinatobola era eryʼebbeeyi, era hiisi amwesiga saanahaswale.”

⁷Ebaale lino lyamugaso bugali eyiri enywe abamufugiirira aye eyiri abo abatafugiirira, “ebaale eri abatongoli batala baati siraŋi, njʼeryafuuha eryʼomugaso mu gosigosi.”

⁸Era nindi hyaŋandiihiwa hiiti, “Lino njʼebaale egumu erireetera abaatu ohwegumula, ebaale ehosa eribaleetera ohwetega baagwa.” Begumula olwohuba sibafugiirira ehibono, nga Hatonda ehigategeha hyolerera.

⁹Aye enywe babatobola, muli basengi ba Hatonda, egwanga eryawufu, abaatu babe abagatobola ohulomera abaatu obuhwenda bwʼoyo owabalanga ohuŋwa mu hiirema[2] ohwingira mu njase yiye eyʼamaani.

¹⁰Simwali baatu ba Hatonda aye ŋaahani muli baatu babe era egongo eyo mwali muŋuma hisa hihye aye ŋaahani mwahisuna.

¹¹Bameeri bange, ngʼolu mumanyire muuti muli balugendwa era abawuli mu hyalo muno, mbasunga mweŋalame ohuhola ebikolwa ebyʼomubiri ebibaŋiriŋania.

¹²Esambo jenywe jibenga ndaŋi ŋagati mu batafugiirira Hatonda abamumenyiremo. Wayire banababeŋerenga, ne ni banabonenga ebikolwa byenywe ebiraŋi, baja huŋa Hatonda eŋono[3] hu ludaalo olwʼekomerero.

¹³Ngʼolu muli baloobera ba Yesu Musengwa, mugonderenga abaŋugi benywe: muŋulirenga habaha wenywe,

¹⁴oba abaŋugi abandi abagataŋo ohugudya abo abahola ebibi era nʼohusiima abo abahola ebiraŋi.

¹⁵Hatonda genda ebikolwa byenywe ebiraŋi bisimye ebibono byʼabaŋubeebe abo ababaŋaha esiro.

¹⁶Wayire muli badembe aye muli beedu ba Hatonda era simutambisanga dembe lyenywe ohuhola ebibi.

¹⁷Muŋenga hiisi muutu eŋono, mwendanenga hyʼabalebe, mutyenga Hatonda era muŋenga habaha eŋono.

¹⁸Abeedu, muŋulirenga abasengwa benywe, si abo abababisya obulaŋi boŋene aye ni naabo abababisya obubi.

¹⁹Hiri hiityo olwohuba Hatonda alibaŋa ekabi olwʼohwehaliriha ebiguudyo ebi baatu babahola aŋaŋuma songa.

²⁰Omuutu asunamo hi singa bamuhubba olwʼebibi ebi ahola? Aye singa bamugudya olwʼebiraŋi ebi ahola, ehyo hisangaasa Hatonda.

²¹Hatonda gabalanga ohuhola ebiraŋi wayire hibaŋwereyemo ohugada. Ni Kurisito yeesi gagada hu lwenywe. Muholenga ebi gaholanga olwohuba Ye njʼehyohuboneraho hyenywe.

²²Eŋuma hibi ehi Kurisito gaahola wayire ohuloma ehyʼobundulingi.

²³Era ni bamufodogola, niye sigabagobolamo era ni bamugudya sigesasusa muutu yesiyesi aye niye obulamu wuwe gabuŋambya Hatonda asala emisango nʼatehubbira.

²⁴Kurisito omwene geetwiha ebibi byefe gabiŋira hu musalabba, ko hube hyʼabaatu abafuuye eyiri ehibi aye abagwalaafu mu moni jije. Ebihubbe ebi bamwosaho mbebibaŋonia.

²⁵Mwali muŋabire hyʼetaama aye babagobosa eyiri Omwayi era Omuhuumi wʼobulamu wenywe.