Read lunyole 2 Yowaane 1 Bible Online

2 Yowaane 1 - lunyole bible

2 Yowaane 1

¹Ese omutangirisi, pandiihira ewe omuhasi[1] oyu Hatonda gatobola ko nʼabaana babo aba nenda obugali. Sindiise seŋene abenda aye ni naabo abamanyire amazima boosi babenda,

²olwohuba amazima aga hwafugiirira sihuja hulehera aŋo ohugafugiirira emirembe nʼemirembe.

³Hatonda Seefe ni Yesu Kurisito Omwana wuwe batuŋambire ehisasabirisi era batuŋenga emiyaaya mu mazima ne mu hwendana.

⁴Hyasangaasa ni naŋulira ti balala hu baana babo bafugiirira amazima, ngʼolu Hatonda Bbaabba gaatulagira.

⁵Olwʼehyo, ewe omuhasi omuhoda, sikuŋandiihira hiragiro hinyaaha aye ehyo ehi batuŋa hale nʼatulagira hwendanenga.

⁶Ohwendana hitegeesa ohugondera amagambi ga Hatonda. Ngʼolu mwaŋulira ehiragiro ehyo ohuŋwera olu mwafugiirira Yesu, ehiragiro hihye hiri ti mwendanenga.

⁷Hiri hiityo olwohuba abasomesa abʼobudulingi bahwene ehyalo hyosihyosi. Basomesa baati Yesu Kurisito sigafuuha muutu era sigasaaliwa. Omuutu asomesa atyo, aba adulinga era aba mulabe wa Kurisito.

⁸Olwʼehyo, mwehuume ko mutafiirwa ehi mwafululuhanira[2] ni muŋeeresa Hatonda, aye musune omugabo mu wiijufu ogu gabasuubisa.

⁹Hiisi muutu alehaŋo ohufugiirira ebiŋamba hu Kurisito ngʼolu bamusomesa, oyo saaba nʼahiiri bulala ni Hatonda.

¹⁰Omuutu yesiyesi asomesa ebyʼobudulingi, simumusangaliranga nomu mago genywe.

¹¹Oyo amusangalira aba ali bulala ni naye mu bikolwa bibye ebibi.

¹²Ndi nʼebingi ebyʼohuhuŋandiihira aye olwohuba suubira ohuuja eyo kuboneho era huŋaye hwahasangaalira ŋalala.

¹³Abaana ba mugandaawo aba Hatonda gaatobola, boosi bahuhehiseeho.