Read lunyole Ohuhwehula 15 Bible Online

Ohuhwehula 15 - lunyole bible

Ohuhwehula 15

¹Ngʼaŋo nindi mbona mwigulu ehyamaliholiho ehindi ehyeŋunjisa ate ehyʼamahulu ameene amangi. Mu hyamaliholiho hino nabona abamalayika musanvu aba baali ni baŋaaye ebibonyoobonyo musanvu ebisembayo. Ebibonyoobonyo bino mbe byali ni bija hugohoba ehiruŋi hya Hatonda eri abaatu abamujeemera ekomerero ko ehene yoole.

²Era nga mbona ehiitu ehiri oti enyanja eyi babbota mu ndabirwamu ni batabuuyemo omuliro. Nga mbona ni naabo abageene ohujumirya ogusolo ŋalala nʼehifaananyi hyagwo wayire ohufugiirira babateho eraama eyʼenamba yʼesiina lyagwo. Abaatu abo baali bemeereeye hu tulo wʼenyanja eyo eyʼendabirwamu, ni baŋambire amadungu aga Hatonda gaali nʼabaŋaaye.

³Nga bemba olwembo olu Musa, owaali omuŋeeresa wa Hatonda gemba ŋalala nʼolwa Yesu ali mu hifo hyʼEtaama Etusaŋo Ebibi baati, “Hatonda Musengwa, ewe Omwene buŋangi, ebi ohola bihulu era byeŋunjisa ababibona! Ndiiwe Habaha owʼolubererera, era ebi ohola byosibyosi bituufu era byʼamazima.

⁴O! Musengwa, hiisi muutu alihugondera era gaahuŋa eŋono. Olwohuba ndiiwe weŋene omwawufu mu boosi. Era abaatu abamawanga gosigosi baliija mu moni jijo bahujumirya olwohuba olagire hiisi muutu ngʼolu otehubbira.”

⁵Ebyo ni byaŋwa, nali keja nga mbona oti hani baali beguye ehifo omu Hatonda geehala mwigulu.[13]

⁶Mu Yekaalu eyo, po mwaŋwera abamalayika bala omusanvu abaali nʼebibonyobonyo omusanvu. Abamalayika abo baali bambaaye engoye eja laasi ejituhula era ni jitemagana hutemagana ni besidihire emisibiro ejifaana hyʼezaabbu mu bifuba.

⁷Ngʼaŋo hirala hu biramu ebine bira hiŋa hiisi mulala hu bamalayika omusanvu eŋooja eri babbota mu zaabbu ni lijuuye ebiitu ebyali mu hifaananyi hyʼobusungu wa Hatonda omulamu emirembe nʼemirembe.

⁸Nga Yekaalu yijula eriisi ohulaga eŋono ŋalala nʼobuŋangi wa Hatonda omulamu emirembe nʼemirembe. Eriisi eryo lyali liraga eŋono nʼobuŋangi wa Hatonda era siŋaaliŋo muutu kadi mulala owaali nʼaŋanga ohwingira mu Yekaalu eyo ohwola olu abamalayika bala omusanvu balihena ohusindiha ebibonyoobonyo omusanvu hu hyalo.