Read lunyole Ohuhwehula 18 Bible Online

Ohuhwehula 18 - lunyole bible

Ohuhwehula 18

¹Ebyo ni byaŋwa nga mbona malayika owundi nʼaŋwera mwigulu. Malayika oyo gaali nʼobuŋangi oweene obungi era nʼamasaamasa ebyʼamaani ebyene era ohumasamasa ohwo hwahubba enjase hu hyalo hyosihyosi.

²Nga malayika oyo aloma nʼejanjaasi eryʼamaani hu husihiirisa hwʼehibuga hira ehibbala ehi balanga baati omuhasi omuhwedi, mu ndoma eyʼohubbimbirya nʼaloma ati, Wowe! Ehibuga Bbabbulooni gahiŋooye! Abaatu babulunguhire baŋooyemo, ŋaahani bibbwe nʼemiyaayu njʼebihyemberamo; era hifuuhire hifo ehinyosa olugondo hu oyo ajaamo.

³Hatonda aja huboneresa abaatu baamo, olwohuba abatangirisi baahyo baleeteeye amawanga gosigosi ohuhola obuhwedi, bafaanana hyʼomuutu oyu omuhasi omuhwedi ameesa, gahola ni naye obuhwedi era bajumirya ebitali Hatonda. Abaŋugi bohu hyalo boosi baholire obuhwedi ni nahyo, nʼabasuubuzi hu hyalo boosi bagagaŋaliiye mu hwejalabya huhwe.

⁴Ngʼaŋo nindi pulira ejanjaasi erindi ni liŋwera mwigulu ni ŋaliŋo aloma ati, “Ne enywe abaatu bange muhiŋwemo mutahola bibi ebi bahola, olwohuba singa mwesi mubihola nja hubaboneresa, ngʼolu nja huboneresa abaatu bomu hibuga ehyo.”

⁵Ebibi byabwe bitiinire ni byebunga omwega ohwola olu byolire eyi ndi era bataŋeega baati simbona bibi ebi bahola.

⁶Ngʼolu hiri ti ahadubi hedaala haja hahye, mwesi mubahole ebi babaaye ni babahola, muteho nʼenyongesa ebiguudyo ebi mubaŋa bihireho ebyawe emirundi ebiri.

⁷Muŋe abaatu baamo ebiguudyo era mubalisye amangi, ebiguudyo ebyo biŋeraŋerane nʼohwepaaha ŋalala nʼohwejalabya hwawe. Olwohuba mu myoyo jaawe babaayenga bepaaha baati, Mutuweene? Hwihaaye hu tebe yʼobuŋugi nʼobuŋangi wosiwosi era sihuli hyʼomuhasi ali nʼomusinde, anahafe gaalira amangi nʼafuuhire namwandu.

⁸Olwʼohwepaaha hwawe ohwo, mu himanga ehitali hyaŋale, ebiguudyo omuli ohufiisa, amaliro nʼenjala, binahabooleho. Era omuliro gunahasihiirise ehibuga hyawe, olwohuba Hatonda omwene buŋangi ahenire ohusalaŋo atyo.

⁹Abaŋugi abandi hu hyalo abahwedesania ni naye ni banahabone eriisi ni liduunya ohuŋwa mu hibuga omwo ni bahenire ohuhyohya, hinahabenyose olusisimo bahubba enduulu baalira obutahi ni bubaŋambire.

¹⁰Ni banahabone ebigosi ebihyolireho, banahebaaye olwʼohutya batiina bema ŋaleeŋi olusiisimo ni lubaŋambire nga ko balira baati, “Wowe! Wowe! Sindiiwe Bbabbulooni abaaye nʼohihenaho? O! Ewe abaaye nʼobuŋangi obwo wosiwosi, mu hamanga ahototono aho olwo ebibyo ko biŋooye?”

¹¹“Abasubuuzi hu hyalo boosi banahalire amangi ni ŋabula muutu owʼohugula ebyʼamatano byawe.

¹²Ebyʼamatano ebyo ni mulimo emihobyo eji babbota mu byoma ebyʼebbeeyi hyʼezaabbu nʼefeeza; engoye ejʼebbeeyi eja laasi ni mafuta ni fulungu nʼejerangi erando eji abaŋinda bonyene bambala; nʼebyomu nyumba ebyʼebbeeyi ebi babbota mu mbaawo ejʼebbeeyi, mu masyaka, mu byoma nʼamabaale agʼebbeeyi.

