Read lunyole Ohuhwehula 17 Bible Online

Ohuhwehula 17 - lunyole bible

Ohuhwehula 17

¹Ngʼaŋo mulala hu bamalayika omusanvu abaali nʼembya omusanvu, gaaja aŋa ndi nga gandoma ati, “Nja nje kulage ngʼolu Hatonda aja husihiirisamo ehibuga ehyo ehiri hyʼomuhasi omuhwedi era ehibitamo enjabi enyene enyingi.

²Abahabaha bohu hyalo bahola obuhwedi nʼabaatu abali hu hibuga ehyo ni bajumirya ebitali Hatonda era bahongeresa abaatu mu hyalo baaba hyʼabameesi boosi bajumirya ebitali Hatonda.”

³Ngʼaŋo Omwoyo wa Hatonda gaamaamira nga malayika oyo gangega gaapira mu lulafu. Ni hwola eyo nga mbona omuhasi ni gehaaye hu gusolo ogulando. Ogusolo ogwo gwaliho emitwe musanvu nʼameega ehumi era ni gwijuuyeho amasiina agafodogola Hatonda.

⁴Omuhasi niye gaali gambaye olugoye olwʼerangi erya namasyoma nʼebirando era yesiyesi nameregenya humeregenya olwʼezaabbu nʼamabaale agʼebbeeyi aga gaali ni gesapire hu mubiri nohu byambalo ebi gaali ni gambaaye. Mu ngalo gaali aŋambire ehihopo ehi babbota mu zaabbu ni hijuuyemo obubi wosiwosi obuŋamba hu bikolwa bibye ebyʼobuŋemu nʼobuhwedi obu ahola.

⁵Baali bamuŋandiihireho nʼesiina eryʼamahulu agʼehyama mu weeni eriroma liiti: “ONO NJE BBABBULOONI EHIBUGA EHIBBALA OMUSAAYE WʼABAHWEDI ERA ALEEGERA ABAATU OHUHOLA EBYʼOBUŊEMU.”

⁶Nga mbona oti omuhasi oyo gaali ameeye cooka nʼatameeye mwenge aye nʼameeye amafugi gʼabaatu ba Hatonda aba beeta olwʼohufugiirira Yesu nʼohulomera abaatu ebimuŋambaho. Ni nabona omuhasi oyo, ganjinyosa olusisimo era gandeetera ohweŋunja!

⁷Nga Malayika oyu naali ni naye gandoma ati, “Oteŋunja olwohuba nahunyonyole amahulu gʼehyamaliholiho ehiŋamba hu muhasi nʼogusolo ohu gehaaye oguliho emitwe musanvu nʼameega ehumi.

⁸Ogusolo ogu oweene gwaliho gulamu aye gwafa cooka gunatere ohuŋwa mwiroŋo ereeŋi eritahoma omu guli baje bagusihiirise. Ohuŋwa hu hutandiha hwʼehyalo, abaatu aba bataŋandiiha masiina gaawe mu hitabo hyʼolwanji lwʼamasiina gʼabaatu abalisuna obulamu obutaŋwaŋo, ni balibona ogusolo ogwo ogwali ni gufuuye aye ŋaahani ni guli gulamu balyeŋunja.

⁹“Ale ni hino hyetagisa obulabuhi omuutu ko gaahifaania. Emitwe omusanvu ejʼogusolo ohu omuhasi gehaaye njʼesozi omusanvu ohu batongola ehibuga ehi baguliha esiina lyʼomuhasi oyo. Mu ngeri eyindi era jiri mu hifaananyi hyʼabahabaha musanvu.

¹⁰Abataanu hu bahabaha bano omusanvu bafa, mulala ahiriŋo mulamu ate owundi ataboneha. Aye nʼaliba ni gehaaye hu tebe yʼobuŋugi saaliniasaho lutu.

¹¹Ogusolo nago ogwali ni gufuuye aye ŋaahani nindi ni guli gulamu gwosi guliŋuga nga habaha owomunaana era ni guli mu luse lulala ni nabala omusanvu, aye guliba guŋambire ngira eguŋira mu husihiiriha.

¹²“Ameega ehumi aga oweene gali mu hifaananyi hyʼabahabaha ehumi abahiiri hutandiha huŋuga. Abaatu bano ehumi ogusolo guuja hubaŋaaho owaami owomu dandi baŋuge ni nagwo ohuhena ahamanga oti hani ha saawa ndala yonyene.

¹³Abahabaha abo baliromanga hirala nʼehiriŋwamo balisalaŋo ohuŋa ogusolo gula omugabo gwabwe ogwʼobuŋugi ko nʼobuŋangi waawe.

¹⁴Abaŋugi bano ŋalala nʼogusolo balisoosa Yesu ali mu hifo hyʼEtaama Etusaŋo Ebibi aye niye alibaŋangula olwohuba nje Musengwa yʼabasengwa era Habaha wʼabahabaha bosibosi. Abamufugiirira era nga mbabo aba Hatonda gatobooye baahena bamutamo owesige baliba ni naye mu huŋiriŋana huno.”

¹⁵Ngʼaŋo Malayika oyo geyongera ohundoma ati, “Amaaji aga oweene aŋa omuhasi abaaye ni gehaaye gali mu hifaananyi hyʼabaatu ekwiro nʼekwiro ohuŋwa mu ndimi nʼamawanga agenjabulo hu hyalo.

¹⁶Ameega ehumi aga oweene agali mu hifaananyi hyʼabahabaha ehumi ni bali ŋalala nʼogusolo, balicaawa abaatu bomu hibuga ehi baguliha esiina lyʼomuhasi ola omuhwedi oyu oweene. Ehiriŋwamo abahabaha abo ŋalala nʼogusolo baliyaaya hiisi hiitu mu hibuga omwo baaleha abaatu baamo ni babambuuye babaleha ni bali beere hyʼengeso, era hyʼomuutu ali majula abula ehi gedanyire hu mubiri. Balisihiirisa abaatu baamo babahola ngʼolu omuutu anyaanya era gaamira omunohi ogubulamo egumba era balyohyera erala ehibuga ehyo hyaguhuliha.

¹⁷Hino balihihola olwohuba Hatonda aliba abatambisa ohwoheresa ehi niye genda. Olwʼehyo, balirehera ogusolo obuŋugi nʼobuŋangi waawe guŋuge ohwola olu ehi Hatonda galoma hiryolerera.

¹⁸Omuhasi omuhwedi oyu oweene, ali mu hifaananyi hyʼehibuga ehibbala ehi omanyire era abaŋugi bomu hibuga hino njʼabaŋuga abahabaha abaŋuga mu mawanga gosigosi hu hyalo.”