¹³Nʼebyahaloosa ebyʼebbeeyi omuli ebi balanga baati sinamona, nʼebizaali, nʼobubbaani, miira, nʼomwenge, nʼamafuta agahalanga, nʼengaano eyʼohunyiiya emigaati, eŋombe nʼetaama nʼembalaasi ŋalala nʼebigaali ebi jiŋalula, nʼabaatu ni batabalehire yigongo boosi ni babatunda ohuhola owiidu.”

¹⁴“Abasubuuzi nga baloma abaatu bomu ehibuga ehyo baati, ‘Ebiraŋi byosibyosi ebi myoyo jenywe jaŋembanga, omuli ebinofu nʼebyesapo ebi mwesapanga, simuhigobolayo hubibona.’

¹⁵Abasubuuzi abatundanga ebiitu ebyo era babigagaŋaliramo balyema ŋale ni bebaayire, olusisimo ni lubaŋambire olwʼebyali ni byolire hu hibuga Bbabbulooni.

¹⁶Balihubba enduulu era baalira baati, “ ‘Wowe! Wowe! Enywe abaatu bʼe Bbabbulooni, sindinywe ababaaye ni muhihenaho? Sindinywe ababaaye ni mwesapa engoye endaŋi eja laasi, nʼenando eji abaŋinda bonyene bambala? Sindinywe ababaaye ni mwambala emihobyo ejimeregenya eja zaabbu nʼamabaale agʼebbeeyi?

¹⁷Olwo mu hamanga ahatotono hano ebyʼobuŋinda bibyo byosibyosi ko bihenire ohususunguha?’ “Abeene maato amabbala, taho abagimbi baago ko nʼabagasaabaliramo, nʼabaatu bosibosi abeyemeresaŋo olwʼengendo eji bagenda ni basabaala hu nyanja boosi banahebaaye beema ŋaleeŋi.

¹⁸Ni banahabone eriisi ko ni liduunya banahalome baati, ‘Dala hu hyalo hwali hubaayeho ehibuga ehyegingihiriri hya Bbabbulooni?’ ”

¹⁹Banaheyoŋeho efuuhe mu mitwe ohulaga ti obutahi bubaŋambire era bahubba enduulu ni balira baati, “Wowe! Wowe! Sindinywe abaatu bʼe Bbabbulooni ababaaye ni muhihenaho? Sindinywe ababaaye ni mugagaŋahiise abaatu bosibosi abali nʼamaato amabbala hu nyanja? Olwo mu hamanga ahatotono aho ebibyo ko biŋooye?”

²⁰Ale ni musaŋalye enywe abomwigulu olwohuba Hatonda asihiirihise Bbabbulooni. Musaŋalye enywe abaatu ba Hatonda, abahwenda ba Yesu nʼabanaabbi olwohuba Hatonda asaasuuye Bbabbulooni gaamubisya ngʼolu gababisya enywe.

²¹Ngʼaŋo ŋabaŋo malayika owʼamaani owaaja gaadunda ogubaale ogwaga hyʼolubaale olubba olu baseeraho ngʼagujuguja mu nyanja nʼaloma ati, “Engeri eyi njugujeremo ogubaale guno, gwetubbya mu nyanja gwagoteramo, nʼehibuga Bbabbulooni hyosi ni banahahisihirise, era sihirigobolamo hwinyoha nindi.

²²Mu hibuga hyenywe, ebinyumo ebyʼebifuga omuli amadungu nʼabagahubba, emirere nʼabajifuuŋa ko nʼamagwala nʼabagafuuŋa Sibiriŋulirihanamo nindi. Ababboti boosi sibanahabeemo era simuliŋulirihanamo janjaasi lyʼembaale abahasi ni basa.

²³Omuutu salibonaho taala ni yaduha mu hibuga, era sibaliŋulira nindi ni bahubbira abeeŋa ebigalagala. Abasubuuzi abʼamaani mu hyalo hyosihyosi babaaye baŋwa mu hibuga hyenywe, aye olwohuba babaaye balyaha era ni begesa nʼabaatu bosibosi obulyahi, njʼehigema nahahusihiirise.

²⁴Nʼehindi olwohuba abaatu bʼehibuga hyenywe beeta abanaabbi, nʼabaatu abandi abalomeranga abahyawe ko nʼabafugiiriranga bosibosi ehibono hya Hatonda.